(तस्बिर- प्रधानमन्त्रीकाे निजी सचिवालय)
काठमाडौं- प्रधानमन्त्री केपी शर्मा ओलीले सगरमाथाको उचाई नाप्न जान लागेको कर्मचारीको टोलीलाई आज बिदाइ गरेका छन्।
सगरमाथातर्फ जान लागेकाे भूमि व्यवस्था तथा सहकारी मन्त्रालयका ४ जना कर्मचारीको टोलीलाई प्रधानमन्त्री ओलीले बिदाइ गरेका हुन्। टोलीमा प्रमुख नापी अधिकृत खिमलाल गौतम, नापी अधिकृत रविन कार्की, सर्भेक्षक सुरजसिंह भण्डारी र अमिन युवराज धिताल छन्। त्यसैगरी गाइड टोलीमा छिरिङ जाङ्बु शेर्पा र पेमाङिमा शेर्पा रहेका छन्।
उनीहरु सबै जना आरोहणका लागि आवश्यक सबै तालिम लिएर त्यसतर्फ जान लागेका हुन्। टोलीले करिब एक महिनामा सगरमाथाको उचाई नापेर फर्कने योजना बनाएकाे छ।
प्रधानमन्त्री निवास बालुवाटारमा बुधबार बिहान आयोजित शुभकामना तथा बिदाइ कार्यक्रममा प्रधानमन्त्री ओलीले नेपालको तर्फबाट पहिलो पटक सगरमाथाको उचाई नाप्न लागिएकाले यस टोलीको प्रतिवदेन आधिकारिक हुने बताए। प्रधानमन्त्री ओलीले भूकम्पले सगरमाथाको उचाई घटेको भन्ने भनाई आफूलाई भरपर्दो नलागेको धारणा राखे।
चीनले गरेको पछिल्लो अध्ययन प्रतिवेदनमा सगरमाथाको उचाई घटेर ८ हजार ८ सय ४४ मिटर पुगेको भन्ने तथ्य बाहिर आएको थियो। त्यसलाई भरपर्दो मान्न नसकिने प्रधानमन्त्री ओलीको भनाई छ।
'नेपाल सरकारको तर्फबाट पहिलो पटक सगरमाथाको उचाई मापन हुँदैछ। तपाईंहरुले सेन्टिमिटरसहितको उचाई नापेर ल्याउनु होला', प्रधानमन्त्री ओलीले भने, 'तपाईंहरुले ल्याएको नाप नै सगरमाथाको आधिकारिक उचाई हुनेछ।'
प्रधानमन्त्री ओलीले टोलीलाई लक्ष्य हासिल गर्नका लागि शुभकामना दिए। तर, मौसम र स्वास्थ्यलाई भने ख्याल गर्न प्रधानमन्त्रीले सुझाए। 'लक्ष्यमा अडिग रहनुहोस्, तर स्वास्थ्यले साथ दिएन वा मौसम प्रतिकुल भयो भने जिद्धी नगर्नुहोस्। सगरमाथा त्यहीं हुन्छ। अर्को पटक गएर नापेर आए हुन्छ', प्रधानमन्त्री ओलीले भने, 'गाइडको निर्देशन पालना गर्नुहोला।'
सरकारको तर्फबाट सगरमाथाको उचाई मापन कार्य ऐतिहासिक भएको प्रधानमन्त्री ओलीको भनाइ छ।
कार्यक्रममा बोल्दै भूमि व्यवस्था, सहकारी तथा गरिवी निवारण मन्त्री पद्मा अर्यालले आफ्नै कर्मचारीहरुलाई दक्ष बनाएर सगरमाथाको तथ्यपरक उचाई मापन गर्न पठाउन लागिएको जानकारी दिइन्। उनले सावधानीपूर्वक सो जिम्मेवारी पूरा गर्न पनि सरकारी टोलीलाई शुभकामना दिइन्।
विश्वको सर्वोच्च शिखर सगरमाथाको उचाई पहिलो पटक सन् १८४९ मा भारतले मापन गरेको थियो। त्यसपछि सन् १९५४ र सन् २००५ मा सगरमाथाको उचाई मापन गरिए पनि नेपालले भने पहिलो पटक त्यसको उचाई मापनका लागि सरकारी टोलीलाई पठाएको हो।
विसं २०७२ सालमा गएको विनाशकारी भूकम्पले सगरमाथाको उचाई घटाएको विभिन्न अड्कालबाजी भइरहेका बेला सरकारले त्यसको तथ्यबोध गराउन मापनका लागि आफ्नै कर्मचारी परिचालन गरेको हो।
सोही कार्यक्रममा मन्त्रालयका तर्फबाट प्रादेशिक विभाजन अनुसारको नेपालको प्रशासनिक नक्सा पनि प्रधानमन्त्री ओलीलाई हस्तान्तरण गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768981471.jpg)
-1764146706.png)
