काठमाडौं– आगामी अक्टोबर ११ देखि ३ नोभेम्बरसम्म हुने आइसिसी टी–२० विश्वकप छनोट प्रतियोगिताका लागि युएईले स्थान पाएको छ। युएईले छनोट प्रतियोगिता आयोजकको हैसियतामा स्थान पाएको अन्तर्राष्ट्रिय क्रिकेट काउन्सिल (आइसिसी) ले जनाएको छ।
१४ टिमको सहभागिता हुने छनोट प्रतियोगितामा युएईसँगै ८ टिमको सहभागिता पक्का भइसकेको छ। गत संस्करणको विश्वकप खेलेका स्कटल्यान्ड, जिम्बावे, नेदरल्यन्ड्स, हङकङ, ओमान र आइरल्यान्ड वरीयतामा शीर्ष १० मा पर्न नसकेपछि टी–२० विश्वकप छनोटमा धकेलिएका थिए। पपुवा न्युगिनीले पूर्वी एसिया प्यासेफिक क्षेत्रीय छनोट पार गरेर छनोट प्रतियोगितामा स्थान पक्का गरिसकेको छ।
अब छनोट प्रतियोगिताका लागि ६ टिमको टुंगो बाँकी छ। जहाँ अफ्रिका र अमेरिका छनोटबाट २–२ टिम छनोट हुँदैछन् भने एसिया र युरोप छनोटबाट १–१ टिमले स्थान पाउनेछन्।
एसिया छनोटमा पाँच टिम
मलेसियामा भएको एसिया पूर्वी उपक्षेत्रीय छनोटमा नेपालले च्याम्पियनको हैसियतमा एसिया छनोटमा स्थान पक्का गरेको थियो। नेपालसहित सिंगापुर र मलेसिया पनि एसिया छनोटमा पुगेका थिए। यस्तै युएई, कतार र कुवेतले पश्चिम उपक्षेत्रीय छनोटबाट एसिया छनोट खेल्ने पक्का गरेका थिए। यद्यपी आयोजकको हैसियतमा युएईले अन्तिम छनोटमा स्थान पक्का गरिसकेको छ।
अब एसिया छनोटमा नेपाल, सिंगापुर, कुवेत, मलेसिया र कतारबीच प्रतिस्पर्धा हुँदैछ। प्रतियोगिता आगामी २२ देखि २८ जुलाईसम्म सिंगापुरमा हुनेछ। राउन्ड रोबिनको आधारमा हुने प्रतियोगिताको विजेताले युएईमा हुने छनोट प्रतियोगितामा स्थान बनाउनेछन्।
नेपालले पहिलो खेल कतारसँग २३ जुलाईमा सिंगपुरको इन्डियन एसोसिएसन मैदानमा खेल्नेछ। नेपालको दोस्रो खेल मलेसियासँग २४ जुलाईमा, तेस्रो खेल २७ जुलाईमा कुवेतसँग र अन्तिम खेल आयोजक सिंगापुरसँग २८ जुलाईमा छ।
६ टिम पुग्नेछन् टी–२० विश्वकपमा
१४ टिमबीच आगामी अक्टोबरमा युएईमा हुने छनोटबाट शीर्ष ६ टिमले सन् २०२० मा अस्ट्रेलियामा हुने टी–२० विश्वकपमा स्थान पक्का गर्नेछन्। छनोट पार गरेर पुग्ने ६ टिम तथा बंगलादेश र श्रीलंकाबीच टी–२० विश्वकपको समूह चरणमा प्रतिस्पर्धा हुनेछ। समूह चरणबाट ४ टिम सुपर–१२ मा पुग्नेछन्।
सन् २०१८ को डिसेम्बरसम्म आइसिसीको टी–२० वरीयताको शीर्ष १० टिम टी–२० विश्वकपका लागि छनोट भइसकेका छन्। जसमा शीर्ष स्थानको पाकिस्तानसहित भारत, इंग्ल्यान्ड, अस्ट्रेलिया, दक्षिण अफ्रिका, न्युजिल्यान्ड, वेस्ट इन्डिज र अफगातिस्तान वरीयताको शीर्ष ८ मा पर्दै सुपर–१२ का लागि सिधैं छनोट भइसकेका छन्।
नवौं वरीयताको पूर्व च्याम्पियन श्रीलंका र दशौं वरीयताको बंगलादेश टी–२० विश्वकपका लागि छनोट भए पनि दुवैले समूह चरणमा छनोट प्रतियोगिताबाट आएका ६ टिमसँग खेल्नु पर्नेछ।
टी–२० विश्वकप खेल्ने नेपालको सम्भावना कति छ?
नेपालले टी–२० विश्वकपका लागि एसियाको पहिलो चरणको छनोट पार गरिसकेको छ। ६ महिनाअघि मलेसियामा भएको छनोट प्रतियोगिता जित्दै नेपाल एसिया छनोटको दोस्रो चरणमा पुगेको थियो।
दोस्रो चरणको छनोट आगामी जुलाईमा सिंगापुरमा हुँदैछ। दोस्रो चरणको क्षेत्रीय छनोटमा नेपाल, कतार, कुबेत, सिंगापुर र मलेसियाबीच प्रतिस्पर्धा हुनेछ। जहाँ च्याम्पियन बने नेपालले अक्टोबर २०१९ मा युएईमा हुने टी–२० विश्वकप छनोटमा प्रतिस्पर्धा गर्न पाउनेछ।
टी–२० विश्वकप छनोटमा जिम्बावेसहित अघिल्लो विश्वकप खेलेका ८ टिमले खेल्ने पक्का भइसकेको छ। क्षेत्रीय छनोट पार गर्ने बाँकी ४ टिम गरी १४ बीच छनोट हुनेछ। छनोटमा शीर्ष ६ स्थानमा परे नेपालले टी–२० विश्वकप खेल्न पाउनेछ। त्यसैले नेपालले विश्वकप खेल्न आगामी जुलाईमा सिंगापुरमा हुने प्रतियोगितामा च्याम्पियन र अक्टोबरमा हुने अन्तिम प्रतियोगितामा शीर्ष ६ स्थान हात पार्नु पर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
