बेलझुन्डी (दाङ)- आठौं राष्ट्रिय खेलकुद प्रतियोगिताअन्तर्गत दाङको बेलझुन्डी रंगशालामा भएको एथ्लेटिक्स प्रतिस्पर्धा नेपाली आर्मी क्लबले सशक्त प्रदर्शन गर्यो। आर्मीले २१ विधामा स्वर्ण जित्दा सशस्त्र प्रहरीले ८ स्वर्ण जित्न सफल भयो।
आठौंमा सहभागी ११ टिमले नै प्रतिस्पर्धा गरेको एथ्लेटिक्समा प्रदेश टिमको प्रदर्शन भने फिक्का रह्यो। प्रदेशका केही युवा खेलाडीले भने सम्झनलायक प्रदर्शन गर्न सफल भए। उनीहरुले विभागीय टिमका खेलाडीलाई टक्कर दिँदै आशा जगाए। सोमबार एथ्लेटिक्सको अन्तिम दिन विधाको रुपमा रहेको म्याराथनमा प्रदेशका २ किशोर खेलाडीले जोशिलो प्रदर्शन गरेका थिए। प्रदेश ३ का १७ वर्षीय देवबहादुर खड्का र प्रदेश २ की १९ वर्षीय लक्ष्मीकुमारी कुसवाहाले ४२ किलोमिटरको म्याराथन पहिलो पटक पूरा गरेर सबैको मन जिते।
तराई, त्यसमाथि गर्मी महिना अनि भर्खरको उमेर। यी अवरोध पार गर्दै ४२ किलोमिटरको दौड पूरा गर्दा दुवैलाई विभागीय टिमका प्रशिक्षक र खेलाडीले तालीले स्वागत गरेका थिए।
पुरुष म्याराथनमा १५ खेलाडीमा भाग लिएकोमा ११ जनाले दौड पूरा गरेका थिए। जसमा देवकुमार दशौं स्थानमा आए।
बेल्झुण्डी रंगशालाबाट सुरु गरिएको म्याराथन दौड हेमन्तापुर, बिजौरी, पर्सेनी, तुलसीपुर, दोघरे, दुधेना, अश्वरा, डाँडाचिस, कुमलगढी, मिरौली, बागर हुदै श्रीगाँउबाट पुनः सोही ट्रयाक हुँदै बेलझुण्डी रंगशालाको सेन्थेटिक ट्रयाकमा आइपुग्दा उनको साहसलाई सम्मान गर्दै तालीले स्वागत गरिएको थियो। मैदानमा रहेका आठौं राष्ट्रिय खेलकुद अनुगमन निर्देशक खड्गबहादुर रानाभाट ओलम्पियन हरिबहादुर रोकायालाई भन्दै थिए, 'ए हरि, तिमी जस्तै लम्म्रङ-लम्म्रङ कुद्ने केटो आइपुग्यो। अर्को हरि एथ्लेटिक्समा आइपुग्यो जस्तो छ।'
सिन्धुली, दुधौली नगरपालीका-११ का देवले पहिलो पटक म्याराथन दौड पूरा गरेका हुन्। त्यसो त उनले म्याराथनमा भाग लिएको यो पहिलो पटक हो। दुई महिनाअघि १३ किलोमिटर नुवाकोटको झिल्टुङ क्रस कन्ट्रीमा भाग लिएका उनी दशौं भएका थिए।
पहिलो पटक म्याराथनमा पूरा गर्दा उनले ३ घन्टा ५ मिनेट ४६ सेकेन्डमा दौड पूरा गरेका थिए। २१ किलोमिटरसम्म त उनी तेस्रो स्थानमा थिए। त्यसपछि उनी पछि परेका थिए। यो प्रदर्शन उनले सोचेको सोचेको जस्तो भने होइन।
'सिन्धुलीको उकालो आरोलोमा टायर पिठ्यूँमा बाँधेर तातो घाममा दौडिएर तयारी गरेको थिएँ,' उनले भने, 'तर सोचेको जस्तो टाइमिङ आएन।' उनले व्यावसायिक प्रशिक्षण गर्न पाएमा भविष्यमा राम्रो टाइमिङ निकाल्ने बताए।
सिन्धुलीबाट ५ किलोमिटरमा पहिलो हुँदै उनी प्रदेशको छनोटमा छानिएका थिए। प्रदेशमा पनि राम्रो नतिजा आएपछि उनलाई पहिलो पटक राष्ट्रिय प्रतियोगिता खेल्ने अवसर जुरेको हो।
महोत्तरी कान्तिबजारीकी लक्ष्मीकुमारी कुसवाहाको कथा पनि पनि देवको जस्तै छ। लक्ष्मी ६ खेलाडीले भाग लिएको महिला म्याराथनमा अन्तिम स्थानमा आइन्। तर उनको साहस भने तारिफयोग्य छ।
पहिलोपटक म्याराथनमा भाग लिएर पूरा गरेकी उनले ३ घन्टा ३० मिनेटमा निर्धारित दूरी पूरा गरिन्। अन्तिममा रहेकी उनलाई प्रशिक्षकहरु गाह्रो भएको अवस्थामा बीचैमा दौड त्याग्न समेत भनेका थिए। तर उनले मानिनन्। निरन्तर कुदिरहिन्। 'बीचमा गुरुले गाह्रो भए दौड छोड्नु भन्नुभएको थियो। तर आफ्नै गतिमा कुदिरहेको थिएँ। जसरी पनि दौड पूरा गरेर छाड्ने लक्ष्य थियो,' उनले भनिन्।
यसअघि उनले प्रदेशस्तरको २१ किलोमिटर दौड जितेकी थिइन्। राष्ट्रपति रनिङ शिल्डमा उनी जिल्ला र प्रदेशकी राम्रो खेलाडीमा पर्छिन्। उनी दौडन थालेको ३ वर्ष पुगेको छ। ११ कक्षामा अध्ययनरत उनले ८ कक्षा पढ्दा दौडका प्रतिस्पर्धामा भाग लिन थालेकी थिइन्।
आठौं राष्ट्रिय खेलकुद प्रतियोगितामा उनले ५ हजार मिटर र १० हजार मिटरमा पनि प्रतिस्पर्धा गरेकी थिइन्। १० हजार मिटर पूरा गरेकी उनले ५ हजार मिटर भने बीचमै त्यागेकी थिइन्। दौडने क्रममा पेट घोचेपछि उनी बीचैमा दौड छाड्न बाध्य भएकी थिइन्। त्यसो दुवै विधालाई उनले म्याराथानको तयारीको रुपमा लिएकी थिइन्। त्यही तयारी उनका लागि बरदान साबित हुँदा सोमबार पहिलो पटक म्याराथन पूरा गर्दै सबैको मन जित्न सफल भइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1763559424.jpg)
-1764080971.png)
