जनकपुर– प्रमुख प्रतिपक्षी नेपाल कम्युनिस्ट पार्टी र नेपाली कांग्रेसको विरोधका कारण प्रदेश २ को प्रदेशसभाको बैठक स्थगित भएको छ।
शुक्रबार बोलाएको बैठकमा नेकपा र कांग्रेसले अवरोध गरेका हुन्। प्रदेश सराकरको गतिविधि ठीक नरहेको भन्दै दुवै दलले शुक्रबार दिउँसो १:३० बजे बसेको तेस्रो अधिवेशनको पाँचौ प्रदेशसभा बैठक अबरुद्ध गरेको हो।
उपसभामुख उपमा देवले शुक्रबार प्रदेशसभा बैठक सुरु गरेपछि नेपाली कांग्रेसका सचेतक उपेन्द्र कुशवाहाले जनता आवास कार्यक्रमको कार्यविधिबारे सरकारको जवाफ नआएसम्म बैठक चल्न नदिने उद्घोष गरे।
कुशवाहाले जनता अवास कार्यक्रमको कार्यविधि संशोधन गरी भौतिक पूर्वाधार विकास मन्त्री जितेन्द्र सोनलले सदनमा जवाफ नदिएसम्म बैठक चल्न नदिने बताए। साथै उनले सरकारलाई सधै सहयोग गर्दै आएपनि विगतमा आफूहरूसँग सरकारले गरेको भद्र सहमति कार्यान्वयन नगरी भाग्न खोजिरहेको आरोप लगाए।
प्रदेश सरकारका मन्त्रीहरू आफुखुसी योजनाको रकम रकमान्तर गरेर आफ्नो क्षेत्र तथा नातागोतलाई योजना बाँडफाड गरेको बताउँदै प्रदेश सांसद कुशवाहाले भने, ‘यी सबै कुराहरूको विषयमा सरकारले जवाफ नदिएसम्म हामीले संसद चल्न दिन्नौं।’
बैठकमा नेकपाकी सांसद ज्वाला साहले समेत जनता आवास कार्यविधि सुधार नभएसम्म बैठक चल्न नदिने बताएपछि कांग्रेस र नेकपा साँसदहरूले उठेर बैठक अवरुद्ध गरेका थिए।
मुख्यमन्त्री लालबाबु राउत स्वयं प्रदेशसभा पुगे पनि बैठकमा सहभागी नै नभई फर्किएका छन्। कार्य व्यवस्था परामर्श समितिकै बैठकमा प्रतिपक्षीले अवरुद्व गर्ने जनाएपछि मुख्यमन्त्री बैठकमा सहभागी नभइकनै फर्किएका थिए।
प्रमुख प्रतिपक्षी एकमत भएर बैठक अवरुद्व गरेपछि अर्काे सूचना जारी नभएसम्मका लागि बैठक स्थगित गरिएको छ। यसअघि बैसाख ११ र १६ गते बैठक आह्वान गरिए पनि बस्न सकेको थिएन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
