काठमाडौं- वैदेशिक रोजगारीमा जाने नेपाली श्रमिकहरु ठूलो संख्यामा समस्यामा पर्न थालेपछि श्रम, रोजगार तथा सामाजिक सुरक्षा मन्त्रालयमा कल सेन्टर सञ्चालन हुने भएको छ। सोमबारदेखि मन्त्रालयमा कल सेन्टर सञ्चालनमा ल्याइने गरी काम भइरहेको वैदेशिक रोजगार बोर्डका कार्यकारी निर्देशक राजनप्रसाद श्रेष्ठले नेपाल लाइभलाई जानकारी दिए।
निर्देशक श्रेष्ठले भने, ‘हामीले नेपालबाट गुनासो सुनुवाइका लागि ११४१ नि:शुल्क टेलिफोन सेवा सुरु गरेका छौं। विदेशबाट गुनासो राख्नुपरेमा वा जानकारी लिनु परेमा भाइबर, इमो वा मेसेन्जरका लागि एउटै नम्बर ९७७-१५९७०००८ को व्यवस्था गरिएको छ।’
११४१ नम्बरमा फोन गर्दा सुरुवातमा नेपाल टेलिकमको नम्बर प्रयोगकर्तालाई नि:शुल्क सेवा उपलब्ध गराइएको बोर्डले जानकारी दिएको छ। ‘एनसेल प्रयोगकर्तालाई पनि बिस्तारै नि:शुल्क सेवा उपलब्ध गराउने व्यबस्था गर्दैछौँ’, निर्देशक श्रेष्ठले भने।
कल सेन्टरमार्फत प्रधानमन्त्री रोजगार कार्यक्रम, सामाजिक सुरक्षा योजना लगायत वैदेशिक रोजगारीका सम्बन्धमा केही जानकारी लिन परेमा फोन गर्न सक्ने व्यवस्था गरिएको छ। वैदेशिक रोजगारीका क्रममा आउने समस्या तत्काल सुनुवाइ तथा कार्यान्वयनका लागि पनि कल सेन्टरमार्फत नै सम्बन्धित निकायसम्म नेटवर्किङको व्यवस्था गरिने श्रेष्ठले बताए।
सेवाग्राहीका समस्या समाधानका लागि सम्बन्धित निकायलाई घचघच्याएर तत्काल समस्या सुनुवाइका लागि कल सेन्टरमार्फत नै पहल गरिने बोर्डले जानकारी दिएको छ।
चौबीसै घन्टा सेवा
श्रमिकहरुको गुनासो सुनुवाइका लागि कलसेन्टरमार्फत चौबीसै घन्टा सेवा दिइने बोर्डले जनाएको छ। कल सेन्टर स्थापनाको सुरुवाती चरणमा भने कार्यालय समय अवधिमा सञ्चालन गरिने र सेवाग्राहीको प्रतिक्रिया वा आवश्यकताका आधारमा समय हेरफेर गरी आवश्यक परे चौबीसै घन्टा सेवा दिने निर्देशक राजनप्रसाद श्रेष्ठको भनाइ छ।
सामाजिक सञ्जालमार्फत गुनासो राख्न सकिने
कलसेन्टरमा टेलिफोनमार्फत मात्रै गुनासो सुनुवाइ नभएर फेसबुक, इमो, म्यासेन्जर, भाइबर, ह्वाट्स एप लगायत सबैखालका सामाजिक सञ्जालमार्फत गुनासाहरु राख्न सकिने व्यवस्था गरिने भएको छ।
कलसेन्टरमा विश्वका विभिन्न मुलुकमा पुगेका श्रमिकहरुले पनि सशुल्क रुपमा गुनासो राख्न पाउने गरी व्यवस्था मिलाइएको छ।
वैदेशिक रोजगारमा धेरै समस्याहरु आएसँगै नेपाल प्रहरीले पनि वैदेशिक रोजगारका गुनासो सुनुवाइका लागि ११७७ नम्बरको हटलाइन सेवा सुचारु गरेको छ। उक्त नम्बरमा अपराध अनुसन्धान महाशाखा टेकुले गुनासाहरु सुनुवाइ गर्ने गरेको छ।
हटलाइन सेवा सुचारु गरे पनि गुनासा तथा समस्याहरु टिपोट मात्रै हुने तर तत्काल कार्यान्वयन नहुने जस्ता समस्या रहेको पीडितहरुले नै बताउने गरेका छन्। यस्ता समस्यालाई ध्यानमा राख्दै बोर्डको व्यवस्थापनमा तत्काल गुनासो सुनुवाइ र कार्यान्वयनका लागि पहल गरिने जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791765483.jpg)
-1786602170.png)
