काठमाडौं- एभरेस्ट प्रिमियर लिग (इपिएल) टी-२० क्रिकेट प्रतियोगितामा ललितपुर प्याट्रिओट्स लगातार तेस्रो जित निकाल्दै प्ले अफमा पुगेको छ। काठमाडौंले बुधबार कीर्तिपुरस्थित टियू मैदान भएको खेलको आफ्नो चौथो खेलमा काठमाडौं किंग्स ११ लाई १० विकेटले पराजित गरेको हो।
पहिलो खेलमा विराटनगर वारियर्ससँग पराजित भएको ललितपुरले त्यसपछि लगातार ३ खेलमा जित हात पारेको हो। यसअघि लगातार ३ खेलमा जित हात पारेको भैरहवा ग्लाडिएर्ट पनि प्लेअफमा पुगेको थियो।
काठमाडौंले बुधबार दिएको १ सय १० रनको लक्ष्य ललितपुरले विना विकेटको क्षतिमा १०.३ ओभरमा पार गर्यो। ललितपुरका लागि गौरव तोमारले नटआउट ८० रन र जयकिशन कोल्सावालाले नटआउट २७ रन जोडे। तोमारले ३५ बलमा ९ चौका र ५ छक्का प्रहार गरे। कोल्शावालाले २८ बलमा ४ चौका प्रहार गरे।
खेलमा काठमाडौंका नियमित कप्तान सोमपाल कामी र अमरसिंह रटेउला घाइते भएकाले मैदान उत्रिएका थिएनन्।
त्यसअघि टस जितेर पहिले ब्याटिङ गरेको काठमाडौंले कमजोर ब्याटिङको नमुना प्रस्तुत गर्यो। काठमाडौं १९.५ ओभरमा १ सय ९ रनमा अलआउट भयो। काठमाडौंका सुरुवाती ३ ब्याट्सम्यानले दोहोरो अंकमा रन जोड्न सकेनन्। पहिलो ओभरको पाँचौ बलमा ओपनिङ ब्याट्सम्यान सागर पुन डकआउट भए। उनलाई रासिद खानले कप्तान ज्ञानेन्द्र मल्लबाट क्याच गराए। लगत्तै नरेश बुढाऐर पनि रनआउटको सिकार हुँदा खाता नै खोल्न पाएनन्। अमित श्रेष्ठले ११ बलमा ६ रन जोडेर आउट भए।
काठमाडौंले चौथौ ओभर चल्दै गर्दा महत्वपूर्ण ३ विकेट गुमाउदा १३ रन मात्र जोड्न सकेको थियो। त्यसपछि दबाबमा आएको काठमाडौंका कप्तान केभिन ओ'ब्राइनले उत्कृष्ट ब्याटिङ गरे। अन्य ब्याट्सम्यानले उनलाई साथ दिन सकेनन्। राजु रिजाल ८ रन र सुब्रमन्यू आनन्द ९ रन जोड्दा पर्दिप साहुले खाता नै खोल्न पाएनन्।
केभिनले ३३ बलमा ४२ रनको योगदान गरे। उनले ३ चौका र २ छक्का हिर्काए। सांसद शेखले १० रन जोडे भने सिद्धान्त लोहनी २५ बलमा २१ रन जोडेर आउट भए। जितेन्द्र मुखिया अन्तिम बलमा ४ रनमा रनआउट हुदा चन्द्र पौडेलले नटआउट २ रन जोडे।
बलिङमा ललितपुरका पवन सर्राफले ३ विकेट लिए। उनले ४ ओभरमा २२ रन खर्चिए। योगेन्द्रसिंह कार्की र रासिद खानले २-२ विकेट लिए। सनी पटेलले १ विकेट हात पारे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
