कालिकोट- अधिकांश युवा रोजगारीका लागि गाउँबाहिर रहेको र पानीको अभावले ग्रस्त कालिकोटको खाडागाउँ आगलागीका कारण एकैरातमा सखाप भएको छ।
परम्परागत खरले छाएको बस्तीमा आइतबार राति १० बजेदेखि सुरु भएको आगो सोमबार दिउँसो ४ बजे नियन्त्रणमा आउँदा बस्ती नै खण्डहर बनेको छ।
कालिकोटका प्रमुख जिल्ला अधिकारी चन्द्रबहादुर कार्कीले खाडागाउँको न्यौपाने बस्तीका ८७ घर जलेर नष्ट भएको बताए। ‘सबै घर जलेर नष्ट भएपछि मात्र नियन्त्रणमा आएको खबर छ,’ उनले भने, ‘राहत र उद्धारकार्य सुरु भएको छ।’
जिल्ला सदरमुकाम मान्मबाट करिब ३२ कोषको दुरीमा खाडागाउँ रहेको छ। सदरमुकामबाट उद्धारका लागि सशस्त्र प्रहरीसमेत घटनास्थलतर्फ हिँडेको छ। खरको छाना त्यसैमा हिउँदे सिजनको सुक्खा ठाउँ भएकाले पनि आगो नियन्त्रणमा लिन गाह्रो भएको प्रमुख जिल्ला अधिकारी कार्कीले बताए।
कालिकोटको पलाता गाउँपालिका १ खाडागाउँमा एक घरबाट आगलागी सुरु भएको थियो। मध्य निद्रामा रहेका गाउँले एकाएक आगोको मुस्लो देखेपछि अत्तालिँदै निस्केका थिए। अधिकांश युवा रोजगारीका लागि कालापत्थरमा रहेका छन्। बालबालिका र वृद्धमात्र रहेको उक्त गाउँमा मध्यराति भीषण आगलागी हुँदा पूरै गाउँ विस्थापित भएको छ।
पहिलेको खाडागाउँ
प्रारम्भिक विवरण अनुसार १६ जना घाइते भएका छन्। ७ जना घाइते हेलिकप्टरबाट थप उपचारका लागि ल्याउनुपर्ने भएको छ।
घटनामा कुनै मानवीय क्षति भने भएको छैन। घाइतेहरुको थप उपचारका लागि हेलिकोप्टरमार्फत सुर्खेत ल्याउने तयारी भइरहेको प्रजिअ कार्कीले बताए।
खाडागाउँका सबै घर खरको छानाले बनाइएका थिए। यहाँ पानीको पनि निकै समस्या छ। प्रहरीलाई घटनास्थलतर्फ पुग्न करिब ५ घन्टाको समय लाग्ने भएकाले अबेर पुगेको र विवरण पाउन समस्या भएको बताइएको छ।
इलाका प्रहरी कार्यालय थिर्पु र पचाल झरना गाउँपालिकाको जारकोटबाट प्रहरी टोली उद्धारका लागि गएको जिल्ला प्रहरी कार्यालयका निमित्त डिएसपी देवेन्द्र मल्लले बताए।
यसरी भयो आगलागी
गाउँको पुछारमा रहेको नवीन न्यौपानेको घरबाट आगो सुरु भएको थियो। हावाहुरी धेरै चलेकाले घनाबस्तीमा आगो फैलियो। नजिकै पानीको अभाव भएकाले तत्काल आगो नियन्त्रणमा समस्या आयो।
गाउँका युवा कामको खोजीमा बाहिर हुँदा आगो नियन्त्रणमा जनशक्ति अभाव भएकाले बस्ती नै सखाप भएको छ। आगलागी हुँदा बालबच्चा, महिला र वृद्धवृद्धा मात्र घरमा थिए।
अन्नबाली, लत्ताकपडा समेत नष्ट भएका कारण आगलागी पीडितलाई खान बस्न समस्या हुने देखिएकाले जिल्लामा आपतकालीन बैठक बसिरहेको प्रजिअ कार्कीले बताए। जिल्लामा रहेको आपतकालीन उद्धार कोषलाई सक्रिय बनाएर जनतालाई राहत दिन स्थानीय निकायसँग पनि सम्वन्वय गर्ने उनको भनाइ छ।
राहत संकलन सुरु
पलाता गाउँपालिकाले आगलागी पीडितका लागि सबैसँग सहयोगको आग्रह गरेको छ। गाउँपालिकाले तत्कालका लागि ९ लाखको सामान खरिद गरी हेलिकोप्टरमार्फत खाडा लैजाँदू गरेको गाउँपालिका अध्यक्ष लक्ष्मणबहादुर बमले बताए। उनका अनुसार गाउँपालिकाको बजेटले प्रत्येक घरधुरीलाई एक सिरक, दुई डस्ना, एक कोरिएन कम्मल, एक सेट भाँडाकुडा र हरेक व्यक्तिलाई एकएक वटा जकेट खरिद गरी सुर्खेत विमानस्थलमा जम्मा गरेको छ।
यस्तै कर्णाली प्रदेश सरकारले प्रति घरधुरी २०/२० हजार नगदसहित खाद्यान्न वितरण गर्ने भएको छ। प्रमुख जिल्ला अधिकारी चन्द्रबहादुर कार्कीका अनुसार गृह मन्त्रालयबाट २०० कम्मल, १०० ज्याकेट, १०० ट्राउजर, ७० थान त्रिपाल आइसकेको छ।
जिल्लाबाट पनि ८७ बोरा चामल, रेडक्रसले सहयोग गरेका १२ थान भाँडाकुडा, कालिकोट उद्योग वाणिज्य संघ र च्याम्बर्स अफ कमर्सबाट खाद्यान्न र लत्ताकपडा पलाँता पठाइएको छ। राहत वितरणका लागि कर्णाली प्रदेश सरकारका मुख्यमन्त्री महेन्द्रबहादुर शाहीसहितको टोली हेलिकप्टर मार्फत पलाँता पुगेको छ।
यस्तै रातहकै लागि कालिकोट जिल्लाको तिलागुफा नगरपालिकाले एक लाख, रास्कोट नगरले एक लाख, शान्नित्रिवेणी गाउँपालिकाले दुई लाख दिने घोषणा गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
