नारायण अधिकारी
काठमाडौं- केही दिनअघि एक युवती जिल्ला प्रहरी कार्यालय दाङ पुगिन्। प्रहरी उपरीक्षक बेलबहादुर पाण्डे समक्ष घटनाको बेलिबिस्तार लगाइन्। अन्ततः जबरजस्ती करणीमा किटानी जाहेरी दिएपछि पाण्डेबाट छुटिन्। ती युवतीले किटानी जाहेरी दिएका व्यक्तिको परिचय भने यस्तो छः-
नामः- महेश भनिने भुवन धिताल
ठेगानाः- उरही-८ बेलानगर, दाङ
पेशाः- पत्रकार, ठुला व्यापारी
प्रहरीले आरोपित धितालमाथि अनुसन्धान सुरु गर्न थाल्यो। त्यसको केही दिनमा पुनः अर्की एक युवती पनि त्यसै गरी जिल्ला प्रहरी कार्यालय दाङ पुगिन्। उनले दिएको किटानी जाहेरी पनि बलात्कारकै थियो। यी युवतीले किटानी जाहेरी दिएका व्यक्ति पनि उनै भुवन धिताल थिए।
अनुसन्धानमा खटिएको प्रहरी आफैं अचम्ममा पर्यो। तर अनुसन्धान अघि बढाउन उसले ढिला गरेन। ‘केही दिनकै फरकमा एकै जना विरुद्ध दुई जनाको एकै प्रकृतिको किटानी जाहेरी आएपछि हामीले यो केसलाई 'सिरियस' रुपमा लिएर अनुस्न्धान सुरु गरेका थियौं,’ एसपी पोण्डेले नेपाल लाइभसमक्ष भने।
अझ अचम्मको कुरा तीनै धिताल विरुद्ध पुनः अर्की एक युवतीले किटानी जाहेरी गरिन्। मुद्दा पुरानै, अर्थात् बलात्कारविरुद्ध कै थियो। एकै व्यक्ति विरुद्ध तीन युवतीको किटानी जाहेरी। त्यो पनि तीनै जनामाथि बलात्कार गरेको आरोप। प्रहरीलाई आश्चर्यमा पार्ने यस्ता छटना विरलै हुने गर्छन्।
अनुसन्धानकै क्रममा धितालविरुद्ध अरु पनि किटानी जाहेरी थपिँदै गए। ५ जना व्यक्तिले ठगी गरेको भन्दै सामूहिक उजुरी दिए। प्रहरीको अनुसन्धानको दायरा थप फराकिलो बनाउन थाल्यो।
अनुसन्धानकै क्रममा बलात्कार र ठगी आरोप लागेका धिताल बाँके र दाङ जिल्लाको सीमानाबाट बुधबार पक्राउ परेका छन्।
यस्तो छ धिताल विरुद्ध ठगी र बलात्कार आरोपको भित्रीकथा
धितालको ठगी र बलात्कार निशानामा ती व्यक्ति पर्थे, जो कम शैक्षिक योग्यता भएका, एकल महिला, श्रीमान् विदेशमा भएका महिला। यस्ता व्यक्ति जम्मा पारेर उनले समूह बनाए। समूह बनाउनुका पछाडि धिताल एउटै मात्र उदेश्य थियो, ठग्नु। त्यसपछि उनले समाजसेवी जस्तो भएर महिलालाई भनेका थिए, ‘अब यो समूहले पैसा उठाउने र लगानी गर्ने हो भने राम्रो कमाइ हुन्छ। महिलाहरु पनि सशक्त हुनुपर्छ,’ धितालका कुरामा ती महिलाले पनि विश्वास गरे।
यसरी उठाएको रकम धितालले आफैं राख्न र ढुकुटी खेलाउन सुरु गरे। केही रकम लगानी पनि गरे। त्यसपछि खाली चेकमा हस्ताक्षर गर्न लगाएर उनले धेरै महिलाबाट हस्ताक्षर गरिएको चेक आफ्नो हातमा पारे।
हस्ताक्षर भएका ती चेकमा आफैंले रकम र मिति लेखेर चेक साटे। खातामा रकम नहुनेको चेक बाउन्स गराए। ‘रकम फिर्ता गर्। नत्र प्रहरीलाई भनेर पक्राउ गर्न लगाउँछु। म पत्रकार पनि हुँ। पत्रिकामा लेखेर बेइज्जत गर्छु,' उनले ती महिलालाई धम्की दिने क्रम जारी राखे, 'विदेशमा भएको तेरो श्रीमान्ले पत्रिका पढेपछि तेरो हालत के हुन्छ?’
