काठमाडौं- ग्यास व्यवसायीहरुले राखेका माग सम्बोधन गर्न नेपाल आयल निगमले समिति गठन गरेपनि व्यवसायीहरुले उक्त समितिप्रति विश्वास नभएको बताएका छन्। निगमका निमित्त नायव कार्यकारी निर्देशक नागेन्द्र साहको संयोजकत्वमा गठित समितिमा व्यवसायीका प्रतिनिधि भए पनि सो समितिप्रति विश्वास नभएको व्यवसारीले बताएका हुन्।
व्यवसायीहरुले राखेका माग जायज भए/नभएको तथा सम्बोधन गर्न सकिने/नसकिने विषयमा अध्ययन गरी प्रतिवेदन बुझाउन समितिलाई २१ दिनको समय दिइएको छ।
गत शुक्रबार नै निगमले एक विज्ञप्ति जारी गर्दै व्यवसायीका माग पूरा गरिने जनाएको थियो। निगम सञ्चालक समितिले कमिसन वृद्धिलगायतका व्यवसायीका माग पूरा गर्न अधिकार सम्पन्न समिति गठन गरी वार्ताका लागि आह्वान गरेको हो। एलपी ग्यास व्यवसायीसँग छलफल गरी तार्किक निष्कर्षमा पुग्न तत्पर रहेको निगमले जनाएको छ।
‘व्यवसायीबाट घोषित कार्यक्रम फिर्ता गरी विधि र विधानअनुसार समस्या समाधान गर्न र एलपी ग्यासजस्तो अत्यावस्यक वस्तुको संवेदनशीलता गम्भिरताका साथ बुझिदिन निगम व्यवसायीहरुसँग अनुरोध गर्दछ,’निगमले जारी गरेको विज्ञप्तिमा उल्लेख छ।
नेपाल एलपी ग्यास उद्योगसंघका अध्यक्ष गोकुल भण्डारीले सरकारले भुलाउने बहानामा मात्र त्यस्तो समिति गठन गरेको बताएका छन्।
'यस अघि पनि पटकपटक यस्ता समिति गठन भईसके। ती समितिमध्ये केहीले रिपोर्ट नै बुझाएनन्। बुझाएका रिपोर्टमा भएका कुरा पनि कार्यान्वयन भएनन। यसकारण हामीलाई समितिप्रति विस्वास छैन,’अध्यक्ष भण्डारीले भने।
प्रतिवेदन पेश गर्न समितिलाई निगमलाई २१ दिनको समयावधि दिएको भएपनि व्यवसायीहरुले भने ५ दिनभित्रै अध्ययन सम्मन्न गर्नुपर्ने भन्दै निगमलाई पत्र पठाएका छन्।
भण्डारीका अनुसार व्यवसायीहरुले आन्दोलन घोषणा गरिरहेको अहिलेको अवस्थामा २१ दिन समयावधि लामो भएको र ५ दिनभित्रै अध्ययन सम्पन्न गर्न सकिने भन्दै व्ययसायीहरुले निगमलाई ध्यानाकर्षण पत्र पठाएका थिए।
आयव्यव्यय विवरण मागेपछि व्यवसायी त्रसित
नेपाल एलपी ग्यास उद्योग संघले कमिसन वृद्धिको माग पूरा नगरे आन्दोलन गर्ने भन्दै फागुन ७ गते सरकारलाई १० दिनको अल्टिमेटम दिएको थियो। त्यसलगत्तै आयल निगमले व्यवसायीहरुसँग उनीहरुको आय–व्यय विवरण (वासलात) मागेको गरेको थियो। ग्यास व्ययसायीहरु फाईदा मै चलिरहेको भएपनि घाटा भएको कारण देखाउँदै आन्दोलनको घुर्की देखाएपनि निगमले उनीहरुको आय व्यय विवरण मागेको हो।
तर व्यवसायीहरुले भने निगमले खराब नियत राख्दै आफूहरूलाई पेल्न खोजेको भन्दै विवरण बुझाएका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791779517.png)
-1791778269.png)
-1791777931.png)
-1786602170.png)
