लहान- सिरहाको कल्याणपुर नगरपालिका-८, अरङगाउँकी कञ्चन मण्डलको हत्या रहस्यमय बनेको छ। मृत्यु भएको ५ दिन बितिसक्दासमेत ‘आत्महत्या वा हत्या?’ भन्ने विषय अझै सुल्झिन सकेको छैन।
जीवन-मरणको दोसाँधमा संघर्ष गरिरहँदा अस्पतालको शय्याबाट कञ्चनले दिएको बयानका आधारमा प्रहरी अनुसन्धानमा जुटेको छ। तर, हत्यामा संलग्न भएको भनिएकाहरूको संलग्नता पुष्टि गर्न नसक्दा प्रहरीको अनुसन्धान सहज रुपमा अघि बढ्न सकेको छैन।
यस्तो थियो घटनाको अवस्था
बैसाख १२ गते, बुधबार बिहान करिब ९ः१५ मा स्थानीय बेचु मण्डल (खत्वे)को घरबाट अत्यधिक धुँवा आयो। धुँवासँगै आगोको मुस्लो देखेपछि घरमा आगलागी भएको आशकांमा गाउँलेहरू जम्मा भए।
घरको आँगनमा कञ्चन जलिरहेकी थिइन्। घटनाबारे जनप्रतिनिधि र प्रहरीलाई खबर गरियो।
वडाध्यक्ष राजेन्द्र साह र प्रहरीको टोली घटनास्थल पुग्यो। ‘हामी पुग्दा कञ्चनको शरीर ६० प्रतिशतभन्दा बढी जलिसकेको थियो,’ वडा अध्यक्ष साहले भने, ‘आँगनमा मट्टितेल हालिएका प्लास्टिकको जर्किन र पानीका बोतल थिए। बोरा पनि थियो। घरमा परिवारका कुनै सदस्य थिएनन्।’
तत्कालै उनलाई उद्वार गरी मिर्चैयास्थित मंगलम हेल्थ केयर सेन्टरमा भर्ना गरियो। लगत्तै सुनसरीको धरानस्थित बिपी कोइराला स्वास्थ्य विज्ञान प्रतिष्ठान हुँदै काठमाडौंको साँखुस्थित सुस्मा कोइराला मेमोरियल अस्पताल पुर्याइयो। तर, उपचारकै क्रममा शुक्रबार साँझ ५ः०५ बजे उनको मृत्यु भयो।
मृत्युपछिको अवस्था
कञ्चनले मर्नुअघि आफूलाई पति बेचु मण्डल, सासू ६० वर्षीया सुरजीदेवी र नन्दहरूको मिलेमतोमा मट्टितेल छर्केर आगो लगाएको बयान दिएकी छन्। त्यही बयानको आधारमा इलाका प्रहरी कार्यालय मिर्चैयाले घटनाको अनुसन्धान गरिरहेको छ।
‘उनका पति फरार छन्, गाउँ–घरमै लुकेर बसेको हुनसक्छ। हामीले खोजी गरिरहेका छौं,’ इलाका प्रहरी कार्यालय मिर्चैयाका डिएसपी शुकदेव खनालले भने, ‘सासूलाई हामीले नियन्त्रणमा लिएका छौं। अनुसन्धान हुँदैछ।’
कञ्चनको बयानअनुसार घटनामा नन्दहरूको पनि संलग्नता देखिएकाले उनीहरूको बारेमा अनुसन्धान भइरहेको खनालले बताए।
‘मृतकका पिता रामलोचन मण्डलले लिखित जाहेरी दिने तयारी गरिरहेका छन्,’ उनले भने, ‘मुख्य कुरा कञ्चनले नै आफूलाई हत्या गर्न आगो लगाइएको बयान दिएकाले त्यही कोणबाट अनुसन्धान चलिरहेको छ।’
के भन्छन् स्थानीय?
