इटहरी- २०५४ सालको स्थानीय निर्वाचनमा नेपाली कांग्रेसका सीताराम मेहता मेयर पदमा नेकपा एमालेका खेम पोखरेलसँग पराजित भए। त्यतिबेला सबैलाई लागेको थियो- मेहताको राजनीतिक करिअर समाप्त भयो। किनभने मेयर पदमा पराजित मेहता जितको उत्सव मनाइरहेका पोखरेलको घरमा भोज खान गएका थिए।
तर, २०७० को दोस्रो संविधानसभा निर्वाचनमा उनै पोखरेललाई पराजित गर्दै उनी राज्यमन्त्री पनि बने। अहिले उनी सुनसरी क्षेत्र नम्बर २ मा वाम गठबन्धनको तर्फबाट साझा उम्मेदवार बनेका नेकपा माओवादी केन्द्रका हिमाल सुवेदीविरुद्ध प्रतिस्पर्धामा उत्रिएका छन्।
२०६२/६३ को जनआन्दोलनपछि तराईमा उठेको मधेस आन्दोलनमा धेरै नेताहरूले आफ्नो माउपार्टी छोडे। नेपाली कांग्रेसका पुराना नेता विजयकुमार गच्छदार समेत पार्टीबाट बाहिरिए। तर, यो अवस्थामा पनि उनी कांग्रेसमै आबद्ध छन्।
२०७० मा गच्छदारको सुनसरी क्षेत्रमा रजगज हुँदा पनि उनी कांग्रेसबाट निर्वाचन जित्ने एक्लो उम्मेदवार बनेका थिए।
यतिबेला वाम गठबन्धनको कारण उनलाई हिमाल सुवेदीले कडा टक्कर दिने आशा गरिएको छ। तर, आफू कुनै पनि चुनौतीको लागि तयार रहेको उनी बताउँछन्। ‘मैदानमा उत्रिएपछि हार-जित हुन्छ नै। म सबै चुनौतीका लागि तयार छुँ,’ मेहता भन्छन्।
सुनसरीमा उनको भोट माग्ने शैलीको पनि विशेष चर्चा हुने गरेको छ। उनी भोट माग्न हिँडिरहेका बेला गाउँलेहरूलाई च्याप्प समाउँछन् र अँगालो हाल्छन्। ‘उनको विशेषता गाउँलेलाई नामले नै सम्बोधन गर्छन्,’ स्थानीय सुमन अधिकारीले सुनाए।
मेहता शेरबहादुर देउवाको तत्कालीन नेपाली कांग्रेस (प्रजातान्त्रिक) मा आबद्ध हुँदा जिल्ला सभापति थिए। अहिले रामचन्द्र पौडेल निकटका व्यक्तिलाई प्रदेशसभामा टिकट दिलाउन उनको भूमिका महत्वपूर्ण मानिन्छ।
उनले प्रदेशसभा ‘क’ मा हेमकर्ण पौडेल र ‘ख’ मा राजीव कोइरालालाई टिकट दिए मात्र आफू उठ्ने अडान लिएका थिए। जिल्लाको १२औं महाधिवेशनमा उनी, राजीव र रामबहादुर बस्नेत सँगै सभापति पदमा लडेका थिए। तर, तीन जनाबीचको प्रतिस्पर्धामा उनी राजीवपछि दोस्रो हुन पुगे र उनले पुनः मतदान गर्नुको सट्टा राजीवलाई सभापति छाडिदिए।
२०७० को निर्वाचन प्रचारप्रसारका लागि एउटा भारतीय नम्बर प्लेटको गाडीसहित त्यसका चालक नै उनको निर्वाचन क्षेत्रमा खटिएका थिए। मेहता पुनः निर्वाचनमा उठेको थाहा पाएपछि ती चालक प्रचारप्रसारका लागि 'निःशुल्क श्रमदान'का लागि भनेरै भारतबाट आएका छन्। उनको यो चर्चासँगै मेहताको चुनावी अभियान पनि तातिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
