काठमाडौं– थाइल्याण्डमा भइरहेको महिला टी–२० स्मास क्रिकेट प्रतियोगितामा लगातार तेस्रो जितसँगै नेपाल सेमिफाइनलमा प्रवेश गरेको छ। नेपालले आफ्नो तेस्रो खेलमा युएईलाई ६ विकेटले पराजित गर्दै अन्तिम चारमा स्थान पक्का गरेको हो।
थाइल्याण्डमा सोमबार भएको खेलमा युएईले दिएको १ सय ६ रनको लक्ष्य नेपालले १९ ओभरमा ४ विकेटको क्षतिमा भेट्टायो।
नेपालका लागि ओपनरद्वय काजल श्रेष्ठले २५ र सीता रानामगरले ३७ रनको योगदान गरे। दुईबीच पहिलो विकेटका लागि ११.२ ओभरमा ६१ रनको साझेदारी भयो।
काजलले रनआउट हुनुअघि ४२ बलमा खेलिन भने कुनै बाउन्ड्री हान्न सकिनन्। सीताले ३५ बलमा ४ चौका हिर्काइन्। डोली थापाले ७ रन जोडिन्। उनले ४ बलमा १ छक्का प्रहार गरेकी थिइन्। इन्दु बर्मा २० बलमा १३ रन जोडेर आउट भइन्। कप्तान रुबिना क्षेत्रीले नटआउट १० र नेरी थापाले नटआउट ६ रन जोडे।
त्यसअघि टस जितेर पहिले ब्याटिङ गरेको युएईले २० ओभरमा ६ विकेटको क्षतिमा १ सय ५ रन जोड्यो। उसका ओपनरद्वय लागि इशा ओजाले २८ र चाया मुघालले ३१ रन जोडे। इसाले २५ बलमा २ चौका र १ हिर्काइन्। चायाले ४३ बलमा १ चौका प्रहार गरिन्। चामानी सेनेभिराथ्नेले नटआउट २३ रन जोडिन्।
बलिङमा नेपालका सोनु खड्का, सीता राना मगर र करुणा भण्डारीले १–१ विकेट लिए। नेपालले युएईका ३ खेलाडीलाई रनआउटको सिकार बनाएको थियो।
यसअघि नेपालले समूह ‘ए’ को खेलमा चीनलाई १० विकेट र मलेसियालाई ६ विकेटले पराजित गरेको थियो।
नेपाली टोलीमा १४ सदस्यीय खेलाडीसहित मुख्य प्रशिक्षक विनोद दास, म्यानेजर अमृता पौडेल र फिजियो सकुना डानी सहभागी छन्।
रुविना क्षेत्री (वेलवासे)को कप्तानीमा रहेको नेपाली टोलीमा सीता राना मगर (उपकप्तान), करुणा भण्डारी, सरिता मगर, नेरी थापा, इन्दु बर्मा, सोनु खड्का, आरती विडारी, काजल श्रेष्ठ, रोमा थापा, कविता कुँवर, डोली भट्ट, ममताकुमारी चौधरी र विन्दु रावल छन्।
उक्त प्रतियोगितामा विभिन्न १० टोलीको सहभगिता रहेको छ। सहभागी टोलीलाई दुई समूहमा विभाजन गरिएको छ। समूह ‘ए’ मा नेपालसहित चीन, संयुक्त अरब इमिरेट्स (युएई), मलेसिया र थाइल्याण्ड 'ए' छन् भने समूह ‘बी’ मा हङ्कङ, थाइल्याण्ड, इण्डोनेसिया, भूटान र म्यानमार छन्।
नेपालले आफ्नो अन्तिम खेल माघ २ गते थाइल्याण्ड 'ए' सँग प्रतिस्पर्धा गर्नेछ। समूहका शीर्ष दुई टोलीले सेमिफाइनलमा स्थान बनाउनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1768395492.png)
