काठमाडाैं- मुस्लिम आयाेगकाे अध्यक्षमा सिफारिस समिम मियाँ अन्सारीकाे विषयमा संसदीय सुनुवाइ विशेष समितिले निर्णय लिन सकेकाे छैन। नागरिकताकाे विवाद बारेमा प्रमुख जिल्ला अधिकारीलाई पुन: पत्र लेख्ने निर्णय गरेकाे समिति सभापति लक्ष्मणलाल कर्णले बताए।
अन्सारीका बाबुआमाकाे नागरिकतासमेत खाेजेर समितिसमक्ष पठाउन समितिले जिल्ला प्रशासन कार्यालय, काठमाडौंलाई निर्देशन दिएकाे हाे।
'सिडिओ कार्यालयले दुई-दुई वटा कागजात किन पठायो र बाबुआमाको पनि नागरिकताको अवस्था के छ भनेर सम्पूर्ण खोजेर समितिसमक्ष पठाउनु भनेर निर्देशन दिएका छौं', सभापति कर्णले भने।
संवैधानिक परिषद्ले सिफारिस गरेका अन्सारीमाथि तीन गम्भीर सवाल उठेपछि यसअघि संसदीय सुनुवाइ समितिले छानबिन गर्ने निर्णय गरेको थियो।
प्रधानमन्त्रीको अध्यक्षतामा रहने संवैधानिक परिषद्ले गरेको सिफारिसमाथि संसदीय सुनुवाइ समितिले दोस्रो पटक छानबिन गरेको थियो।
नागरिकता, शैक्षिक प्रमाणपत्र र पार्टीको सदस्यताका विषयमा संसदीय सुनुवाइ समितिमा सवाल उठेपछि उनीमाथि सुनुवाइ समितिले छानबिन गरेको हो।
अन्सारी आयोगको अध्यक्षका लागि योग्य नहुने भन्दै चार वटा उजुरीसमेत परेका थिए।
आयोगको अध्यक्षका लागि न्यूनतम शैक्षिक योग्यता स्नातक तोकिएको छ। उनले भारतको बोगयास्थित मगध विश्वविद्यालयबाट सन् २००४ मा स्नातक गरेको शैक्षिक प्रमाणपत्र बुझाएका छन्। तर, एसएलसी र आइए कुन स्कुल र क्याम्पसबाट गरेको खुलाएका छैनन्।
बायोडाटामा समेत उक्त उल्लेख नगरेको विषयलाई एउटा छानबिनको विषय बनाइएको थियो। सन् २००४ मै भारतीय मगध विश्वविद्यालयबाट स्नातक गरेका उनले यसको इक्युभ्यालेन्ट भने २०७५ साल कात्तिक ३० गते मात्रै त्रिभुवन विश्वविद्यालयमा गराएका छन्।
अन्सारीले २०५५ पुस २२ गते जिल्ला प्रशासन कार्यालय, काठमाडौंबाट नागरिकता लिएका छन्। उनले वंशजको आधारमा लिएको नागरिकतामा काठमाडौं महानगरपालिका वडा नं ९ जन्मस्थान उल्लेख गरेका छन्। २०३३ सालमा जन्मिएका उनले किन ढिलोगरी नागरिकता लिए भन्नेबारे पनि उजुरीकर्ताले सवाल उठाएका थिए।
यस्तै, अन्सारी हालसम्म पनि नेपाल कम्युनिस्ट पार्टी (नेकपा) का केन्द्रीय सदस्य रहेको बताइएको छ। निर्वाचन आयोगमा रहेको केन्द्रीय सदस्यको सूचीमा ३७४औं नम्बरमा अन्सारीको नाम उल्लेख छ। जबकि, मुस्लिम आयोग ऐन २०७४ को दफा ३ को (ग) मा आयोगको अध्यक्ष तथा सदस्य नियुक्ति हुँदाका बखत कुनै राजनीतिक दलको सदस्य नरहेको हुनुपर्ने उल्लेख छ।
माघ ६ गते बसेको संवैधानिक परिषद्ले मुस्लिम आयोगसहित विभिन्न संवैधानिक आयोगको अध्यक्षमा नाम सिफारिस गरेको थियो। संवैधानिक परिषद्ले सार्वजनिक सूचना जारी गर्दै योग्यता पुगेका व्यक्तिहरुलाई अध्यक्ष र सदस्यमा आवेदन दिन भनेको थियो। उक्त सूचना अनुसार आवेदन दिने मध्येहरुबाट केही नाम संवैधानिक परिषद्ले सिफारिस गरेको थियो।
३ दिनमा सुनुवाइ नभए अन्सारी स्वत: अध्यक्ष
संवैधानिक आयाेगमध्येकाे एक मुस्लिम आयाेगकाे अध्यक्षमा सिफारिस अन्सारीकाे हकमा संसदीय समितिले आगामी ३ दिनभित्र निर्णय लिन नसकेमा उनी स्वत: अध्यक्ष हुनेछन्।
संवैधानिक परिषद्बाट संवैधानिक आयाेगकाे अध्यक्षमा सिफारिस भएका व्यक्तिकाे सुनुवाइ ४५ दिनभित्र हुन नसकेमा ताेकिएका व्यक्ति स्वत: अध्यक्ष हुने प्रावधान छ। अन्सारीका हकमा ताेकिएकाे समयसीमा शुक्रबार सकिँदैछ।
साे सम्बन्धमा जिज्ञासा राख्दा सभापति कर्णले भने, 'कानुनी प्रवधान साेही अनुसार नै लागू हुन्छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
