काठमाडौं- नेपाल कम्युनिस्ट पार्टी (नेकपा) ले ७७ वटै जिल्लाका अध्यक्ष र सचिवको टुंगो लगाएसँगै आज (साेमबार) एकता घाेषणा कार्यक्रम हुँदैछ। काठमाडाैंस्थित प्रज्ञा भवन कमलादीमा हुने कार्यक्रम मध्याह्न १२ बजेका लागि तय गरिएकाे छ।
आइतबार साँझ प्रधानमन्त्री निवास बालुवाटारमा बसेको बैठकले ७७ जिल्लाकै जिल्ला कमिटी अध्यक्ष र सचिवको टुंगो लगाएको हो। साेअघि आइतबार बिहान नेकपाका शीर्ष चार नेताले गरेको गृहकार्यपछि साँझ सचिवालय बैठक बसेको थियो।
नेकपा प्रवक्ता नारायणकाजी श्रेष्ठका अनुसार हालसमम्म ७७ वटै जिल्लाको नेतृत्वको टुंगो लागेको छ। सचिवालय बैठकले जिल्ला अध्यक्ष र सचिवको नाम टुङ्गो लगाएको भए पनि जनवर्गीय संगठनको नेतृत्व र पोलिटब्युरो सदस्यको नामवली भने टुंगिन बाँकी रहेको उनले जानकारी दिए।
‘केही दिनभित्रमा नै पोलिटब्युरोको गठन गरी सबै केन्द्रीय समितिका सदस्यहरूको कार्यविभाजन हुनेछ,’ आइतबार साँझ बैठकबाट बाहिरिने क्रममा प्रवक्ता श्रेष्ठले भने।
जिल्लाकाे नेतृत्व चयन गर्दा बैठकले यसअघि तत्कालिन नेकपा (एमाले)का जिल्ला अध्यक्ष हालकाे अध्यक्ष वा सचिवकाे जिम्मेवारीमा रहनेगरी पद विभाजन गरिएकाे छ।
पार्टी अध्यक्षद्वय केपी शर्मा ओली र पुष्पकमल दाहाल 'प्रचण्ड'ले एकताका विषयमा सहमति गरेपनि वरिष्ठ नेता माधवकुमार नेपाल भने सन्तुष्ट थिएनन्। आफूलाई एक्ल्याउन खाेजिएकाे भन्दै नेता नेपालले असन्तुष्टि राखेपछि गएकाे ४ दिनदेखि तीनै जना नेताहरु बीच छलफल चलेकाे थियाे। अन्ततः नेपालकै मतमा पार्टीका दुबै अध्यक्ष उभिएपछि जिल्लातर्फकाे एकता प्रकृयाले पनि मुर्तरुप पाएकाे हाे।
आइतबारकै बैठकले कम्युनिष्ट पार्टी स्थापना दिवसको अवसरमा आजका लागि प्रज्ञाभवनमा विशेष कार्यक्रमको आयोजना गरिने निर्णय गरेको थियाे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
