मेलवर्न– नेपालका युवा लेग स्पिनर सन्दीप लामिछाने यतिबेला अस्ट्रेलियामा छन्। १८ वर्षीय सन्दीप अस्ट्रेलियाको सबैभन्दा ठूलो टी–२० क्रिकेट लिग बिग बास लिग (बिबिएल) खेल्न त्यहाँ गएका हुन्।
अघिल्लो वर्ष इण्डियन प्रिमियर लिग (आइपिएल) टिम दिल्लीमा आवद्ध भएदेखि नै चर्चामा रहेका सन्दीपले आइपिएलका पछिल्ला खेलमा मौका पाए। जहाँ उनले आफूलाई प्रमाणित गर्न सफल भए। त्यसपछि अन्तर्राष्ट्रिय मिडियामा छाउन थालेका सन्दीप यति बेला अस्ट्रेलियामा पनि चासोको विषय बनेका छन्।
बिबिएल टिम मेलवर्न स्टार्ससँग आबद्ध सन्दीपले शुक्रबार पहिलो खेल खेल्ने प्रवल सम्भावना छ। क्यानबेरामा सिड्नी थन्डरविरुद्ध हुने खेलका लागि मेलवर्नले घोषणा गरेको १३ सदस्यीय टिममा सन्दीप परिसकेका छन्। अब शुक्रबार हुने टस पछि सन्दीप अन्तिम ११ पर्ने-नपर्ने पक्का हुनेछ।
सन्दीप अन्तर्राष्ट्रिय मिडियामा छाउनुमा अस्ट्रेलियाका पूर्वकप्तान माइकल क्लार्कको योगदान रहेको छ। हङकङमा भएको टी–२० लिगमा सन्दीपले क्लाकर्को कप्तानीमा खेलेका थिए। त्यसपछि उनलाई क्लार्कले अस्ट्रेलिया नै बोलाएर त्यहाँको ए श्रेणीको प्रतियोगितामा मौका दिएका थिए। त्यति बेला आफ्नो लक्ष्य बिबिएल खेल्ने भएको बताएका सन्दीपको लक्ष्य पूरा भएको छ।
गत सिजनको आइपिएलमा सन्दीप र अस्ट्रेलियाका अलराउन्डर ग्लेन म्याक्सवेल एउटै टिम दिल्लीमा थिए। अब भने सन्दीपले उनै म्याक्सवेलको कप्तानीमा बिबिएल खेल्दैछन्।
क्यारेबियन प्रिमियर लिगमा पनि उत्कृष्ट खेलेका सन्दीपले अस्ट्रेलियाका ब्याट्सम्यान डेबिड वार्नरलाई आउट गर्दै सनसनी मच्चाएका थिए।
सन्दीपलाई यसपटकको बिबिएलमा अफगानिस्तानका सुपरस्टार रासिद खानसँग तुलना गर्न थालिएको छ। रासिदले गत सिजन सर्वाधिक विकेट लिने क्रममा १८ विकेट लिएका थिए।
मेलवर्नका कप्तान म्याक्सवेल सन्दीपलाई रासिद खानसँग तुलना गर्न नमिल्ने बताउँछन्। तर सन्दीपको बलिङ रासिदसँग मिल्नेमा भने म्याक्सवेल सहमत छन्। भन्छन्,'सादय उनी धेरै बलिया र अनुभवी भइसकेका छैनन्। तर उनको बलिङ एक्सन रासिदसँग मिल्न सक्छ।'
म्याक्सवेलले थपे, 'उनी युवा खेलाडी हुन्। साह्रै स्मार्ट बलर हुन्। उनीसँग दिल्लीमा अभ्यास गरेको थिएँ। उनको बलिङ थाहा पाउन मलाई २ साता लाग्यो। त्यसअघि उनको बलिङ कहिलेकाँही हावा उडाइदिन्थे भने कहिलेकाँही भने बोल्ड पनि हुन्थे।'
म्याक्सवेलले सन्दीप स्टार भएको पनि बताए। उनले भने, 'उनी साँच्चै स्टार हुन्। उनले आइपिएलका केहि खेलमा देखाएको प्रभाव देखेको थिए। त्यहाँ उनको आत्मविश्वास थियो।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
