भैरहवा- नेपाल कम्युनिस्ट पार्टी (नेकपा) स्थायी समिति सदस्य तथा सांसद घनश्याम भुसालले एउटै व्यक्तिले पार्टी र सरकार चलाएका कारण पार्टी एकीकरणमा ढिलाइ भएको बताएका छन्। बिहीबार लुम्बिनी प्रेस क्लब भैरहवाले आयोजना गरेका पत्रकार भेटघाट कार्यक्रममा उनले भने, 'पार्टी एकता नहुनुमा हाम्रा आफ्नै कारण छन्, यसमा हाम्रो नलायकी हो।'
उनले पार्टी एकताका लागि व्यक्ति केन्द्रित र समाजवाद उन्मुख दुई वटा समाधान रहेको बताए। यसैकारण पनि एकतामा ढिलाइ भइरहेको उनको दाबी थियो।
एकता प्रक्रिया टुंगो नलाग्दा विकासले गति लिन नसकेको उनको धारणा छ। नेता भुसालले भने, 'पार्टी एकता प्रक्रिया १० महिनामा पनि नटुंगिनु राम्रो होइन, तर अब ४/६ महिनामा यसले पूर्णता पाउँछ भन्नेमा विश्वस्त छु।'
पार्टीलाई अँध्यारोमा राखेर गरिने सम्झौता खतरनाक
सिके राउतसँग भएको सम्झौता सकारात्मक भए पनि प्रक्रियागत रुपमा गलत भएको उनले टिप्पणी गरेका छन्। 'सिके राउतलाई लोकतान्त्रिक गणतन्त्रको मूल प्रवाहमा ल्याउने सम्झौता र स्टेटमेन्ट सकारात्मक भए पनि पार्टीभित्र छलफलको आवश्यक थियो,' उनले भने, 'पार्टीलाई अँध्यारोमा राखेर गरिने सम्झौता खतरनाक हुन्छन्।'
विप्लव समूहमा लागेकाहरु नेकपामा आउने विश्वास गर्दै उनले सैद्धान्तिक तवरले समस्या हल गर्न सकिने बताए। 'त्यसका लागि चार जना प्रहरी चलाउनु पर्दैन। तर, विप्लपजीहरुले चन्दा आंतक, लुटपाट, हत्याहिंसा गरे प्रहरीले हस्तक्षेप गर्छ।'
अर्को प्रसंगमा उनले ३५ करोडभन्दा बढी लगानी भएको गौतमबुद्ध अन्तर्राष्ट्रिय विमानस्थलले लुम्बिनीलाई जोडेर पर्यटकीय विकास गर्नुपर्नमा उनले जोड दिए। सिद्धार्थनगर र वरपरको विकास तथा विमानस्थल नजिकका बासिन्दाको उत्थानका लागि योजना बन्न नसकेको उनको भनाइ थियो। आफूले निर्वाचन क्षेत्रमा सिँचाइलाई बढी केन्द्रित गरेको बताउँदै उनले निर्वाचन क्षेत्रमा सहरभन्दा बाहिर एक कठ्ठा भूमि पनि सिँचाइको सुविधाबाट वञ्चित नहोस् भन्ने अभियानमा आफू लागेको जानकारी दिए।
'सिद्धार्थनगर नगरपालिकाले डण्डा करिडोरको अवधारण ल्याएको कुरा आफैमा महत्वपूर्ण छ,' सांसद भुसालले भने, 'नगरपालिकाको दायरा बढाउनुपर्छ, यसको लागि साविकका गाविसहरु बगहा, हाटीफर्साटिकर, पडसरी, चिल्हिया, हाटीवनगाईलाई रिंगरोड मार्फत जोडर उपमहानगरपालिका, महानगरपालिकाको रुपमा विस्तार गर्नुपर्छ।'
नगरभित्र रहेको कारागार सारेर नगरपालिकाले ओमसतिया गाउँपालिकाको पट्खौलीमा खरिद गरेको जग्गामा सार्ने र नेपाली सेनाको ब्यारेक सार्नेबारे रक्षामन्त्रीसँग कुरा गरिसकेको उनको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
