चिप्लेढुङ्गा(पाेखरा)- पाेखरामा पाेखरासँगै जाेडिएकाे गीत ‘मबिना कसै–कसैलाई मुस्किल छ पोखरामा’ गुन्जियाे। शुक्रबार सभागृहको स्टेजमा पछिल्लो पुस्ताका लोकप्रिय गायक प्रमोद खरेल उत्रिएका थिए। नेपाली संगीत क्षेत्रमा स्थापित बनाएकाे साेही गीत गाउँदा गायक खरेललाइई संगीत पारखीहरुले बेजोड ताली र ‘हुटिङ’ गर्दै साथ दिए।
गायनका क्रममा खरेलले गीतका सर्जक पाेखराकै शीतल गिरीलाई पनि स्टेजमा बोलाए। भने, ‘शीतल पनि चिनिनु पर्छ, आउनुहाेस् स्टेजमा।’
गीतसंगीत प्रस्तुत गरिरहँदा जति धेरै आवाज र ताली सुनिन्छ, गायकलाई उतिनै ऊर्जा मिल्छ। आयोजकलाई पनि उत्साहित बनाउँछ। शुक्रबार सभागृहकाे वातावरण त्यस्तै थियो।
गायनका क्रममा खरेल एकाएक केही भावुक भए। उनले निकै भावपूर्ण तरिकाबाट दिवङ्गत संस्कृति, पर्यटन तथा नागरिक उड्डयनमन्त्री रवीन्द्र अधिकारीको नाम उच्चारण गरे। पोखरा मन्त्री अधिकारीकाे गृहनगर। गायक खरेलले उनै दिवङ्गत मन्त्री अधिकारीलाई समर्पित गर्दै गीत गाए- 'याद गर्न पनि त, कोही न कोही त चाहिँदोरहेछ'।
दर्शकदीर्घामा रहेकाहरु झनै भावुक बने। जब सभागृहका भित्तामा टाँगिएकाे इलेक्ट्रोनिक पर्दामा मन्त्री अधिकारीका मुस्कानसहितका तस्बिरहरु देखिए, धेरैकाे मन थामिएन। गीतसँगै टोलाइरहेका थिए उनका समकालीन राजनीतिज्ञ नेकपा स्थायी कमिटी सदस्य एवम् प्रतिनिधिसभा सदस्य योगेश भट्टराई। जो साेही कार्यक्रमका लागि पोखरा आइपुगेका थिए।
'यो गीतले राजनीतिको धेरै मोडहरुमा सँगसँगै हिँडेको, एकापसमा दुःख–सुख बाँडेका धेरै पलहरुलाई मानसपटलमा ल्याइदियो', भट्टराईले सम्झिए, 'आखिर सम्झना सम्झनानै हो।'
सँगै थिए अधिकारीका सहपाठी दिलीप श्रेष्ठ। 'रविन्द्र हामीमाझ छैनन्, बिस्तारै पीडा भुल्दै आँखा ओभाउँदै थिए, यो गीत र स्क्रिनमा देखिएको उनको तस्बिरले आज फेरि अनायासै आँखा रसायो', श्रेष्ठले भने, 'धेरै चोटि उनलाई सम्झेर रोएको छु, उनलाई गुमाएको डेढ महिना हुनलाग्यो। प्रमोदको गीतले उनको याद आयाे, फेरि रुवायो।'
बार्दली मिडिया प्रालिले आयोजना गरेको ‘पोखरामा प्रमोद खरेल’ कार्यक्रममा खरेलले आफ्ना लोकप्रिय गीतहरु गाएर दर्शकलाई मनोरञ्जन दिएका थिए। गायनमा उनलाई गायिका मीना निरौलाले साथ दिएकी थिइन्। चर्चित हास्यव्यङ्ग्य कलाकार मनोज गजुरेलको प्रस्तुतिबाट पनि दर्शकले साङ्गीतिक कार्यक्रममा फरक स्वाद लिन पाए।
सडक बालबालिकाको सहयोगार्थ आयोजित यस साङ्गीतिक कार्यक्रम भव्यरूपमा सफल भएको बार्दलीका प्रबन्ध निर्देशक मन क्षेत्रीले जानकारी दिए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
