मुम्बई (एजेन्सी)– भारतका केन्द्रीय मन्त्री बाबुल सुप्रियोले पद्मावती फिल्मको विवादलाई लिएर नायिका दीपिका पादुकोणको टाउकोको मूल्य तोक्नु गलत भएको बताएका छन्।
उनले देशमा रचनात्मक स्वतन्त्रता भएको बताउँदै फिल्मलाई लिएर अहिले जे भइरहेको छ, त्यसपछि दुःख व्यक्त गरे। उनले यो विवादमा सेन्सर बोर्डको भूमिका अहम रहने पनि स्पष्ट पारेका छन्। उनले छलफलबाट निष्कर्षमा पुग्न सक्ने सहज माध्यम हुँदाहुँदै कलाकारको टाउको काट्ने अभिव्यक्ति दिनु गलत भएको बताए।
भारतको एक च्यानलसँगको साक्षात्कारमा उनले भने, ‘पद्मावती ठूलो बजेटको फिल्म हो। जनभावनालाई आघात नपुग्ने गरी पनि फिल्म देखाउन सकिन्छ।’ उनले कलाकारको काम अभिनय गर्ने भएको भन्दै दीपिकालाई मार्ने धम्की दिनु नाजायज भएको बताए।
‘धम्की निन्दनीय छ। कलाकारले पर्दामा चरित्रको अभिनय मात्र गर्ने हुन्,’ उनले भने।
उनले ‘ए दिल हे मुस्किल’ मा पनि विवाद आएको तर यसलाई बसेर निर्क्यौलमा पुर्याइएको बताए। ‘म विश्वस्त छु। यसको पनि कुनै समाधान निस्किन्छ,’ उनले भने।
भारतको सर्वोच्च अदालतले बिहीबार सञ्जय लीला भन्सालीको निर्देशनमा बनेको फिल्म पद्मावतीलाई देशबाहिर रिलिज गर्ने विषयमा २८ नोभेम्बरमा फैसला हुने बताएको छ। फिल्मको कथाको विषयमा बढेको विवादपछि अदालतमा मुद्दा दायर भएको थियो। मुद्दा दर्ता गर्नेले फिल्म रिलिज भएको खण्डमा यसले सामाजिक सौहार्दतामा गम्भीर असर पर्ने बताएका छन्।
फिल्म डिसेम्बर १ मा रिलिज गर्ने भनिएको थियो। तर विवाद बढेपछि निर्माण पक्षले रिलिज मिति सारेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
