काठमाडौं– भारतमा भएको १२औं दक्षिण एसियाली खेलकुद प्रतियोगिता (साग) को फुटबलतर्फ स्वर्ण जितेको नेपाली टिमलाई ३ वर्षपछि पुरस्कार दिने सरकारले निर्णय गरेको छ।
नेपाली टिमका २० खेलाडीलाई जनही ३ लाख रुपैयाँ पुरस्कार प्रदान गर्ने मन्त्रिपरिषद्ले निर्णय गरेको बिहीबार सार्वजनिक गरिएको हो।
२०७२ मै खेलाडीलाई जनही ५ लाख पुरस्कार दिने घोषणा गरिएको थियो। तर खेलाडीले २०७३ साउनमा जनही २ लाख रुपैयाँ मात्र पाएका थिए। तत्कालिन प्रधानमन्त्री केपी ओलीले नेपाली टोलीका सदस्यलाई जनही २/२ लाखको चेक हस्तान्तरण गरेका थिए ।त्यतिबेला प्रशिक्षक राजुकाजी शाक्यले भने ३ लाख पुरस्कार पाएका थिए।
सरकारले बाँकी ३ लाख पनि छिट्टै उपलब्ध गराउने बताएको थियो। तर बाँकी रकम खेलाडीले ३० महिना पछि मात्र पुरस्कारको पूरा रकम पाउने भएका छन्।
त्यतिबेला नेपालले सागमा स्वर्णसँगै बंगबन्धु गोल्डकपमा उपाधि जितेको थियो। अखिल नेपाल फुटबल संघ एन्फाले १०–१० लाख पुरस्कार प्रदान थियो।
२०७२ फागुन ३ गते भारतको गुवाहटीमा भएको साग फुटबलको फाइनलमा नेपालले आयोजक भारतलाई २–१ ले हराएर उपाधि जितेको थियो।
खेलमा नेपालका तर्फबाट प्रकाश बुढाथोकी र नवयुग श्रेष्ठले गोल गरेका थिए। नेपालले २३ बर्षपछि साफ खेलकुदमा फुटबलको उपाधि जितेको थियो। सन् १९९३ मा ढाकामा भएको दक्षिण एशियाली खेलकूदमा भारतलाई नै पराजित गर्दै नेपालले स्वर्ण पदक जितेको थियो। भारतमाथि जित हासिल गर्दै दुई दशकपछि नेपालले आफ्नो सफलताको इतिहास दोहोर्याएको थियो।
साग फुटबलमा सहभागी नेपाली टिम
गोलकिपर : विकेश कुथु, एलन न्यौपाने र अमृत चौधरी।
डिफेन्डर : आदित्य चौधरी, अनन्त तामाङ, कप्तान विराज महर्जन, दिनेश राजबंशी, मनबहादुर तामाङ र कमल श्रेष्ठ
डफिल्डर : बिक्रम लामा, विशाल राई, हेमन गुरुङ, जगजित श्रेष्ठ र प्रकाश बुढाथोकी
फरवार्ड : अन्जन विष्ट, बिमलघर्ती मगर, नवयुग श्रेष्ठ, रन्जन विष्ट, सुनिल बल र सुमन लामा
प्रमुख प्रशिक्षक : राजुकाजी शाक्य
गोलरक्षक प्रशिक्षक : मृगेन्द्र मिश्र
यता गत महिना युएईविरुद्ध टी–२० र एकदिवसीय सिरिज जितेका राष्ट्रिय क्रिकेट टिमका १६ खेलाडीलाई जनही ५ लाख रुपैयाँ दिने निर्णय पनि सरकारले सार्वजनिक गरेको छ। प्रशिक्षक जगत टमाटालाई ३ लाख दिने निर्णय गरेको सरकारले ब्याटिङ प्रशिक्षक उमेश पटवाल, ट्रेनर सुवास पात्रो, फिजियो दिनेश भट्ट र म्यानेजर रमन शिवाकोटीलाई जनही २ लाख रुपैयाँ दिने निर्णय भएको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
