जनकपुर- बारा र पर्सामा विनाशकारी चक्रवात(टोर्नाडो)मा परी ज्यान गुमाएका परिवारलाई प्रदेश सरकारले शुक्रबार आर्थिक सहयोग गरेको छ।
मुख्यमन्त्री लालबाबुु राउतले प्रत्येक मृतकका परिवारलाई ३ लाख २५ हजार रुपैयाँका दरले चेक हस्तान्तरण गरेका हुन्। बाराको कलैयामा आयोजित टोर्नाडो प्रभावित मृतक परिवारलाई एक कार्यक्रमका बीच साे बराबरकाे रकम हस्तान्तरण गरेका हुन्।
साे हावाहुरीका कारण ज्यान गुमाएकाकाे परिवारलाई तीन/तीन लाख रुपैयाँ राहतस्वरुप दिने निर्णय प्रदेश सरकारले गरेको थियो। प्रदेश सरकारले मृतक परिवारलाई क्रिया खर्चवापत थप २५/२५ हजार रुपैयाँ उपलब्ध गराएको छ।
मृतक परिवारलाई राहत राशीवापतको चेक हस्तान्तरण गर्दै मुख्यमन्त्री राउतले प्रदेश सरकार पीडित परिवारको साथमा रहेको बताए। विनाशकारी हावाहुरी गएको १२ घण्टा नबित्दै आफूहरुले राहतस्वरुप मृतकका परिवारलाई ३/३ लाख रुपैयाँ उपलब्ध गराउने निर्णय गरेको उनकाे भनाइ थियाे।
भोलिपल्टै आफूसहित प्रदेश सरकारको मन्त्रीमण्डल नै प्रभावित क्षेत्रमा पुुगेर घाइतेहरुलाई भेटघाट गरेको उनले स्मरण गरे। मुख्यमन्त्री राउतले घाइतेको उपचारमा कुनै कमी हुन नदिन सम्बन्धित अस्पतालका प्रशासनलाई निर्देशन दिइएको उल्लेख गरे।
'हावाहुरी प्रभावितको घर बनाउन प्रदेश सरकार तयार छ', उनले भने, ‘तर, संघीय सरकार नेपाली सेनाको सहयोगमा घर बनाउन लागेको छ।’ नेपाली सेनाले घर बनाएपनि प्रदेश सरकार सहयोगको लागि तयार रहेको मुख्यमन्त्री राउतले स्पष्ट पारे।
वर्षायाम भन्दा अगावै प्रभावितको घर निर्माण गर्ने कार्य चुनौतीपूूर्ण रहेकोले संघीय सरकारले नेपाली सेनामार्फत पुनर्निर्माणको काम गर्न लागेको उनकाे भनाइ थियाे।
कार्यक्रममा भौतिक पुर्वाधार विकास मन्त्री जीतेन्द्र सोनलले हावाहुरी प्रभावितको सहयोगमा प्रदेश सरकारले आफ्नो जिम्मेवारी निर्वाह गरेको दाबी गरे। आफ्नाे जिम्मेवारीबाट पछि नपर्ने स्पष्ट पार्दै मन्त्री सोनलले राष्ट्रिय शोक घोषणा नगर्ने संघीय सरकारको कार्यशैलीप्रति आपत्ति जनाए। संघीय सरकारको उक्त निर्णयमा प्रदेश सरकारको विमति रहेको उनले स्पष्ट पारे।
कार्यक्रममा कागजात पुुर्याएका ८ जना मृतक परिवारलाई राहतवापतकाे चेक हस्तान्तरण गरिएको थियो।
राहतवापतकाे रकम लिन मृत्युदर्ताको प्रमाणपत्र, नाता प्रमाणितको प्रमाणपत्र, हावाहुरीमा परी ज्यान गुमाएको प्रमाणित हुने प्रमाणपत्र, रकम लिने नातेदारको नागरिकताको प्रतिलिपि र मृतकको नागरिकताको प्रमाणपत्रको प्रतिलिपि मुख्यमन्त्री तथा मन्त्रिपरिषदको कार्यालयलाई उपलब्ध गराउनुपर्नेछ।
कागजात नपुुगेका पीडित परिवारले कागजात लिएर आएमा रकम उपलब्ध गराउने मुख्यमन्त्री तथा मन्त्रिपरिषद्को कार्यालयले जनाएकाे छ।
जिल्ला समन्वय समिति बाराका सभापति नवल किशोर सिंहको अध्यक्षतामा भएको कार्यक्रममा अमेरिकास्थित मधेशी नेपालीहरुको संगठन 'एन्टा'का अध्यक्ष विजय कुमार सिंहले प्रत्येक मृतकका परिवारलाई ५०/५० हजार रुपैयाँ नगद हस्तान्तरण गरे।
शुक्रबार मन्जुर आलम मियाँ, रामबाबुु, मो रसुल मियाँ अन्सारी, लालवचन प्रसाद, फजुल हक मियाँ, फिरोज मियाँ अन्सारीको परिवारलाई चेक हस्तान्तरण गरिएको हाे।
गएको चैत १७ गते विनाशकारी चक्रवातमा परी बारा र पर्सामा २८ जनाको मृत्यु भएकाे थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।