कञ्चनले आफूविरुद्ध हत्याको षडयन्त्र भएको बताएकी थिइन्। सासू, पति र नन्दहरू मिलेर पछाडिबाट मट्टितेल खन्याइ आगो लगाइएको उनको भनाइ थियो। तर, उनको दाबीसँग गाउँले र जनप्रतिनिधिहरूको मत बाझिएको छ।
हत्यामा संलग्न भनिएका उनका पति बेचु मण्डल भारतको अहमदावादमा छन्। ‘२/३ महिनाअघि रोजगारीका लागि गएका बेचु फर्केर आएका छैनन्,’ वडाअध्यक्ष साहले भने, ‘गाउँलेहरूले पनि बेचु घर आएको विषयमा जानकारी पाएका छैनन्।’
बेचु अहमदावाद गएपछि कञ्चन, उनकी डेढ वर्षीया छोरी राधा र सासू सुरजीदेवी घरमा बस्दै आएका थिए। घटना भएको समयमा सासू पनि मजदुरी गर्न बाहिरै गएकाले हत्या नै हो भन्न सक्ने अवस्था नरहेको वडाध्यक्ष साहको भनाइ छ।
‘पारिवारको आर्थिक अवस्था राम्रो छैन, मजदुरी गरेरै छाक टार्नुपर्ने अवस्था छ,’ उनले थपे, ‘घटना भएको समयमा सुरजीदेवी करिब १ किलोमिटर टाढा गणेश मण्डलको खेतमा काम गर्न गएको भन्ने सुनिएको छ।’
नन्दहरू पनि विवाह गरेर आ–आफनो घरमा गइसकेकाले कञ्चनको दाबी पत्याउनै गाह्रो भइरहेको साहले जिकिर गरे। हत्याभन्दा पनि आत्महत्याको सम्भावना बढी रहेको उनको भनाइ छ।
वडासदस्य समेत रहेकी स्थानीय कलावती पासवानले भने बैसाख ७ गने सासू–बुहारीबीच कुटाकुट भएको र त्यसपछि घर छोडेकी कञ्चन सोमबार मात्रै फर्किएको बताइन्।
तर, घटनाको समयमा आफूहरू काम गर्न गएकाले हत्या वा आत्महत्या भन्ने विषयमा एकिन भन्न नसक्ने बताइन्।
इज्जत जाने डरले आत्महत्या गरेको आशंका
पति कामका लागि भारत गएपछि कञ्चनको व्यवहार एकाएक परिवर्तन भएको गाउँले र केही जनप्रतिनिधिको दाबी छ।
तर, यस विषयमा उनीहरू खुलेर कुरा गर्न चाहँदैनन्। ‘केही दिनअघि समाजमै उनको चरित्रका विषयमा कुरा उठ्यो,’ स्थानीय भन्छन्, ‘त्यसपछि उनले छोरीसहित घर छोडिन्। बाबुको प्रयासमा उनलाई फर्काइएको थियो।’
स्थानीयका अनुसार कञ्चनले छोरी छोडेर हिँडेपछि सुरजीले नै सागरपुरस्थित उनको माइती घरमा राधालाई पुर्याउन गएकी थिइन्।
कञ्चन त्यहाँ नभेटिए पनि घर फर्कने क्रममा विषनपुर भन्ने ठाउँमा फेला पारी उनले आफूसँगै घर ल्याएको उनीहरू बताउँछन्।
गाउँ–घरमा आफनो विषयमा नकारात्मक हल्ला हुन थालेपछि कञ्चनले आत्महत्या गरेको हुनसक्ने उनीहरूको अनुमान छ।
बोल्दिनन् सुरजीदेवी
बुहारी जलेको घटनालगत्तै सूरजी बेहोस थिइन्। प्रहरीले मिर्चैयाको मंगलम अस्पतालमा उनको उपचार गरायो।
हत्या आरोपमा पक्राउ परेकी उनी अहिले इलाका प्रहरी कार्यालय मिर्चैयाको हिरासतमा छिन्। घटनाको विषयमा उनले कुनै कुरा नबताएको प्रहरीले जनाएको छ। उनी अधिकांश समय रोएर बस्ने गरेको डिएसपी खनालले जानकारी दिए।
राधाको बिचल्ली
उपचारकै क्रममा कञ्चनको मृत्यु भएपछि बेचु मण्डलको घर रित्तो छ। उनकी डेढ वर्षीया छोरी राधा बिचल्लीमा परेकी छन्। घटनापछि उनका आफन्त अमित मण्डल र झौली मण्डलको संरक्षणमा राधालाई राखिएको वडाअध्यक्ष साहले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
