जनकपुर– माग सम्बोधन नगरेको भन्दै जनकपुर उपमहानगरपालिका वडाध्यक्षहरुले हातमा कालोपट्टी बाँधेर काम गरेका छन्।
नगर प्रमुख लालकिशोर साहबाट असन्तुष्ट वडाध्यक्षहरु पूर्वघोषित कार्यक्रमअनुसार सोमबारदेखि आन्दोलनमा उत्रेका हुन्। आफूहरुले बुझाएको १६ बुँदे माग पूरा गर्नतर्फ उपमहानगरपालिकाले चासो नदेखाएपछि बाध्य भएर आन्दोलनमा उत्रेको वडा नम्बर ९ का अध्यक्ष परमेश्वर साहले बताए।
संवैधानिक व्यवस्थाअनुसार अधिकार प्रत्यायोजन, दैनिक कार्य, भैपरी आउने कार्यका लागि स्वायत्त व्यवस्था, वडा कार्यालयमा आवश्यक मानवीय, भौतिक, आर्थिक संशोधनका स्वायत्त परिचालनको व्यवस्था हुनुपर्ने लगायतका माग उनीहरुले राखेका छन्।
यसअघि आन्दोलित वडाध्यक्षहरूले उपमहानगरपालिकालाई माग पूरा गर्न १३ माघसम्म अल्टिमेटम दिएका थिए। २५ मध्ये असन्तुष्ट १६ जना वडा अध्यक्षहरुले सात दिने अल्टिमेटम दिँदै २५ पौषमा १६ बुँदे माग राख्दै उपमहानगरपालिकालाई ज्ञापन पत्र बुझाएका थिए।
ज्ञापनपत्र बुझाएपछि उपमहानगरपालिकाले सम्पत्तिमा गरेको करवृद्धिसम्बन्धी मात्र निर्णय सम्बोधन गरेको वडाध्यक्ष साहले जनाए।
आन्दोलनमा उत्रेका वडाध्यक्षहरूले माघ १४ र १५ गते हातमा कालोपट्टी बाँधी आ–आफ्नो वडा कार्यालयमा काम गने, १८ गते पेन डाउन, २० गतेदेखि बिहान १० बजेदेखि एक घन्टा धर्ना बस्ने कार्याक्रम रहेको छ।
यसैगरी २१ माघदेखि दैनिक १/१ घन्टा अवधि बढाउँदै २७ गते बिहान १० बजे देखि ६ घन्टा धर्ना दिने कार्यक्रम उनीहरुले घोषणा गरेका छन्।
यस अवधिमासमेत माग सम्बोधन नभए २८ गते र २९ गते आफूहरू २४ घण्टे रिले अनसनमा बस्ने असन्तुष्ट वडा अध्यक्षहरुले जनाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
