धनगढी– मुख्यमन्त्री कप अन्तर प्रदेश खेलकुद प्रतियोगिता अन्तर्गत आजदेखि फुटबल र क्रिकेटका खेलहरु सुरु भएका छन्। पुरुष क्रिकेटका खेलहरु धनगढीको फाप्ला मैदानमा सुरु भएका छन् भने महिला क्रिकेटका खेलहरु संघीय प्रहरी कार्यालयको खेल मैदानमा भइरहेका छन्। पुरुष फुटबलका खेलहरु भने धनगढीको रंगशालामा भईरहेका छन्।
महिला क्रिकेटमा सुदूरपश्चिमको जित
मुख्यमन्त्री कप अन्तर प्रदेश खेलकुद प्रतियोगिता अन्तरगत महिला क्रिकेटमा सुदूरपश्चिमको महिला टिमले जित हात पारेको छ। आज भएको खेलमा कर्णाली प्रदेशलाई ४ रनमा अलआउट गर्दै सुदूरपश्चिमको महिला टिमले २ सय २७ रनको जित हात पारेको हो। आज भएको खेलमा टस जितेर व्याटिङ गरेको सुदूरपश्चिम प्रदेशले निर्धारित १५ ओभरमा २ सय ३१ रन बनायो। सुदुरपश्चिमका लागि रुवी पोदारले ५२ बलमा ८५ रन बनाईन्। यस्तै रेवती धामीले ४४ बलमा ६९ रन बनाईन्। २ सय ३२ रनको लक्ष्य पछ्याएको कर्णाली प्रदेश ४ रनमै अलआउट भएको हो। कर्णाली प्रदेशका लागि लक्ष्मी पुरीले १ रन बनाईन् भने ३ रन अतिरिक्त पाएको थियो। सुदूरपश्चिमका लागि कविता कुँवरले २ ओभरमा २ ओभर नै मेडन राख्दै ह्याट्रिक सहित ४ विकेट लिइन्। यस्तै सुमन विष्टले २ ओभरमा ४ रन दिएर २ विकेट लिइन्।
आज नै भएको दोस्रो खेलमा प्रदेश नम्बर १ ले प्रदेश नम्बर ५ लाई ७ विकेटले हराएको छ। प्रदेश नम्बर ५ ले टस जितेर पहिले व्याटिङ गर्दै २० ओभरमा ९ विकेट क्षतिमा १०७ रन बनायो। उसका लागि सरस्वती पुनले २८ नितु भण्डारीले २१ रन बनाईन्। प्रदेश नम्बर १ का लागि सवनम राई र निग्मा तामाङले दुई दुई विकेट लिईन्। १०८ रनको विजय लक्ष्य पछ्याएको प्रदेश नम्बर १ ले निर्धारित ओभर सकिन दुई बल बाँकी रहँदै लक्ष्य पुरा गर्यो। प्रदेश नम्बर १ लाई सानदार जित दर्ता गराउन रोमा थापाले ६१ रनको अविजित पारी खेलिन्। त्यस्तै अप्सरी वेगमले पनि १८ रन जोडिन्।
पुरुष क्रिकेटमा सुदुरपश्चिम र प्रदेश नम्बर १ को जित
पुरुष क्रिकेटमा पनि सुदुरपश्चिम प्रदेशले विजयी सुरुवात गरेको छ। आज भएको पहिलो खेलमा कर्णाली प्रदेशलाई ८ विकेटले हराउँदै सुदुरपश्चिमले विजयी सुरुवात गरेको हो। टस जितेर पहिले व्याटिङ गर्दै कर्णालीले २० ओभरमा ९ विकेट क्षतिमा ९४ रन बनायो। उसका लागि दिवान पुनले २२ र हेमन्त ओलीले १० रन बनाउनु बाहेक अन्यले दोहोरो रन अंक बनाउन सकेनन् । सुदुरपश्चिमका लागि नरेन्द्र साउँदले ४ महेश अधिकारीले २ र विकास आग्रीले एक विकेट लिए। ९५ रनको विजय लक्ष्य सुदुरपश्चिमले १४ दशमलव १ ओभरमा २ विकेट गुमाएर विजय लक्ष्य पुरा गर्यो। सन्जु बोहोराले ४३ खड्क बोहोराले २४ दिपेन्द्र बोहोराले २० रन बनाए।
पुरुष क्रिकेटमै आज भएको दोस्रो खेलमा प्रदेश नम्बर १ ले प्रदेश नम्बर ५ लाई ५ रनले हराएको छ। फाप्ला मैदानमा टस जितेर पहिले व्याटिङ गर्दै प्रदेश नम्बर १ ले २० ओभरमा ६ विकेट गुमाउँदै ११५ रन बनायो। सो पारीमा दिपेश कडेलले ३६ र पुष्प थापाले ३४ रन बनाए। प्रदेश नम्बर ५ का लागि कृष्ण कार्कीले दुई विकेट लिए। ११६ रनको विजय लक्ष्य पछ्याएको प्रदेश नम्बर ५ ले निर्धारित २० ओभरमा ९ विकेट क्षतिमा ११० रन मात्रै बनाउन सक्यो । सुवेन्द्र पाण्डेयले २२ सौरव खनालले १५ र राजीवरले १२ रन बनाए पनि आफ्नो टिमलाई जिताउन सकेनन्। प्रदेश नम्बर १ का पुष्प थापा र मुकुन्द यादवले दुई दुई विकेट लिए।
पुरुष फुटबलमा प्रदेश नम्बर २ र प्रदेश नम्बर १ विजयी
पुरुष फुटबल प्रतियोगिता अन्तर्गत आज भएका खेलमा प्रदेश नम्बर २ र प्रदेश नम्बर १ विजयी भएका छन्। धनगढी रंगशालामा भएको दोस्रो खेलमा प्रदेश नम्बर २ ले गण्डकी प्रदेशलाई ३–१ ले हरायो। प्रदेश नम्बर २ का लागि रितीक खड्काले दुई र गंगावहादुर आलेले एक गोल गरे खड्काले ८ मिनेट र ७६ मिनेटमा गोल गरेका हुन्। आलेले १३ मिनेटमा एक गोल गरेका हुन्। गण्डकीका लागि अजिज मियाले एक गोल फर्काए। उनले ६९ औं मिनेटमा गोल गरेका हुन् । आजको पहिलो खेलमा भने प्रदेश नम्बर १ ले प्रदेश नम्बर ५ लाई १–० ले गोल गरे। प्रदेश १ का लागि विदुर रिजालले एक मात्रै निर्णायक गोल गरे। खेलको ६५ औं मिनेटमा गरेको गोल नै निर्णायक भयो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
