साेल– उत्तर कोरियाली नेता किम जोङ उनले अर्को साता रुसी राष्ट्रपति भ्लादिमिर पुटिनसँग पूर्वी रुसमा भेटवार्ता गर्ने सम्भावना रहेको अधिकारीहरुले बताएका छन्।
चीनमा आयोजना हुने एक अन्तर्राष्ट्रिय सम्मेलनमा भाग लिने क्रममा रुसको पूर्वी क्षेत्रको भ्रमणमा आउन लागेका रुसी राष्ट्रपति पुटिनसँग किमले भेटवार्ता गर्ने सम्भावना रहेकाे बताइएकाे हाे।
स्रोतले योनहापलाई भनेको छ, 'रुसी राष्ट्रपति पुटिन अप्रिल २४ मा रुसको पूर्वी क्षेत्रको भ्रमणमा आउँदै हुनुहुन्छ। त्यही समयमा दुबै नेताबीच रुसमै भेटवार्ता हुने सम्भावना छ।'
राष्ट्रपति पुटिन आगामी अप्रिल २६–२७ मा बेइजिङमा आयोजना हुने 'वान बेल्ट, वान रोड' अर्थात् बिआरआईको सम्मेलनमा सहभागी हुनेछन्।
मस्कोले कोरियाली नेतासँगको भेटवार्ताका बारेमा केही बताएको छैन, तर रुसको सरकारी समाचार संस्था तासले मार्चमा प्रकाशन गरेको एक समाचारमा क्रेमलिनका प्रवक्तालाई उद्धृत गर्दै मस्को र प्योङयाङबीच किमको भ्रमणका विषयमा छलफल भइरहेको जनाएको थियो। ती प्रवक्ताले जतिसक्दो चाँडो किमसँगको भेटवार्ताका बारेमा निर्णय लिइने बताएका थिए।
दुबै देशका नेताबीचको भेटवार्ताकै सन्दर्भमा दुबै देशका वरिष्ट कुटनीतिक अधिकारीहरुको भेटघाट पछिल्ला दिनमा बाक्लिएको छ।
किमका अति निकट ठानिएका किम चाङ सोनले गत मार्च १९ देखि २५ सम्म मस्को र भ्लाडिभोस्टकको भ्रमण गरेका थिए। नेता किमको विदेश भ्रमणका सन्दर्भमा सम्पूर्ण तयारीको जिम्मेवारी किम चाङले हेर्ने गरेका छन्।
यसै महिनाको सुरुमा रुसी गृहमन्त्री भ्लादिमिर कोलोकोच्सेभले प्योङयाङको भ्रमण गरेका थिए। पुटिनले गत वर्ष मे महिनामै नेता किमलाई रुस भ्रमणको निम्ताे दिएपनि तर भ्रमण हुन सकेको थिएन।
उत्तर कोरियाले नेता किम र अमेरिकी राष्ट्रपति डोनाल्ड ट्रम्पबीच गत फेब्रुअरीको भियतनामको हनोईमा सम्पन्न वार्ता विफल भएसँगै रुससँगको सम्बन्ध विस्तारमा विशेष ध्यान दिएको छ।
नेता किमले गत वर्षयता नै चीनको ४ पटक भ्रमण गरिसकेका छन्। तर, सन् २०११ मा सत्तामा आएपछि नेता किमले रुसको भ्रमण गरेका छैनन्। रासस/योनहाप
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।