काठमाडौं– युएई विरुद्धको दोस्रो एकदिवसीय खेलमा आर्धशतक प्रहार गरेका नेपालका रोहितकुमार पौडेलले अन्तर्राष्ट्रिय क्रिकेट जगतमा चर्चित बनेका छन्।
रोहितले शनिबार भएको युएईविरुद्धको खेलमा ५५ रन बनाएका थिए। उनले ५८ बल खेल्दा ७ चौका प्रहार गरेका थिए। खेलमा नेपालले १ सय ४५ रनको जित निकाल्दै ३ खेलको सिरिजमा १–१ को बराबरी गरेको थियो।
युएई विरुद्धको खेलमा अर्धशतक बनाएसँगै रोहित अन्तर्राष्ट्रिय अर्धशतक बनाउने कान्छा खेलाडी बनेका थिए। उनी शनिबार १६ वर्ष १ सय ४६ दिनका थिए। यसअघि अन्तर्राष्ट्रिय क्रिकेटमा अर्धशतक बनाउने रेकर्ड भारतका महान् ब्याट्सम्यान सचिन तेन्दुलकरको नाममा थियो। उनले पाकिस्तान विरुद्धको टेस्ट खेलमा १६ वर्ष २ सय १३ दिन उमेर ५९ रन बनाएका थिए।
एकदिवसीय खेलमा कम उमेर अर्धशतक बनाउने रेकर्ड भने पाकिस्तानका साहिद अफ्रिदीको नाममा थियो। उनले १६ वर्ष २ सय १७ दिन उमेरमा श्रीलंकाविरुद्धको एकदिवसीय खेलमा अर्धशतक बनाएका थिए।
रोहितको रेकर्ड पुरुष क्रिकेटका लागि हो। समग्र क्रिकेटमा कम उमेरमा अर्धशतक बनाउने कीर्तिमानमा भने दक्षिण अफ्रिकाकी लोहमारी लोगटेनवर्गको नाममा छ। उनले १४ वर्षको उमेरमा अर्धशतक बनाएकी थिइन्।
खेलपछि रोहितले युएईको पत्रिका द नेसनललाई छोटो प्रतिक्रिया दिएका छन्। 'एकदमै खुसी लागेको छ। किनभने हामीले शुक्रबारको खेल हारेका थियौं। हामी यस्तै मौकाको पर्खाइमा थियौं,' पौडेलले भने,'हामीले सिरिजमा पुनरागमन गरेका छौं। सबै जना हामी खेलमा फर्कनेमा सकारात्मक थिए। र हामीले खेल जित्यौं।'
यसअघि नेपालले शुक्रबार भएको पहिलो खेलमा हार ३ विकेटको बेहोरेको थियो। अब तेस्रो तथा अन्तिम एकदिवसीय खेल सोमबार हुँदैछ। दुबईको आइसिसी एकेडेमीमा हुने खेलमा जित हात पार्ने टिमले सिरिज जित्नेछ। गत वर्ष एकदिवसीय मान्यता पाएको नेपाल विजयी भए पहिलो सिरिज जित्दै इतिहास बनाउनेछ। सिरिज पछि नेपाल १८ टिमको एकदिवसीय वरीयतामा समेत आउनेछ।
नेपालले एकदिवसीय सिरिजपछि युएईविरुद्ध ३ खेलको टी–२० सिरिज खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1782199085-1782199787.jpeg)
-1764146706.png)
