काठमाडौं– कपिलवस्तुको वाणगंगा नगरपालिका–४ कुबेरापुरमा बर्थडे पार्टी मनाइरहेका बेला गोली प्रहार गरी महिलाको हत्या गरेको खुल्न आएको छ।
गएराति १ बजे कुबेरापुरकी अन्दाजी ३५/३६ वर्षीया अनिता पौडेलेको गोली प्रहारबाट मृत्यु भएको थियो।
आफ्नै बर्थडे मनाइरहेका बेला घरबाहिर बोलाएर गोली हानी हत्या गरिएको कपिलवस्तुका डिएसपी रवि रावलले जानकारी दिए। बर्थडे पार्टीमै सहभागी हुन आएका दुई जनाले उनलाई निधारमा गोली हानेर मोटरसाइकल चढी भागेको प्रहरीले जनाएको छ। उनीहरुको खोजी भइरहेको छ। शवलाई बुटवल पठाइएको छ।
राति बर्थडे मनाउन भन्दै दुई व्यक्ति केक लिएर अनिताको घर गएका थिए। उनीहरुलाई अनिताले कुखुराको मासुसमेत पकाएर खुवाएकी थिइन्। मासु र केक खाएपछि तिनै व्यक्तिले उनलाई घरबाहिर गोली हानेर भागेको प्रारम्भिक अनुसन्धानबाट खुलेको प्रहरीले जनाएको छ। उनीहरु अनिताको घरमा प्रायजसो आउनेजाने गरेको बताइएको छ।
मृतक अनिताका श्रीमान् भारतमा छन्। केही वर्ष पहिलादेखि श्रीमान्सँगै उनको सम्बन्ध चिसिएको थियो। श्रीमान् श्रीमतीको विवाद हुँदा केही व्यक्ति बेलाबेला अनिताको घर जाने र छलफल गराउने गरेका थिए।
मृतक अनिता माध्याकि विद्यायलमा कार्यलय सहयोगीको रुपमा काम गर्थिन्।
उनका १० वर्षीया छोरी र ५ वर्षीय छोरा छन्। आफन्तहरुले भने श्रीमान्को षड्यन्त्रमा अनिताको हत्या भएको आरोप लगाएका छन्। फरार ती दुई व्यक्तिलाई मृतक पौडलकी छोरीले 'देखेँ भने चिन्छु' भनेकी छिन्।
भारतमा रहेका श्रीमानले फोन गरेर आफू घर आउन लागेको बताएको वाणगंगा नगरपालिकाका मेयर मंगलप्रसाद थारुले जानकारी दिए।
यो पनि पढ्नुहोस्
कपिलवस्तुमा मध्यराति गोली प्रहार, एक महिलाको मृत्यु
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
