राजविराज– विवाहको भोज खान जाँदा अपहरणमा परेका सप्तरीका १२ वर्षिय बालक चार दिनपछि अपहरण मुक्त भएका छन्। प्रहरीले भारतको विहार राज्यअन्तर्गत सितामडीस्थित सिवहरबाट बलकलाई अपहरण मुक्त गरेको हो।
मंगलबार जिल्ला प्रहरी कार्यालय सप्तरीमा पत्रकार सम्मेलन गरी बालकलाई सार्वजनिक गरिएको छ। सप्तरीको राजगढ गाउँपालिका–३ नर्घो निवासी जागेश्वर यादवका छोरा १२ वर्षीय लक्ष्मणकुमार यादव गत बैसाख १३ गते राति अपहरणमा परेका थिए। मामा भोलेन्द्र यादकी छोरीको विवाह भोज खान गएका उनी बिहानसम्म पनि फर्केर नआएपछि खोजी सुरु भएको थियो।
बालक फेला नपरेपछि परिवारले दिएको उजुरीका आधारमा प्रहरीले खोजतलास सुरु गरेकाे थियाे। आफन्त, नातागोता सबैतिर खोजी गर्दा पनि बालक फेला नपरेपछि अपहरणमा परेको प्रहरीले शंका गर्याे। सोही बीचमा भारतमै रहेका जागेश्वर र नेपालमा रहेका बालकका काकालाई अपहरणकारीले फोनमा फिरौती माग्न थालेपछि प्रहरीको शंका यथार्थ सावित भयो।
‘अपहरणकारीले दुबैतर्फ फोन गरेर ५० लाख रुपैयाँको डिमान्ड गरे’, सप्तरीका एसपी राजेन्द्र विष्टले भने, ‘उनीहरुकाे घरखेत बेचेर पनि त्यति पैसा नपुग्ने, पुगेपनि रातारात सबै कुरा बैच्ने अवस्था थिएन।’
अपहरित बालक लक्ष्मणकुमार यादव।
बालक अपहरणमा परेको पक्का भएपछि भारतीय क्षेत्रमै रहेको शंकाका आधारमा खोजतलासपछि स्थानीय एक होटलबाट अपहरण मुक्त गरिएको विष्टले बताए। प्रहरीका अनुसार विवाह भोज खाएर पिसाव गर्न जाँदा बालकको अपहरण भएको थियाे।
बालक अपहरणको आशंकामा प्रहरीले ३ जनालाई नियन्त्रणमा लिएको छ। उनीहरुको परिचय खुलाइएको छैन। एसपी विष्टले भने, ‘संलग्नको पहिचान भइसकेको छ। उद्दारको काम सकियो, अब अनुसन्धानको पाटो सुरु हुन्छ।’
बालकलाई अपहरण मुक्त गर्ने योजना यसरी सफल भयो
अपहरणकारीले फिरौती माग गर्न थालेपछि भारतीय क्षेत्रमै गएर बालकलाई मुक्त गर्न प्रहरीले योजना बनायो। योजनाअनुसार भारत छिर्न पातो नाका राेजेर भारतीय प्रहरी एसएसपीसँग समन्वय भयो। सोमबार साँझ एसपी विष्टसहित २३ जनाको नेपाली टोली भारतीय क्षेत्र प्रवेश गरेकाे थियाे।
‘नेपालतर्फ ५०/६० जना प्रहरी तैनाथ थिए, हामी २१ जना सिविलमा गयौ’, विष्टले भने, ‘अपहरीत बालकका २ जना आफन्तसहित २३ जनाको अथक प्रयासले राति करिब ११ बजे अप्रेसन सफल भयो।’ ४ वटा टोली बनाएर खटिएको नेपाल प्रहरीको दबाब थेग्न नसकेर अपहरणकारीले बालकलाई होटलमा राखी फरार भएको उनको भनाइ छ।
स्थानीयकाे आक्रमणबाट प्रहरीलाई जाेगायाे नेपाली भाषाले
घटनाबारे जानकारी दिँदै एसपी विष्ट।
होटलमा रहेका बालकलाई लिन जाँदा भारतीय नागरीकले नेपाल प्रहरीलाई आक्रमणको प्रयास गरेको एसपी विष्टले बताए। ‘होटलमा बच्चा फेला परेपछि हामीले आफनो गाडीमा बस्न आग्रह गर्यौं, तर उनी डराएर आउन मानेनन्’, विष्टले भने, ‘बच्चाले अविस्वास गरेपछि स्थानीयले अपहरणकारीको आशंकामा प्रहरी माथिनै आक्रमणको डर भयो।’
‘हामी नेपालबाट आएका पुलिस हौं’ भनेर नेपालीमा बाेलेपछि बालक गाडीमा बसेको र स्थानीयवासी पछि हटेको उनको भनाइ छ। ‘मैथिली र हिन्दी बाेलुन्जेल स्थानीयवासी र बालक दुवैले विस्वास गरेनन्’, उनले थपे, ‘प्रहरीको परिचयपत्रले पनि विस्वास दिलाउन नसकेका बेला नेपाली भाषाले जोगायो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
