काठमाडौं– शुक्रबारबाट हलमा ३ नयाँ नेपाली फिल्म प्रदर्शनमा आएका छन्। अघिल्लो हप्ताबाट प्रदर्शनमा आएको ‘प्रसाद’ले दोस्रो हप्तामा प्रवेश गर्दा हलमा ३ नयाँ फिल्म प्रर्दशनमा आएका हुन्।
शुक्रबारबाट हल प्रवेश गरेका फिल्महरुमा ‘सुश्री सम्पत्ति’, ‘डोली’ र ‘कथा ७२’ हुन्।
सुश्री सम्पत्ति
सञ्चारकर्मी सुव्रत आचार्यको निर्देशनमा रहेको फिल्म ‘सुश्री सम्पत्ति’ शुक्रबारबाट प्रदर्शनमा आएको छ। कमेडी जनरामा निर्माण भएको फिल्ममा सलोन बस्नेत, बिनोद न्यौपाने, राजाराम पौडेल, प्रमोद अग्रहरि, विशारद बस्नेत, सारा सिर्पाली, सुनिता श्रेष्ठ ठकुरी लगायतको अभिनय रहेको छ भने फिल्ममा अभिनेत्री प्रियंका कार्कीले पनि एक आइटम गीतमा नृत्य गरेकी छन्।
फिल्ममा सम्पत्ति भएका सुश्रीका पछि दौडिँदा दुई युवाको जीवनमा देखापर्ने आरोह–अवरोहका पक्ष समेटिएका छन्। ‘हुकुम बक्सियोस्’ बोलको गीतबाट चर्चामा रहेको फिल्मको बुधबार स्पेसल शोको पनि आयोजना गरिएको थियो। जसमा फिल्मले चलचित्रकर्मी तथा दर्शकहरुको सकारात्मक प्रतिक्रिया प्राप्त गरेको थियो।
निर्देशक आचार्यकै लेखेनमा रहेको फिल्ममा विज्ञान राई, नुनम सुब्बा र रमन सिलाकारको लगानी रहेको छ।
‘कथा ७२’
फिल्म ‘कथा ७२’ पनि शुक्रबारबाट प्रदर्शनमा आएको छ। २०७२ सालको भुइँचालोले ल्याएको कम्पन र आमा–छोरा बीचको मनोवैज्ञानिक मनमुटावलाई केन्द्र बनाएर निर्माण भएको फिल्ममा प्रवीण स्याङ्बोको निर्देशन रहेको छ।
आकाश मगर, सुप्रिया राना, भुइसल लामा, पल्मो सन्जु तामाङ, केदार श्रेष्ठ, शारदा अधिकारी लगायतको अभिनय रहेको फिल्मलाई किम्फ फिल्म फेस्टिभलमा पनि प्रर्दशन गरिएको थियो।
‘डोली’
शुक्रबारबाट अर्को नयाँ फिल्म डोली पनि प्रर्दशनमा आएको छ। राजबहादुर सानेको लेखन तथा निर्देशन रहेको फिल्म डोलीमा पृथ्वीराज प्रसाईं, किशोर खतिवडा, अर्जुन गुरुङ, सानिया खान, संगीता नापित लगायतका कलाकारको अभिनय रहेको छ।
सामाजिक कथावस्तुमा आधारित फिल्ममा जय राम थापाको छायांकन, किरण नेपालीको निर्माण तथा सिडी विजय अधिकारीको संगीत सुन्न सकिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
