न्युयोर्क - संयुक्त राष्ट्रसंघका महासचिव एन्टोनियो गुतिरेसले यमनमा युद्धविराम गर्न सम्बद्ध सबै पक्षसँग आग्रह गरेका छन् । सकेसम्म छिटो युद्धविराम गर्न सके यमनमा हाल जारी मानवीय संकट न्यून गर्न सकिने उनले बताएका छन् ।
महासचिवले गुतिरेसले केही दिनयता सशस्त्र द्वन्द्वमा सहभागी सबै पक्षसँग आग्रह गरेको उनका प्रवक्ता स्टिफन डुजारिकले बताए । पछिल्लो समय यमनको राजधानी सानामा झडप भएका छन् । ती झडपमा सर्वसाधारण र निःशस्त्र सर्वसाधारण मारिने गरेका छन् ।
सानामा पछिल्लो समय पूर्वराष्ट्रपति अली अब्दुल्लाह सालेहसमर्थक सेना, हाउथी विद्रोही र राष्ट्रपति अबेद्रब्बु मन्सुर हादीबीच द्वन्द्व जारी छ । गत साता सानामा भएको झडपमा विद्रोही र सेनाका गरी करिब ६० जना मारिएका थिए ।
हाउथी विद्रोहीलाई इरानले समर्थन गर्दै आएको छ । पूर्वराष्ट्रपति हादीको सरकारविरुद्ध हाउथी विद्रोही पनि सालेहसँग मिलेको छ । पछिल्लो समय भएका झडपका कारण एम्बुलेन्स र चिकित्सक पनि घाइतेको उपचार गर्न नसकेका र सर्वसाधारणले पनि आवश्यताअनुसार खाद्य सामाग्री तथा अन्य वस्तु किन्न नसक्ने अवस्था छ ।
त्यसैगरी मानवीय सहयोगकर्ता पनि यमनका द्वन्द्वग्रस्त क्षेत्रमा निर्वाध हिँडडुल गर्न सक्ने अवस्था नरहेकाले महासचिव गुतिरेसले युद्धविरामको आग्रह गरेका हुन् । यमनमा तीन वर्षअघि हाउथी विद्रोहीले राजधानी साना कब्जा गरेका थिए । उनीहरूले पूर्वराष्ट्रपति सालेहको समर्थनमा साना कब्जा गरेका थिए ।
सन् २०१५ देखि यमनको सहयोग गर्ने बहानामा साउदी अरेबियाले विद्रोहीलक्षित हवाई आक्रमण सुरु गरेपछि अहिलेसम्म ८ हजार ७ सय ५० भन्दा बढीको मृत्यु भइसकेको छ ।
यसैबीच यमनका पूर्वराष्ट्रपति सालेहले शान्ति वार्ताका लागि शनिबार साउदी अरेयिबासामु प्रस्ताव राखेका थिए ।
उनले शनिबार आफूले साउदी अरेबियाको नेतृत्वको गठबन्धनसँग वार्तागर्न प्रस्ताव गरेका थिए । प्रस्तावको साउदी अरेबियाले स्वागत गरेको छ । तर शान्ति वार्ताकै लागि अब के कसरी अघि बढ्ने एक दुई दिनमा महत्वपूर्ण निर्णय हुनसक्ने यमनी अधिकारीहरूले जानकारी दिएका छन् । रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