धम्कीकै भरमा धितालले ३६ प्रतिशतसम्म ब्याज असुले। यो काममा उनलाई पूर्ण रुपमा सफलता मिलिसकेको थियो। यति गर्दासम्म कोही पनि महिलालाई आफूहरू ठगिँदै गरेको शंकासम्म गरेनन्।
पैसा असुल गरिएका र पैसा उठ्न समेत बाँकी भएका महिलालाई विभिन्न प्रलोभन देखाई ब्याल्कमेलिङ गर्ने क्रम जारी राखे।
उनले बलात्कारसम्म गर्न भ्याएको एसपी पाण्डेले बताए। ‘पीडित महिलालाई कतै उजुरी गरे राम्रो हुँदैन भन्दै धम्क्याउने गर्दै शारीरिक शोषण गरेको समेत देखियो,’ एसपी पाण्डे बताउँछन्, ‘अति भएपछि पीडित महिलाले उजुरी दिएपछि हामीले पक्राउ गरेका हौं।’
काठमाडौं भाग्न लागेको बेला उनलाई प्रहरीले दाङ र बाँकेको सिमानाबाट पक्राउ गरेको हो।
उनको ठगीबाट शिकार भएका अधिकांश महिला छन्। पक्राउ गरिसकेपछि पीडितको संख्या बढ्न थालेको प्रहरीले जनाएको छ। केहीले फोन गर्दै आफू पनि धितालबाट पीडित भएको र उजुरी दिन आउन लागेको बताएको दाङ प्रहरीले जानएको छ। पक्राउ परेका उनलाई जिल्ला अदालत दाङबाट ५ दिनको म्याद थप गरी अनुसन्धान सुरु गरिएको प्रहरीले जनाएको छ।
करोडौं ठगी, करोडौंका चेकदेखि फोर्ड गाडीसम्म बरामद
प्रहरीले धितालका साथबाट करौडौं रुपैयाँ भरिएका चेकदेखि फोर्ड गाडीसम्म बरामद गरेको छ। उनको साथबाट ८२ थान खाली चेक बरामद भएको छ। जसमा १ करोड ३९ लाख रुपैयाँ बराबरको लेखिएको छ भने २ थान खाली चेक छन्।
पैसा दिएको उल्लेख गरिएका ३२ थान तमसुक भेटिएका छन्। तमसुकमा १ करोड ४४ लाख लिन बाँकी रहेको उल्लेख छ। ४ वटा भने खाली तमसुक छन्।
प्रहरीले धितालका साथबाट पत्रकार परिचय पत्र १ थान, २ थान मोबाइल, नगद १८ हजार ५ सय, सुनका औंठी २ थान, सुनको ब्रास्लेट १ थान, बरामद गरेको छ। त्यसैगरी बा १५ च ७६६८ नम्बरको फोर्ड गाडी, भे ८ प ३९५५ नम्बरको होन्डा स्कुटर र १ थान घडी प्रहरीले बरामद गरेको छ।
तर उनी नक्कली पत्रकार रहेको प्रहरी अनुसन्धानबाट खुलेको छ।
यस्तो छ धितालको पृष्ठभूमि
वि.सं.२०३५ जेठ १ गते उरहरी–८ बेलगनार, दाङमा जन्मेका धितालले एसएलसी पास भएपछि २०६० साल बैशाखमा वैदेशिक रोजगारको लागि मलेसिया गए। त्यहाँ ३ वर्ष कामकाज गरी २०६३ सालमा घर फर्किए। त्यसपछि ३ वर्षसम्म घरमै बसेर खेतीपाती सुरु गरे।
२०६६ सालमा फेरि वैदेशिक रोजगारी लागि दुबई हानिए। २ वर्ष २ महिना दुबईमा काम गरेपछि २०६८ सालमा उनी स्वदेश फर्किए। त्यसपछि साविक घोराही नगरपालिका-१५ दीपशिखा रोडमा ३ वर्षसम्म होटल सञ्चालन गरेको अनुसन्धानबाट खुलेको प्रहरीले जनाएको छ। घोराहीमा इन्द्रेणी टोलको रोड साइडमा रहेको टिनको १ तले घरमा होटल सारेर ८ महिनासम्म त्यहाँ होटल चलाए।
त्यसपछि सो होटल २०७२ सालमा बन्द गरे। त्यसपछि उनले ठगी धन्दा र बलात्कार सुरु गरेको एसपी पाण्डेको भनाइ छ। कहिलेकाँही जग्गा दलालको काम पनि गरे। केही व्यक्तिलाई रकम ऋणमा दिए र ३६ दशमलव ५ प्रतिशतसम्म ब्याज असुल्न थाले। ढुकुटी खेलाउन थाले। बिस्तारै ठगी र बलात्कार जस्तो जघन्य अपराध मच्चाउन थाले। अन्तत: प्रहरीको फन्दामा परे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
