अभिनेता भुवन केसीका छोरा अनमोल केसी नेपाली फिल्मका 'हटकेक' हुन्। फिल्मको ग्यापका कारण निर्माण चरणदेखि नै अनमोलको पारिश्रमिक र मेकिङका कारण चर्चामा रहेकाले 'कृ' प्रतीक्षित फिल्म बनेको छ। करिब २ वर्षको अन्तरालपछि उनी 'कर'बाट पर्दामा देखिँदै छन्।
उनलाई फिल्म साइन गराउन निर्माताहरूको लर्को नै लाग्ने गरेको छ। तर, अनमोल फिल्ममा निकै चुजी छन्। छनेर मात्र फिल्म खेल्ने भएकाले निर्माताहरू उनले मागेको र केही त अझ बढी रकम तिरेर फिल्म खेलाउन अग्रसर हुन्छन्।
यस्तैमा अनमोललाई फिल्म खेलाउन अभिनेत्री झरना थापाले ५० लाख रूपैयाँ प्रस्ताव गरेको हल्लाले आइतबार नेपाली फिल्म उद्योग तरंगित बन्यो।
केही मनोरञ्जन अनलाइनले सो खबरलाई प्रमुखताका साथ प्रकाशन गरे। यति मोटो रकम प्रस्ताव गरेकी भनिएकी निर्मात्री झरना थापालाई भने कसैले पनि समाचारमा 'कोट' गरेका थिएनन्। यसरी हल्ला पिटिएपछि अभिनेत्री थापाले सो हल्लाबारे फेसबुकमा एक पोस्ट लेख्दै खण्डन गरेकी छन्। उनले अनमोललाई सो रकम प्रस्ताव नगरिएको पनि स्पष्ट पारेकी छन्।
अभिनेत्री थापाले आफूलाई नसोधी समाचार लेखिएकोमा आपत्ति समेत प्रकट गर्दै फेसबुकमा यस्तो लेखेकी छिन्:
‘आज मात्र एउटा अनलाइनको समाचारमा मसँग जोडिएको समाचार पोस्ट भएछ! खबरको सार यस्तो छ- मैले कलाकारलाई ५० लाख रुपैयाँ दिएर सिनेमाको अफर गरेको...।
सम्पूर्ण दर्शकको साथ अनि मिडिया र चलचित्रकर्मी सहयोगमा मैले निर्देशन गरेको चलचित्र 'ए मेरो हजुर-२' सुपरहिट चलचित्रको लिस्टमा पुग्न सफल भयो । धेरै राम्रो व्यापार गर्यो! नेपाली चलचित्रको बजार सानो भएकाले धेरै लगानीमा चलचित्र बनाउनु आफैंमा धेरै जोखिम पनि छ! ५ प्रतिशत सिनेमाले मात्र मुनाफा कमाउँछन्। यस्तो अवस्थामा मैले एउटा कलाकारलाई ५० लाख अफर गर्नु त मेरो सोचभन्दा बाहिरको कुरा हो! एउटा कलाकारलाई ५०लाख पारिश्रमिक दिएर चलचित्र बनाउँदा चलचित्रको लागत कति पुग्ला? तपाईंहरु पनि यही क्षेत्रसँग जोडिनुभएको छ! मेरो फोन नम्बर धेरै रंग पत्रकारहरुसँग छ, कृपया यो समाचार लेख्नुअघि एक पटक मसँग तपाईंले किन सोध्नुभएन... यो गसिप हो कि समाचार हो? कपोलकल्पित कुरालाई समाचार बनाएर तपाईंहरुको समाचार त बिक्ला, तर हाम्रो चलचित्र उद्योगको लागि राम्रो मेसेज जाँदैन!‘
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।