काठमाडौं- एभरेस्ट प्रिमियर लिग (इपिएल) टी-२० क्रिकेट प्रतियोगिताअन्तर्गत चितवन टाइगर्सले विराटनगर वारियर्सलाई ५ रनले पराजित गरेको छ। यसअघि लगातार ३ खेलमा पराजित भएको चितवनलाई जितले राहत मिलेको छ। यता ४ मध्ये २ खेलमा पराजित भएको विराटनगरका लागि भने अप्ठ्यारो पर्ने भएको छ।
अन्तिम खेलअघि विराटनगरको ४ अंक र चितवनको २ अंक भएको छ। अब दुवै टिमले प्लेअफमा स्थान पक्का गर्न अन्तिम खेल जित्नै पर्ने भएको छ।
चितवनले दिएको १ सय ९७ रनको लक्ष्य पछ्याएको विराटनगरले २० ओभरमा ८ विकेटको क्षतिमा १ सय ९१ रन मात्र जोड्न सक्यो।
विराटनगरलाई अन्तिम ओभरमा जितका लागि १८ रन चाहिएको स्थितिमा करण केसीले २ छक्का प्रहार गर्दा ४ बल डट खेले। करण २४ रनमा नटआउट रहे।
विराटनगरका ओपनर तथा कप्तान पारस खड्काले ललित भण्डारीबाट बोल्ड हुनुअघि १५ बलमा २ चौका र १ छक्कासहित १९ रन जोडे। अर्को ओपनर अनिलकुमार साह १३ बलमा १ चौका र १ छक्काको मद्दतमा १२ रन जोडे। उनलाई सागर ढकालले बोल्ड गरेका थिए। आसिफ शेखले ३० रनको योगदान दिए। विकेटकिपर ब्याट्सम्यान आसिफले २१ बलमा ३ छक्का प्रहार गरे।
विराटानगरबम लागि ९० रनको योगदान दिए। उनले ४२ बलमा ५ चौका र ८ छक्का हिर्काए। उनलाई चितवनका ललित भण्डारीले सागर ढकालबाट उत्कृष्ट क्याच गराएका थिए। लगत्तै ललितले हरि चौहानलाई बोल्ड गर्दै डकआउट गरे।
१९ औं ओभरमा सुमित महर्जन ७ रनमा रनआउटको सिकार बनेका थिए। लगत्तै भान माकेरेनलाई ललितले बोल्ड गर्दै डकआउटको सिकार बनाए।
बलिङमा चितवनका ललित भण्डारीले ४ विकेट लिए। उनले ४ ओभरमा २४ रन खर्चिए। सागर ढकालले ३ विकेट लिए। उनले ४ ओभरमा १ मेडन राख्दा २४ रन खर्चिए।
टस हारेर पहिले ब्याटिङ गरेको चितवनले ४ विकेटको क्षतिमा १ सय ९६ रन जोड्यो। चितवनका लागि विकेटकिपर ब्याट्सम्यान जोन सिम्पसनले ७८ रन बनाए। उनले ४४ बलमा ६ चौका र ५ छक्का प्रहार गरेका थिए। यस्तै दीपेन्द्रसिंह ऐरीले २२ बलमा ३ चौका प्रहार गर्दै ३२ रन जोडे। जर्ज स्टकले १० बलमा ३ छक्काको मद्दतमा नटआउट २४ रन बटुले।
त्यसअघि ओपनरद्वय पाउल स्टर्लिङ १५ रन र सन्दीप सुनार ३० रन जोडेर आउट भएका थिए। स्टर्लिङले २३ बल खेल्दा कुनै बाउन्ड्री प्रहार गर्न सकेनन्। उनलाई विराटनगरका कप्तान पारस खड्काले एलबिडब्लुको धरापमा पारेका थिए। सन्दीप सुनारले बसन्त रेग्मीबाट बोल्ड हुनुअघि २२ बलमा ६ चौका हिर्काए।
बलिङमा विराटनगरका करण केसी, बसन्त रेग्मी, भान मिकेरेन र पारस खड्काले १-१ विकेट लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
