ओटावा- क्यानडियन उच्च हिमाली क्षेत्रमा गएको हिमपहिरोमा परेका ३ जना पर्वतारोहीको मृत्यु भएको अनुमान गरिएको छ। बिहीबारदेखि हराइरहेकामा एक पर्वतारोही नेपाली मुलका रहेको खुलेको छ।
उनीहरु 'हाउस पिक'को उचाई नाप्नका लागि गएको भएपनि समयसीमा भित्र सो कार्य गर्न विफल भएका थिए।
क्यानडाली राज्य अलब्रेटास्थित बान्फ राष्ट्रिय निकुञ्जमा पर्ने 'हाउस पिक'को उचाई ३ हजार २ सय ९५ मिटर रहेको छ।
राष्ट्रिय निकुञ्जका कर्मचारीहरुले हवाई माध्यमबाट उनीहरुले यात्रा तय गरेको हिमालको अवलोकन गर्दा पर्वतारोहणमा प्रयोग गरिने उपकरणहरु हिमपहिरोले जम्मा गरेको 'डेब्रिस'मा देखेका बताइएको छ।
सो क्षेत्रको अवस्था खतरामुक्त नभइसकेको तथा थप हिमपहिरो जानसक्ने भएका कारण पनि उद्धारका लागि तत्काल जानसक्ने अवस्था नरहेको क्यानडाली अधिकारीहरुले बताएका छन्। उनीहरुका अनुसार आगामी केही दिनसम्म सो क्षेत्रको मौसम प्रतिकुल नै रहने सम्भावना रहेकाले उद्धार प्रभावित हुनेछ।
बायाँबाट क्रमशः और, लामा र रोस्केल्ली।
पर्वतारोहणका समाग्री बनाउने कम्पनी 'द नर्थ फेस'का अनुसार नेपाली मुलका डेभिड लामा, अस्ट्रियाका ह्यान्सजोर्ग और र अमेरिकाका जेस रोस्केल्ली हराइरहेका हुन्।
उनीहरुको यस यात्रालाई प्रायोजन गरेको उक्त कम्पनीले एक विज्ञप्ति जारी गर्दै भनेको छ, 'उनीहरुले यो सबै आफ्ना परिवार, साथीभाइ तथा पर्वतारोहणसँग सम्बन्धित समुदायका लागि गरिरहेका थिए।'
हाउस पिकको पूर्वतर्फबाट नापजाँच गर्ने बेला उनीहरु बेपत्ता भएको बताइएको छ। हाउस पिकलाई क्यानडामा दुर्गम तथा मिस्रित चट्टान तथा हिउँको संरचना भएको अतिनै जटिल क्षेत्रका रुपमा लिइन्छ। जसको आरोहणका लागि विशिष्ट किसिमको अरोहणसम्बन्धी ज्ञान तथा अनुभवको आवश्यक पर्ने बताइन्छ।
'पर्वतारोहीहरुले आरोहण गरिरहेको मार्ग सायद यसअघि नै चर्किसकेको थियो', सुरक्षाविद् स्टिभ होलेस्जीले अनुमान गरे। हिमपहिरो क्षेत्रको अवलोकनपछि पत्रकार सम्मेलन गर्दै उनले भने, 'हिमपहिरो एक भवनलाई नष्ट गर्न मात्रै पनि निकै प्रभावशाली रहनसक्छ।'
को-को थिए पर्वतारोही?
२८ वर्षीय नेपाली मुलका लामा पर्वतारोही समुदायकै व्यक्ति हुन्। उनका बाबुसँग लामो समय पर्वतारोहणको अनुभव रहेको बताइएको छ। उनी नेपालका 'माउन्टेन गाइड' थिए। यसकारण पनि लामा छोटो समयमै यस विधामा निपूर्ण भएको बताइन्छ।
युवा उमेरमै उनले पर्वतारोहणका विभिन्न प्रतियोगिता जित्न सफल भएका थिए। सन् २०१४ मा रिलिज भएको एक फिल्मको सुटिङका क्रममा उनी अमेरिकाको पाटागोनियास्थित 'केरो टोरी' हिमालमा पहिलो पटक विनाकुनै साधन आरोहण गर्न सफल भएका थिए।
उनी हाल अस्ट्रियाका नागरिक हुन्। सन् २००६ सम्म उनी पर्वतारोहण प्रतियोगिताहरुमा फोटोग्राफरको भूमिकामा देखिन्थे।
अमेरिकाको वासिंग्टनका ३६ वर्षीय जेस रोस्केल्लीले २० वर्षको उमेरमै सगरमाथाको उचाई नाप्ने दलमा रहेर काम गरिसकेका थिए।
उनी सबैभन्दा कम उमेरमा सगरमाथाको सफल आरोहण गर्ने अमेरिकी पर्वतारोही हुन्। चर्चित पर्वतारोही जाेहन रोस्केल्लीका छोरा रोस्केल्लीले सन् २००३ मा सगरमाथाको सफल आरोहण गरेका थिए।
आरोहणका क्रममा और र लामा।
हराइरहेकामध्ये एक ह्यान्सजोर्ग और ३५ वर्षका हुन्। उनी अस्ट्रियाको डोलोमाइट हिमाली क्षेत्रमा किसान परिवारमा हुर्किएका व्यक्ति हुन्।
उनले हालसम्म पाकिस्तानको काराकोरम हिमशृंखलाअन्तर्गत कुन्यांग छिस र नेपालको निलगीरि हिमालको सफल आरोहण गरिसकेका छन्।
पूर्व पर्वतारोही तथा विश्वभरका पर्वतारोहणसँग गाँसिएका व्यक्ति तथा समुदायले यस घटनालाई लिएर दुःख व्यक्त गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
