धनगढी– च्यासल युथ क्लबलाई हराउँदै थ्रीस्टार क्लब तेस्रो नेपाल आइस अन्तर्राष्ट्रिय सुदुरपश्चिम खप्तड गोल्डकपको सेमिफाइनलमा प्रवेश गरेको छ। सोमबार धनगढी रंगशालामा भएको तेस्रो क्वार्टरफाइनलमा च्यासल युवा क्लबमाथि १–० को जित निकाल्दै थ्री स्टारले अन्तिम चारमा स्थान पक्का गरेको हो।
पहिलो हाफ गोलरहित बराबरीमा सकिएको खेल सकिन तीन मिनेट समय बाँकी रहँदा थ्रीस्टारले अग्रता लियो। उसका लागि रुपेश केसीले गोल गरे। च्यासलका गोलरक्षक दिनेश थापामगरले सुनील बलको क्रसमा रुपेशको हेडर बचाउने प्रयास गरेपनि आफ्नै डिफेन्डर बाधक बनेका थिए।
खेलमा निर्णायक गोल गरेका थ्री स्टारका रुपेश केसी आरके कन्स्ट्रक्सन म्यान अफ द म्याच बने। उनले १० हजार रुपैयाँ प्राप्त गरे। थ्री स्टारले फाइनल प्रवेशका लागि बुधबार मेची नेत्रालय काँकडभीट्टा फुटबल ट्रेनिङ सेन्टरको सामना गर्नेछ।
मंगलबार अन्तिम क्वार्टरफाइनलमा सीएमजी क्लब संकटाले क्यामरुनको दाफिनास एफसीको सामना गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1768395492.png)
