भैरहवा- आगामी केही महिना भारतमा हुन लागेको लोकसभा निर्वाचनमा सहयोग गर्नका लागि भारतले नेपाललाई आग्रह गरेको छ।
नेपाल र भारतका स्थानीय अधिकारीहरुको उपस्थितमा सोमबार सिमावर्ती भारतीय शहर नौतनवास्थित एसएसबी ६६औँ बटालियन हेडक्वार्टरमा बसेको काउन्टर पार्टको बैठकमा भारतले निर्वाचनलाई शान्तिपूर्ण रुपमा सम्पन्न गराउनका लागि सुरक्षा सहयोग गर्नलाई नेपाललाई आग्रह गरेको हो।
हालै काश्मिर क्षेत्रस्थित पुलावामा भएको घटनाका कारण भारत र पाकिस्तानबीच चर्को विवाद जारी रहेको छ। निरन्तर बैठकका साथै विवादलाई पनि मध्यनजर गर्दै खुल्ला सिमानाका रहेकोले निर्वाचनमा खलल पुर्याउन नाकाबाट घुसपैठ हुनसक्ने भन्दै नाकासहित शंकाष्पद व्यक्तिहरु उपर निगरानी गर्न आग्रह गरेको छ।
बैठकमा नेपालले लोकसभा निर्वाचनमा आफूबाट हुनसक्ने सम्पूर्ण सहयोग गर्ने प्रतिवद्धता जनाएको छ। खुल्ला सिमानाका कारण नाकामा नेपालमा बिक्रीवितरण तथा तस्करी हुने मदिरा र भारतमा सहज रुपमा पाइने लागुऔषध, तस्करीलगायत अपराधिक क्रियाकलाप नियन्त्रण गर्नमा दुवै देशका अधिकारीहरु बीच समझदारी भएको रुपन्देहीका एसपी हृदय थापाले जानकारी दिए। उनले भारतले सीमामा हुने शंकाष्पद गतिविधिउपर कडा निगरानी गर्न आग्रह गरेको बताए।
गोरखपुरका आइजी जय नारायणले सिंहले बैठकमा नेपालले शान्तिपूर्ण रुपमा निर्वाचन सम्पन्न गराउन पूर्ण सहयोग गर्न प्रतिवद्धता जनाएको बताउँदै एसएसबी र प्रहरीको नाकामा संयुक्त गस्ती गर्नसमेत दुबै देशका अधिकारीबीच समझदारी भएको जानकारी दिए।
बैठकमा रुपन्देहीका प्रमुख जिल्ला अधिकारी उदय बहादुर रानाले सीमानामा उत्पन्न हुने समस्यालाई दुबै देशका अधिकारीहरुले संयुक्त रुपमा मिलेर समाधान गर्दै आएको उल्लेख गर्दै आफूहरुबाट हुनसक्ने सम्पूर्ण सहयोग गर्न तयार रहेको स्पष्ट पारे।
रुपन्देही र नवलपरासीका प्रमुख जिल्ला अधिकारी, जनपद र सस्शत्र प्रहरीका एसपीहरु, भारत महारागञ्जका प्रमुख जिल्ला अधिकारी, एसएसबी ६६औँ बटालियनका कमाण्डेन्ट, एडिसनल एसपीलगायतको उपस्थिति बैठक बसेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
