इटहरी– मञ्चमा नेपाल संस्कृत विश्वविद्यालय अन्तर्गत पिण्डेश्वर विद्यापीठको ६७औँ वार्षिकोत्सवको ब्यानर टाँगिएको थियो। दर्शकदीर्घामा लहरै कुर्सी। तर कुर्सीमा बस्ने मान्छे कोही थिएनन्। बरु दायाँबायाँ उभिनेहरु थिए। उनीहरू दर्शकदीर्घामा बस्नभन्दा कार्यक्रम सञ्चालकले बोलाएपछि एकैचोटि मञ्चमा आसन ग्रहण गर्न आतुर देखिन्थे।
प्रमुख अतिथिका लागि बोलाइए नेपाल संस्कृत विश्वविद्यालयका उपकुलपति कुलप्रसाद कोइराला। उनको आसनग्रहणमा ताली बजेन। बरु उपस्थितहरु एकापसमा मुखामुख गर्न थाले।
कार्यक्रम सञ्चालकले लहरै अतिथिको नाम बोलाउँदै गए। अतिथिहरू पनि नमस्कार गर्दै मञ्चतिर लागे। त्यतिकैमा दर्शकदीर्घा लगभग खाली भयो। फाटफुट कर्मचारीबाहेक कोही देखिन छाडे।
कार्यक्रम हलभित्र कुनै उत्साह थिएन। बरु धेरैको मुहारमा आक्रोश झल्किरहेको थियो।
मञ्च पूरै भरियो। त्यसपछि सुरुभयो खैलाबैला। आफू फलानो पार्टीको प्रतिनिधि, फलानो सङ्गठनको नेता भन्दै आपसमै भनाभन सुरु भयो।
सबैलाई मञ्चकै कुर्सी चाहिने भयो। तर मञ्चमा स्थान थिएन। त्यतिकैमा क्याम्पसका सुरक्षा गार्डले दर्शकदीर्घाको कुर्सी मञ्चको नजिकै राखिदिए। त्यसपछि पुनः सुरु भयो कार्यक्रम।
वक्ताहरूले बोल्ने क्रम सुरु भयो। तर दर्शकदीर्घामा सुन्ने कोही भएनन्। करिब सय जना नियमित विद्यार्थी रहेको पिण्डेश्वर विद्यापीठको कार्यक्रममा दुई दर्जन पाहुना, केही प्राध्यापक र कर्मचारीको मात्र उपस्थिति थियो।
पुरस्कार वितरणको कार्यक्रम सुरु गर्न लागिएको सञ्चालकले जानकारी गराए। उकृष्ट विद्यार्थी, शास्त्रीमा प्रथम, वेदमा प्रथम लगायत विभिन्न विषयमा प्रथम हुने विद्यार्थीको नाम सञ्चालकले बताइरहे। तर पुरस्कार लिने कोही पनि विद्यार्थी मञ्चमा पुगेनन्। अर्थात् उनीहरु आएका थिएनन्।
कार्यक्रममा वक्ताहरूबीच घोचपेच सुरु भयो। अस्तव्यस्त बनेको विश्वविद्यालयप्रति इङ्गित गर्दै सबैले उपकुलपतिप्रति कटाक्ष गर्न थाले।
प्रगतिशील प्राध्यापक सङ्घका अध्यक्ष सुमन खतिवडाले उपकुलपति गद्दार रहेको बताए। उनले यसो भन्दै गर्दा उपकुलपति कोइराला नसुनेझैँ गरी पानी पिइरहेका थिए। त्यसपछि बोलेका प्रजातान्त्रवादी प्राध्यापक सङ्घका सभापति भवानी भट्टराईले उपकुलपतिकै कारण विश्वविद्यालय धराशायी भएको बताए।
कार्यक्रमको अन्त्यतिर बोलेका उपकुलपतिले आफू कुनै पनि हिसाबमा गलत भएको स्पष्टीकरण दिइरहे। तर कसैले पनि उनको कुरा ध्यान दिएर सुनेनन्। झोला मिलाउन र एकअर्कामा बिदाइ माग्न तयार थिए अन्य अतिथि।
कार्यक्रम स्थलबाहिर भेटिएका नेपाल विद्यार्थी सङ्घका इकाइ सभापति सरोज अधिकारीले विद्यार्थी सङ्गठनलाई बेवास्ता गरेको कारण विद्यार्थी नआएको बताए। विद्यार्थी सङ्गठनलाई प्रशासनले नमानेको कारण आफूहरूले त्यसको प्रतिकार गरेको उनको भनाइ थियो। उनीसँगै भेटिएका विद्यार्थी पुष्प पराजुलीले विश्वविद्यालय प्रतिभन्दा पनि दैनिकीप्रति विद्यार्थीहरू बढी सचेत रहनुपर्ने बाध्यता रहेको बताए।
उता क्याम्पस प्रमुख चन्द्रमणि नेपालले पुरस्कार लिन बोलाइएका विद्यार्थी उपस्थित नभएको बताए।
सुनसरीको धरानमा अवस्थित पिण्डेश्वर विद्यापीठको ६७ औँ वार्षिकोत्सव विद्यार्थीबिना सम्पन्न भएको हो।
औपचारिक कार्यक्रममै रस्साकस्सी चलेपछि कार्यक्रमपश्चात् उपकुलपति र प्रगतिशील प्राध्यापक सङ्घबीच छलफल भएको थियो। तर छलफलबाट पनि कुनै सकारात्मक प्रतिक्रृया नआएको प्रमुख नेपालले बताए।
राजनीतिक दाउपेचमा मारमा परेको संस्कृत विश्वविद्यालय पछिल्लो समय धराशायी बन्दै गएको छ। विद्यार्थी सङ्गठनदेखि प्राध्यापक र स्वयं उपकुलपति नै राजनीतिको आडमा गलत बाटोमा लागेका छन्। एकले अर्काको अस्तित्व स्वीकार गर्न नसक्दा निषेधको राजनीति सुरु भएको छ। फलस्वरूप विद्यार्थी स्वयम् विश्वविद्यालयको कार्यक्रम बहिष्कार गर्ने अवस्थामा पुगेका छन्।
पढ्नुस् यो पनि : अस्तव्यस्त संस्कृत विश्वविद्यालय : राजनीतिको चंगुलमा कर्मचारी, भाग खोज्दै विद्यार्थी संगठन
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।