राजविराज- नयाँ शक्ति पार्टीका संयोजक तथा पूर्व प्रधानमन्त्री बाबुराम भट्टराईले सिके राउतसँग सरकारले गरेको ११ बुँदे सम्झौता प्रति असन्तुष्टि व्यक्त गरेका छन्। सहमतिको २ नम्बर बुँदा स्पष्ट पार्न नसके त्यसले मुलुकमा फेरी अर्को द्वन्द्वको बीउ रोप्ने चेतावनीसमेत उनले दिएका छन्।
सप्तरीको छिन्नमस्ता गाउँपालिकाको गाउँसभा उद्घाटन गर्न सोमबार सप्तरी आएका भट्टराईले राजविराज विमानस्थलमा पत्रकारसँग कुरा गर्दै यस्तो चेतावनी दिएका हुन्।
‘११ बुँदे सहमतिमा धेरै अस्पष्टता छन्,’ उनले भने, 'खास गरी २ नं बुँदामा जनअभिमतमा आधिरित लोकतान्त्रिक तरिकाले समस्याको समाधान गर्ने भनिएको छ, त्यसलाई सिके राउतपक्षले जनमत संग्रहको अर्थमा बुझेको र अर्थ्याइरहेको छ। सरकार होईन भन्छ। यो के हो प्रष्ट हुनुपर्छ। सुरुमा नै यस्तो अस्पष्टता भएपछि यसले फेरि अर्को द्वन्द्वको बीउ रोप्छ।’
संविधान अनुसार राष्ट्रिय अखण्डता र जनतामा निहित सार्वभौमसत्ताको विकल्प खोज्न नसकिने भन्दै भट्टराईले दुई विषयमा जनमत संग्रह नहुने पनि प्रष्ट पारे। उनले भने, ‘यो विषयमा विवाद चर्काउनुभन्दा सरकारले आफ्नो दायित्व बुझेर जनतालाई स्पष्ट पार्नुपर्छ।’
वार्तामार्फत् समस्या समाधान गर्नु सकारात्मक पक्ष भएपनि दोहोरो व्याख्या हुने खालको सम्झौता गर्नु सरकारको कमजोरी भएको भट्टराईले सुझाए। ‘दोहोरो अर्थ लाग्ने भाषा लेख्नु हुँदैनथ्यो। लोकतन्त्र भनेपछि जनअभिमत भन्नै पर्दैनथ्यो,’ उनले भने,‘लोकतन्त्र भनेको जनताको अभिमतमा आधारित नै हो। जनताको अभिमतमा आधिारित भनेपछि त खेल्ने ठाउँ भो नी।’
बरफलाई चिसो र तातो भन्दै अर्थ लगाउने प्रयास थालिएकाले सम्झौतामा खेल्ने ठाउँ उत्पन्न भएको उनको भनाइ छ। ‘सरकारले नाटकीय ढंगले हतार गरेर जुन सम्झौता गर्यो, यसलाई अहिले नै प्रष्ट पार्नु जरुरी छ,’ भट्टराईले थपे,‘दुवै पक्षले अलग–अलग व्याख्या गर्नेगरी सम्झौता गर्नु हुँदैन। यसले समस्या पार्छ।’
तत्कालीन माओवादी पार्टी जनयुद्ध छोडेर शान्ति प्रक्रियामा आउँदा प्रचण्डले त्यसैगरी अर्थ लगाउनाले पार्टीलाई घाटा भएको स्मरण गर्दै उनले भने,‘प्रचण्डले शान्ति सम्झौतालाई मुखमा शान्ति प्रक्रिया हो, भित्र चाँहि विद्रोह हो भन्दै व्याख्या गर्दा पार्टिलाई घाटा भएको थियो।’
सिके राउतलाई आग्रह
संविधानलाई संशोधन गरेर संघीयतामा अपूर्ण भएका कुरा थपघट गर्दै अघि बढ्न भट्टराईले सिके राउतलाई आग्रह गरेका छन्। ‘खास गरी संघीयताको कुरा, शासकीय स्वरुपमा राष्ट्रपतीय प्रणालीको कुरा र नागरिकतालगायतका विषयमा संविधान संशोधन गर्नु जरुरी छ,’उनले भने,‘म आग्रह गर्छु। आउनोस्, वार्तामार्फत् समस्याका समाधान खोज्दै जाउँला। पृथकतावादी बाटो कसैले समाउनु हुँदैन।’
आईतवबार जनकपुरमा भएको सिके राउतको कार्यक्रमले उनी माथि शंका गर्ने ठाउँ उत्पन्न भएको भट्टराईले बताए।
नेपालको स्वाधीनता र अखण्डता स्वीकारेर शान्तिपूर्ण राजनीतिमा आएको हो भने आफ्नो कार्यक्रमबारे स्पष्ट ढंगले भन्न र नेता भईसकेकपछि आफूले गरेको कुरामा दृढतापूर्वक उभिन उनले राउतलाई आग्रह पनि गरे।
'हिजो जनकपुरमा भएका गतिविधिले उनीमाथि शंका गर्ने ठाउँ देखियो,’ उनले भने,‘नेता भईसकेपछि आफ्नो कुरामा दृढ भएर उभिन र कार्यकर्तालाई मनाउन सक्नुपर्छ। यसले आफूलाई पनि हित गर्छ र देशलाई पनि हित गर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
