काठमाडौं– नेपाली कंग्रेसका नेता गगन थापाले चुनावी प्रचारप्रसारमा क्रममा बम विस्फोट गराउने कार्य कायरताको पराकाष्ठाको बताएका छन्। प्रतिनिधिसभा सदस्यमा काठमाडौं क्षेत्र नम्बर ४ का उम्मेदवार थापाले आफ्नो चुनावी कार्यक्रममा बम विस्फोट गराउने व्यक्ति र समूह कायर रहेको बताउँदै शान्ति सुरक्षा कायम गर्न सरकारसँग माग गरे।
थापाको चुनावी प्रचारप्रसारलाई लक्षित गर्दै आज मध्यान्न बुढानीलकण्ठमा बम बिस्फोट गराइएको थियो। घटनामा थापासहित ११ जना घाइते भएका थिए।
विस्फोटपछि त्रिवि शिक्षण अस्पतालमा उपचारपछि थापा आफ्नो अन्तिम चुनावी सभालाई सम्बोधन गर्न सिफल पुगेका हुन्।
सभालाई सम्बोधन गर्दा सुरुमै आफूसँगै बिस्फोटमा परी घाइते भएका साथीहरुको नाम लिँदै थापाले शीघ्र स्वास्थ्यलाभको कामना गरेका थिए। उनले आफू हिंसाको राजनीति विरुद्ध सधैं अडिग रहने बताएका थिए।
थापाले चुनाव र पद्दतिसँग विमति भए पनि बम बिस्फोट गर्नु लाचारी भएको बताए।
यस्ता घटनाको भर्त्सना गरेर मात्र नपुग्ने भन्दै उनले त्यसविरुद्व नागरिकलाई लड्न र उठ्न अपिल गरे। उनले भने, ‘चुनावसँग तिम्रा विमती होलान्, पद्दतिसँग असहमति होला तर त्यसको विरोध गर्ने तरिका हुन्छ। बम बिस्फोट कायरहरुले गर्छन्। कायरताको भर्त्सना गर्ने मात्र होइन त्यसविरुद्व लड्न र उठ्न पर्छ।’
काठमाडौं क्षेत्र नम्बर-४ को सिफलमा चुनावी सभामा थापाले गरेको भाषण
उनले १० बर्से युद्ध छोडेर सच्चिन्छु भन्दै माओवादी शान्तिपूर्ण राजनीतिमा आएको स्मरण गर्दै भने, ‘विगत युद्धका बेला भएका गल्तीहरुमा माफी नमाग्दाको परिणाम हो अहिलेका बम विस्फोटका घटनाहरु।’
घटनाले सुरक्षा संवदेनशीलतामाथि गम्भीर प्रश्न उठाएको बताउँदै उनले शान्ति सु–व्यवस्था कायम गर्न सरकारसँग माग गरे।
थापाले बम हान्नेलाई मतदानबाट पराजित गर्न मतदातासँग अपिल गरेका छन्। थापाले बम आक्रमण गर्नेलाई ‘ब्यालेटबाट’ पराजित गरिदिन आग्रह गरेका हुन्। विपक्षी पार्टीका नेता कार्यकर्तासँग भोट माग्दै थापाले आफूलाई भोट नहाले पनि मतदानमा सहभागी भएर हिसांको राजनीतिलाई हराउन आग्रह गरे।
आफू समस्या देखाएर भन्दा पनि समाधान गर्ने विकल्प सहित चुनावमा उत्रिएको बताए। जनताको अधिकारको लडाइँमा एक्लै भए पनि नथाकेर निरन्तर लडेको दाबी गर्दै उनले शिक्षा र स्वास्थ्यमा देखिएको विभेदलाई अन्त्य गर्न आफूले निर्वाचन जित्न आवश्यक रहेको बताए। भने, ‘पार्टीले अस्पताल चलाएका छन्। पार्टीका नेताले स्कुल र कलेज चलाएका छन्। सरकारमा बस्नेलाई सरकारले चलाउने स्कुल र कलेजमा विश्वास छैन। शिक्षा र स्वास्थ्यमा देखिएको विभेदकारी नीतिका विरुद्ध उत्रनका लागि मतदान गर्न अपिल गर्न चाहन्छु।’
थापाले आफ्नो क्षेत्रमा कसरी विकास गर्न सकिन्छ भन्ने खाका समेत प्रस्तुत गरेका थिए। उनले वाम गठबन्धनले कुनै योजनाबिनै देशलाई समृद्ध बनाउने भन्दै भ्रम सिर्जना गरिरहेको आरोपसमेत लगाए। थापाले आफ्नै पार्टी सभापति शेरबहादुर देउवाप्रति लक्षित गर्दै भने, ज्योतिषले के भने भन्दा पनि अब पार्टी सञ्चालन नयाँ ढंगले गर्नुपर्छ। उनले भने, ‘युवाको उकुसमुकुस मैले बुझेको छु, फ्रस्टेसन मैले बुझेको छु। म युवाको पक्षमा काम गर्छु।’ उनले अबको १५ वर्षमा केही गर्न नसके देशले कहिल्यै विकास गर्न नसक्ने जनाउँदै भने, ‘अब १५ वर्ष पनि केही नगर्ने हो भने, देशमा जेष्ठ नागरिक मात्र बाँकी रहन्छन्। युवा विदेश पठाएर देश विकास गर्न सकिँदैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
