काठमाडौं- एभरेस्ट प्रिमियर लिग (इपिएल) टी-२० क्रिकेट प्रतियोगितामा भैरहवा ग्लाडिएर्ट लगातार दोस्रो खेलमा विजयी भएको छ। भैरहवाले मंगलबार कीर्तिपुरस्थित टियू मैदान भएको खेलमा चितवन टाइगर्सलाई १२ रनले पराजित गरेको हो।
जारी लिगमा चितवनको यो लगातार तेस्रो हार हो। चितवन यसअघि पहिलो खेलमा ललितपुर तथा दोस्रो खेलमा काठमाडौंसँग पराजित भएको थियो। भैरहवाले भने पोखरा राइनोजलाई हराएको थियो। हारसँगै चितवन दबाबमा परेको छ। दोस्रो चरण पुग्न चिनवनले अब विराटनगर र पोखरालाई हराउनै पर्ने छ।
कीर्तिपुर मैदानमा मंगलबार भैरहवाले दिएको १ सय ४४ रनको लक्ष्य पछ्याएको चितवनले २० ओभरमा ९ विकेटको क्षतिमा १ सय ३१ रन मात्र जोड्न सक्यो।
चितवनका लागि ओपनर पाउल स्टर्लिङले २३ बलमा ३८ रन जोडे। उनले २३ बलमा ५ चौका र २ छक्का प्रहार गरे। अर्को ओपनर भने सन्दीप सुनार भने ९ रन बनाएर खेलिरहदा भुवन कार्कीको बलमा एलबिडब्लूको धरापमा परे। कप्तान पृथु बाँस्कोटाले ३ रन भन्दा बढी जोड्न सकेनन्। दीपेन्द्रसिंह ऐरी ३ रनमै आउट हुँदा भीम सार्की रन नै जोड्न नपाइ रनआउटको सिकार भए।
चितवनको स्कोरबोर्डलाई गति दिएका जोन २६ रनमा आउट भए। २२ बलमा २ छक्का प्रहार गरेका उनलाई भैरहवाका कप्तान शरद भेषवाकरले बोल्ड गरेका थिए। लगत्तै अर्को ओभरमा जर्ज स्कट २ रनकै झिनो स्कोरमा आउट भएका थिए। यस्तै दिलीप नाथलाई पनि १२ रनमा भेषवाकरले आउट गरेपछि चितवन दबाबमा परेको थियो। ललित भण्डारी ४ रनमा आउट भए। सहाव अलामले २४ बल खेलेर नटआउट १६ रन जोडेपनि जितका लागि पर्याप्त हुन सकेन।
चितवनलाई रोक्ने क्रममा भैरहवाका स्पिनर चले। कप्तान सरद भेषवाकर र रवि इन्दर सिंहले २-२ विकेट हात पारे। रायन टेन, भुवन कार्की र अभिनास बोहोरोले १-१ विकेट लिए। यस्तै भैरहवाले चितवनका २ ब्याट्सम्यानलाई रनआउटको सिकार बनायो।
त्यसअघि टस हारेर पहिले ब्याटिङ गरेको भैरहवा ३ बल खेल्न बाँकी छदा १ स य ४३ रनमा अलआउट भयो। भैरहवाका लागि ओपनर प्रदीप ऐरीले १८ बलमा ३ चौका र १ छक्काको मद्दतमा २६ रन जोडे। अर्को ओपनर कुशल मल्ललाई ३ रनमै बोल्ड गरेका थिए। रवि इन्दर सिंहले २१ बलमा २५ रनको योगदान गरे।
रायन टेन डोस्काटे आउट हुनुअघि ३५ रन जोडे। डोस्काटले १ चौका र ३ छक्का प्रहार गरेका थिए। कप्तान शरद भेषवाकर १ रनमा रनआउटको सिकार बनेका थिए। आरिफ शेखले २० बलमा १८ रन, पुनित मेहराले १२ रन, रोहित कुमार पौडेललि ४ रन,कृष्ण कार्कीले ९ रन जोडेका थिए भुवन कार्की र अभिनास बोहोराले खाता खोल्न सकेनन्।
बलिङमा चितवनका सागर ढकालले ३ विकेट लिन सफल भए। सागरले ४ ओभरमा २७ रन जोडे। यस्तै जर्ज स्कटले २ विकेट लिए भने पाउल स्टर्लिङ्, दीपेन्द्रसिंह ऐरी र ललित भण्डारीको नाममा १-१ विकेट रह्यो।
तस्बिर : भैरहवा ग्लाडिएटर्स
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
