काठमाडौं– शुक्रबार सरकारको नीति तथा कार्यक्रम पढ्ने क्रममा राष्ट्रपतिले पटकपटक प्रयोग गरेको 'मेरो सरकार' भन्ने शब्दावलीप्रति सामाजिक सञ्जालमा भएको विरोधलाई प्रधानमन्त्रीले 'छिचरा तर्क' भनेका छन्।
शनिबार प्रधानमन्त्री निवास बालुवाटारमा सम्पादक/पत्रकारहरुसँग छलफल गर्दै प्रधानमन्त्रीले सामाजिक सञ्जालमा भएको विरोधको जवाफ दिएका थिए। 'राष्ट्रपतिले मेरो सरकार भन्नुभयो। मैले मेरो देश भन्छु। मैले मेरो देश भन्दा तपाईंहरुको देश होइन भनेको हो र? अरुको होइन भनेको हो र? मेरो देश, मेरो राष्ट्र, मेरो राष्ट्रिय गान। मैले बनाएको हो र राष्ट्रिय गान? मैले मात्रै गाउने हो र राष्ट्रिय गान? मेरो मात्रै हो र राष्ट्रिय गान? तर मैले मेरो राष्ट्रिय गान भन्छु। मेरो राष्ट्रिय गौरव भन्छु। मेरो भन्ने कुराको बृहत् अर्थमा, सामूहिक अर्थमा बुझ्ने अभ्यास गर्नुपर्छ,' प्रधानमन्त्रीले आग्रह गरे।
प्रधानमन्त्रीले राष्ट्रपति देश र राष्ट्रको प्रमुख हुने स्मरण गराए। 'व्यक्तिको कुरा गरिराखेको छैन। संस्थाको कुरा गरिराखेको छु', उनले भने, 'राष्ट्रको प्रमुखको हैसियतले जुन सरकार बन्छ। त्यो सरकार राष्ट्रपति हो र राष्ट्रपतिले सरकारको नीति तथा कार्यक्रम आफ्नो सम्बोधनमार्फत भनिरहँदा गरिमामय संसदलाई मेरो सरकारको नीति यो छ, कार्यक्रम यो छ भनेर राष्ट्रपतिले भन्छन्।'
प्रधानमन्त्रीले राष्ट्रपतिले मेरो सरकार भन्नु अन्तर्राष्ट्रिय अभ्यास भएको बताए। उनले बौद्धिक र सञ्चारकर्मीहरुले छिमेकी भारतमा चलेको अभ्यास थाहा नपाउँदा अचम्म लागेको बताए।
'भारतमा आफ्नै पार्टीको सरकार हुँदा मात्रै होइन, अर्को पार्टीको सरकार हुँदा पनि संसदलाई सम्बोधन गर्दा 'मेरो सरकार' भनेरै गर्छन्। कम से कम त्यति त हेर्ने कष्ट गरौं', उनले आग्रह गरे, 'राजतन्त्र त भारतमा पनि छैन होला, गणतन्त्रै हो। भारतको राष्ट्रपति पनि कार्यकारी होइन होला। कोबिन्दजी हो। यसभन्दा ठिक अगाडिको सम्बोधन साथीहरुले यसो युट्युबमा हेर्नुभयो भने पनि स्पष्ट हुन्छन् जस्तो लाग्छ। त्योभन्दा अगाडि हेर्नुस्। त्योभन्दा अघिल्लो हेर्नुस्। अझ अघिल्लो हेर्नुस्।'
'भारतीयलाई नलागेको झल्को नेपालमा लागेको चाहिँ भर्खरभर्खर राजतन्त्र गएकाले हो कि। अथवा कतिपय 'लोकतान्त्रिक पार्टी'कै नेताहरु राजतन्त्र–राजतन्त्र भनेर कराएर हिँड्नुभएको छ। त्यसो भएकाले झल्को लागेको हो कि। झल्को लाग्नुपर्ने आवश्यकता छैन', प्रधानमन्त्रीले आग्रह गरे।
सम्पादकहरुलाई आफ्ना तर्क सुनाउँदै गर्दा प्रधानमन्त्री बीचबीचमा हाँसेका र बेलाबेलामा आक्रोशित भएका देखिन्थे। तर, राष्ट्रपतिको बचाउमा निरन्तर बोलिरहन्थे। उदाहरण र प्रतितर्क दिएर आफ्ना कुरा पुष्टि गर्न खोज्थे।
'जननिर्वाचित सरकारलाई राष्ट्रपतिले, राष्ट्रको प्रमुखले, जुन राष्ट्रपतिले गरिमामय संसदले, दुवै सदनले पास गरेको कानुनलाई हस्ताक्षर गरेपछि मात्रै कानुनको रुपमा हुन्छ, यस्तो विवाद गर्न हुँदैन कि दुइटै संसदले पास गरिसकेपछि राष्ट्रपतिले लालमोहर नलागाउँदासम्म कानुन नबन्ने? यस्तो पनि हुन्छ? संसदभन्दा ठूलो? राजतन्त्रको झल्को आयो। भन्न पनि सकिन्छ। कुनै पनि व्यवस्थाको गरिमा हुन्छन्। त्यो हामीले थाहा पाउनु वाञ्छनीय हुन्छ। छिचरा तर्कमा अल्झिनुभन्दा', उनले भने।
प्रधानमन्त्रीले फराकिलो सोच राख्न र दुनियाँ थाहा पाउन आग्रह गरे। 'कसको सरकार भनेको हो त राष्ट्रपतिले? कि निबन्ध पढ्ने? यो सरकारको नीति तथा कार्यक्रम भन्दाखेरि के फलानाको सरकार भनेर राष्ट्रपतिले भन्ने', उनले भने, 'राष्ट्रपतिले मेरो सरकार भन्ने हैसियत भएर मात्रै संसदमा आउँछन्। त्यसमा अपनत्व छ।'
उनले राष्ट्रपति राष्ट्रको सबैभन्दा माथिल्लो मर्यादित र सम्मानित पदको हुने स्मरण गराए।
'उनी अभिभावक हुन्छन्', उनले भने, 'संविधानको रक्षाको जिम्मेवारी समेत राष्ट्रपतिको हुन्छ। त्यसैले राष्ट्रपतिले मेरो सरकार भन्ने अत्यन्त सामान्य र अन्तर्राष्ट्रिय अभ्यासलाई अनौठो मान्ने जमानामा हामी हुनु भनेको या त हामीले स्थापना गरेको प्रणालीलाई बुझेनौं, या त हाम्रो मानसिकता निरर्थक दरिद्रताले मात्रै ग्रस्त हो।'
सम्बन्धित :
राष्ट्रपतिले 'मेरो सरकार' भन्दा राजाको झल्को देखिएको भन्दै विरोध
यस्तो छ आर्थिक वर्ष २०७६/७७ को नीति तथा कार्यक्रम [पूर्णपाठ]
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
