कोलम्बो– श्रीलङ्काका राष्ट्रपति मैत्रिपाला सिरिसेनाले बिहीबार ३० जनालाई मन्त्रीको रूपमा नियुक्त गरेका छन्।
प्रधानमन्त्री रनिल विक्रमासिङ्घेसँगको सात हप्ता लामो संघर्षपछि राष्ट्रपति सिरिसेनाले मन्त्रीहरू नियुक्त गरेका हुन्।
सर्वोच्च अदालतले संसद विघटन गर्न नमिल्ने अन्तिम फैसला सुनाएपछि उनले आफैंले अपदस्त गरेका विक्रमासिंघेलाई गत आइतबार प्रधानमन्त्रीमा पुनः नियुक्त गरेका थिए।
‘सञ्चारमाध्यम र प्रहरीलाई साथमा राखेर नियुक्त गर्न चाहेकाले उनले मन्त्रीहरू नियुक्त गर्न ढिलाइ भएको हो,’ सरकारका प्रवक्ता रजिथा सेनारत्नेले भने।
नयाँ मन्त्रिपरिषद्को कानुन मन्त्रीमा भने कसैलाई नियुक्त नगरिएको उनले जानकारी दिए।
विक्रमासिङ्घेको पहिलेको सरकारका अर्थ र परराष्ट्रमन्त्रीलाई भने अहिले परिवर्तन नगरिने भएको छ। अर्थमन्त्रीमा मङ्गला सामाराविरा र विदेशमन्त्रीमा तिलक मारापानालाई जिम्मेवारी दिइएको छ।
राष्ट्रपति सिरिसेनाले गत अक्टोबर २६ तारिखका दिन तत्कालीन प्रधानमन्त्री विक्रमासिङ्घेलाई अपदस्त गरेर पुर्व राष्ट्रपति महेन्दा राजापाक्षेलाई नियुक्त गरेका थिए।
तर, संसद र सर्वोच्च अदालतले उनको यो कदम गलत र अवैधानिक भएको भन्दै मान्यता नदिएपछि उनले पुरानै अवस्थामा फर्किनु परेको हो।
आफैंले हटाएको प्रधानमन्त्रीलाई फेरि नियुक्त गर्नुपरेपछि राष्ट्रपति सिरिसेनालाई काम गर्न गाह्रो हुने ठानिएको छ।
प्रधानमन्त्री विक्रमासिङ्घेले नयाँ वर्ष सन् २०१९ का लागि वार्षिक बजेट बनाउने विषय आफ्नो अहिलेको प्रमुख प्राथमिकता रहेको बताएका छन्। रासस/एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
