काठमाडौं- फिल्म रिलिजको मिति जति नजिकिँदैछ, नवअभिनेत्री सुहाना थापाको मुटुको धड्कन त्यति नै तेज चल्दैछ। किनभने अरु नवअभिनेत्री जस्तै उनका कमजोरी नजरअन्दाज गरिने छैनन्। चर्चित हिरोइन झरना थापा र सफल फिल्म निर्माता सुनिलकुमार थापाकी छोरी हुनुको घाटा यहीबेला महसुस गर्दैछिन्।
आमाकै निर्देशनमा बनेको फिल्ममा चर्चित अभिनेता अनमोल केसीसँग जोडी बाँध्दा आइलाग्ने जोखिमहरु छँदैछन्। त्यसैमाथि पिताले निर्माण गरेकाले नभइ आफू उपयुक्त भएकाले फिल्ममा अभिनय गरेको प्रमाणित गर्नुपर्नेछ।
ट्रेलर सार्वजनिक भएपछि आएका प्रतिक्रियाले उनको डर केही दूर चाहिँ गरेको रहेछ। भनिन्, 'यी प्रतिक्रिया हेर्दा मामुबाबाले देखाएको ट्रयाकलाई अघि बढाउन सक्छु जस्तो लाग्छ। तरपनि भविष्य कस्तो हुन्छ भनेर कसैलाई पनि थाहा हुँदैन। त्यसैले शुक्रबारको ब्यग्र पर्खाइमा छु।’
एकाएक आमा झरनाले सुनाएको त्यो फैसला
अमेरिकामा बसेर साइकोलोजीमा ग्य्राजुएट गरिरहेकी सुहानाले योजनाबद्ध तरिकाले आमाको पथ पछ्याएको होइनन्। अध्ययन, कलेज, स्वयंसेवामा उनी सक्रिय थिइन्। साइको थेरापिष्ट बन्ने ध्येयमा लागिरहेकी सुहानाको जीवनमा आमाको एक फोनले एकाएक ‘युटर्न’ आयो।
'ब्रेक फास्टको तयारीमा थिएँ, हरेक बिहानझै त्यो बिहान पनि नेपालबाट मामुले फोन गर्नुभयो। तर त्यो दिन उहाँको आवाजमा केही फरक महसुस गरें। उहाँले ढिलो नगरी भन्नुभयो फिल्म 'ए मेरो हजूर –३’ का लागि अनमोल केसी नायक छानिएका छन्। तिमीले नायिका भएर त्यसमा काम गर्नुपर्छ,'' सुहानाले सम्झिइन्।
झरनाले सुहानाको प्रतिक्रिया सुनिनन्। फोन राखिदिइन्। उनको दिमाग शून्य भयो। केही सोच्न सकिनन्। हातमा लिएको कफि सेलायो। आफ्नी ‘रुममेट’लाई बताइन्। उनले चिच्याउँदै बधाइ दिइन्। तर सुहानाको दिमागमा भने यस्ता कुरा खेल्दै थिए, 'फिल्ममा कसरी अभिनय गर्ने ? अनमोलजस्तो स्थापित कालाकारसँगको स्क्रिनसेयरलाई कसरी अर्थपूर्ण बनाउने ? अनि मामुले प्राप्त गरेको लोकप्रियतामा आफ्नो उपस्थिति कसरी सार्थक बनाउने?'
कुनै समयकी चर्चित अभिनेत्री झरना थापा अहिले निर्देशनतर्फ छिन्। उनीद्वारा निर्देशित ‘ए मेरो हजुर–३’ शुक्रबार रिलिज हुनेछ।
चर्चित हिरोइनकी छोरी समेत भएका कारण यतिबेला नेपाली फिल्मबजारमा सुहानाको चर्चा अत्याधिक छ।
आफूले गरेका काम सफल बनुन् भन्ने कामना गर्नु स्वाभाविक हो। सुहाना कत्तिको आशावादी छिन् त? सुहानाको जफाव छ, ‘के हुन्छ थाहा छैन। मामुबाबाले अभिनयको 'ट्रयाक' त खोलिदिनु भयो। यसलाई मैले राजमार्ग बनाउनुछ।'
आफूले सक्दो प्रयास गरेको उनी बताउँछिन्। भन्छिन्, ‘परीक्षामा कुनै बिषयमाथि वर्णन गर्न भनिएको प्रश्नमा आफूले मेहनत गरेर लेखिन्छ। कति नम्बर दिने परीक्षकमा भर पर्छ।'
फिल्ममा परीक्षा दिएकी छिन्। दर्शक परीक्षकको भूमिकामा छन्। शुक्रबार उनको यो परीक्षाको नतिजा आउँदैछ। यही क्रममा उनले भागवत गीतामा उल्लेख भएको एउटा स्लोक सम्झियन्, 'कर्म गर तर फलको आश नगर।' त्यसबाट उनी प्रभावित रहिछन्।
'काम गर्दै जाने हो, भविष्य कसलाई के थाहा ?' उनले भनिन्।
कुराकानीको भिडियो अंश
अभिनयमा नसा
सफल साइकोथेरापिस्ट बन्ने योजना बुनिरहेकी सुहाना अब नायिकाका रुपमा चिनिएकी छन्। पछिल्लो समयको काम, कार्य व्यस्तता अनि दर्शकहरुको मायाले उनको भविष्यका योजना मात्र फेरिएन, अभिनयको नसा नै लागेको सुनाउँछिन् उनी, ‘मलाई यो उद्योग एकदमै मन पर्यो। अहिले जति माया पाइरहकी छु। यही क्षेत्रमा लागौं जस्तो लागेको छ।’
डेब्यु अभिनयबाट कोही कलाकार एकाएक स्टार हुने कोही गुमनाम हुने प्रशंगसँग डराउँदै थप्छिन्, ‘यो उद्योगमा आएपछि मान्छेहरुले भनेको सुनेको थिएँ– छोड्नै सकिँदैन। नसा लाग्छ। अहिले बल्ल बुझ्दैछु।’
आमा झरनाको ब्यस्त जीवनशैलीबाट कुनै समय दिक्क हुन्थिन् सुहाना। अहिले आमाकै पथमा पाइला चाल्दैछिन्।
फिल्म अघिको ब्यस्तता र त्यसपछि के गर्ने भन्ने चिन्ताले पनि सुहानालाई सताएको रहेछ। सुनाउँछिन्, ‘फिल्म प्रदर्शनको समय एउटा कलाकार यति ब्यस्त हुन्छ। अनि फिल्म प्रदर्शन पछि भने के गर्ने भन्ने कुराचाहिँ सोच्नै पर्ने रहेछ। तर, म चाहिँ के गर्ने भन्ने अलमलमै छु। यहीँ फिल्ममै रमाउने कि पहिलेकै काममा फर्किने?’
फिल्म क्षेत्रप्रती मोह एकातिर अमेरिकाको साइकोलोजीको अध्ययन अर्कातिर सुहानालाई छनौटको पनि चुनौति छ। उनी आफू दोधारमा रहेपनि परिवार भने स्पष्ट रहेछ।
उनलाई अमेरिकामा चलिरहको अध्ययन सकेर पुनः नेपालमै फर्केर फिल्म क्षेत्रमा काम गर्न सुझाइएको रहेछ।
सुहानाको कुराबाट यस्तै बुझिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
