काठमाडौं- विवाहको वर्षगाँठ मनाउनेले अक्सर परिवार र आफन्तमाझ खुसियाली साट्छन् । चर्चित हास्य अभिनेता मदनकृष्ण श्रेष्ठले भने सीमित घेरा बढाउँदै यो अवसरलाई आफ्ना दर्शक, श्रोता र पाठकलाई साक्षी राख्दै मनाए, त्यो पनि सिर्जनात्मक रुपमा।
मंगलबार इन्द्रजात्राको दिन विवाहको ४४औं वर्षगाँठको अवसरमा पत्नी यशोदासहित होटल याक एन्ड यतीमा उपस्थित उनले आत्मकथाको पुस्तक 'महको म' सार्वजनिक गरे । पुस्तकको लोकार्पण महको ह अर्थात् हरिवंश आचार्यले गरे।
लोकार्पणपछि आचार्यले कुनै समय आफूले एउटा सुरिलो रुखको आत्मकथा पढेको सन्दर्भ जोड्दै ओजपूर्ण जीवन बाँचेका मदनकृष्णको आत्मकथा आउनु महत्त्वपूर्ण भएको बताए ।
'दाइको आत्मकथा संसारले पढ्ने खालको छ भन्नेमा म ढुक्क छु’, उनले भने।
पुस्तकमाथि टिप्पणी गर्दै साहित्यकार रवीन्द्र समीरले आत्मप्रशंसा, आत्मश्लाघाबाट पूर्णतया मुक्त रहेको भन्दै पुस्तकलाई शास्त्रीय आत्मकथाको संज्ञा दिए।
उनले थपे, ‘महको म पढ्दा कहिले एक्लै हाँसो लाग्छ, कहिले गम्भीर बनाउँछ, कहिले घोत्लिन बाध्य गराउँछ त कहिले लेखकप्रति अगाध श्रद्धा उत्पन्न हुन्छ । प्रेम, अन्तरजातीय विवाह, यसोदा भाउजूको क्यान्सर सङ्घर्ष, लेखकको पार्किन्सनका कारण चिप्स र ब्याट्रीले चलेको जीवन आदि पढ्दा मुटु ढक्क फुलेर आउँछ।’
कार्यक्रममा श्रेष्ठले लेखेका गीतहरु उनका छोरा यमन र छोरी सराना श्रेष्ठले गाएका थिए । श्रेष्ठ आफैंले पनि आफ्ना केही गीत सुनाएका थिए ।
फाइनप्रिन्टले छापेको पुस्तकको हार्डकभर मूल्य ८७६ रुपैयाँ छ भने पेपरब्याक मूल्य ५७६ रुपैयाँ राखिएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764421784.jpg)
-1764421490.jpeg)
-1764416325.jpg)
-1764146706.png)
-1763721444.png)
-1763559424.jpg)
-1764080971.png)
