काठमाडौं- एभरेस्ट प्रिमियर लिग (इपिएल) टी-२० क्रिकेट प्रतियोगिताको रोमान्चक खेलमा विराटनगर वारियर्सले पोखरा राइनोजविरुद्ध जित हात पारेको छ। मंगलबार भएको खेलमा विराटनगरले पोखरालाई सुपर ओभरमा पराजित गरेको हो। जारी लिगमा पोखराको यो लगातार तेस्रो हार भने विराटनगरको यो लगातार दोस्रो जित हो।
सुपर ओभरमा २१ रनको लक्ष्य पछ्याएको पोखराका लागि ब्याटिङ गर्न रिचार्ड लेभी र विनोद भण्डारी आएका थिए। बलिङमा विराटनगरका लागि भान डर मर्वी थिए। जसमा पहिलो बलमा लेभीले रन लिन सकेनन्। दोस्रो बलमा उनले १ रन लिए। तेस्रो बलमा विनोद भण्डारीले छक्का प्रहार गरे। चौथो बलमा भण्डारीले १ विकेट लिए। पाँचौ बलमा लेभीले १ रन लिए। छैटौं बलमा भण्डारीले चौका प्रहार गरे पनि जितका लागि पर्याप्त हुन सकेन। सुपर ओभरमा पोखराले १३ रन मात्र जोड्न सक्यो।
सुपर ओभरमा विराटनगरका लागि ब्याटिङ गर्न कप्तान पारस खड्का र करण केसी आएका थिए। बलिङमा पोखराका पाउल काउलिन थिए। सुपर ओभरको ६ बल नै करण केसीले ब्याटिङ गरे। उनले पहिलो बलमा २ रन, दोस्रो बलमा २ रन, तेस्रो बलमा छक्का, चौथो बलमा २ रन, पाँचौ बलमा छक्का र छैटौं बलमा २ रन प्रहार गर्दै २० रन जोडेका थिए।
पहिले ब्याटिङ गरेको पोखराले ७ विकेटको क्षतिमा ८४ रन जोडेको थियो। जवाफी ब्याटिङ गरेको विराटनगर ३ बल खेल्न बाँकी छदा ८४ रनमै अलआउट भयो।
खराब सुरुवात गरेको विराटनगरका ओपनिङ ब्याट्सम्यान तेस्रो बलमा रन नै जोड्न नपाइ आउट भए। उनलाई पोखराका विपिन खत्रीले पेभलियनको बाटो देखाए।
दोस्रो ओभरको पहिलो बलमा ओपनिङमा आएका कप्तान पारस खड्का पनि १ रनको झिनो स्कोरमा सुसन भारीबाट आउट भए। आसीफ शेख १३ बलमा ४ चौकाको मद्दतमा १९ रन बनाएर आउट भए। स्मित पटेल ८ रन र भान डेर मार्वी ११ रनमा आउट भए। रोबिन क्षेत्रिले १२ रन जोडे भने सुमीत महर्जनले ४ रन भन्दा बढी जोड्न सकेनन्। करण केसी १५ रन र हरि चौहान १२ रनआउट रहे। जितका लागि १ रन चाहिएको अवस्थामा अन्तिम ओभरको तेस्रो बलमा पाउल भान १ रनमा आउट भएपछि खेलमा रन बराबरी भएको थियो। पाउल अन्तिम विकेटको रुपमा आउट भएपछि खेल सुपर ओभरमा पुगेको थियो।
अन्तिम ओभरमा विराटनगरलाई जितका लागि २ रन चाहिएको थियो भने हातमा १ विकेट बाँचेको थियो। यो अवस्थामा बलिङमा आएका थिए पोखराका विक्रम शोव। स्ट्राइकमा रहेका हरि चौहानले पहिलो बलमा १ रन लिए। दोस्रो खलमा पाउल भानले रन लिएनन्। तेस्रो बलमा भानलाई विक्रमले किशोर महतोबाट क्याच गराउदा खेल टाइ भएको थियो।
बलिङमा पोखराका विपिन खत्रीले ३ विकेट लिए। सुसन भारी, विक्रम शोव र पाउल काउलिनले २-२ विकेट लिए। शक्ति गौचनको नाममा १ विकेट रह्यो।
त्यसअघि टस हारेर पहिले ब्याटिङ गरेको पोखराले कमजोर ब्याटिङको नमुना प्रस्तुत गर्यो। पोखराले २० ओभरमा ७ विकेटको क्षतिमा ८४ रन जोड्न सक्यो। पोखराका लागि सुरुवातका तीन ब्याट्सम्यान सस्तैमा आउट भएका थिए। अघिल्ला २ खेलमा उत्कृष्ट लयमा देखिएका रिचार्ड लेभी ३ रनमा आउटका थिए। त्यसअघि पहिलो ओभरको अन्तिम बलमा कप्तान केल कोइजर ४ रनमा आउट भए। दुवैलाई विराटनगरका भान डेर मार्वीले आउट गरेका थिए। लेभी आउट हुनुअघि पोखराका विकेटकिपर सुभेन्दु पाण्डे डकआउट भएका थिए।
लगातार तेस्रो विकेट गुमाएको पोखराले चौथो ओभरमा विनोद भण्डारीलाई १ रनमै गुमायो। भण्डारी पाँचौ बलमा बसन्त रेग्मीको बलमा विकेट पछाडि सुभेन्द्र पाण्डेबाट समातिएका थिए।
पहिलो ४ ओभरमा ४ विकेट गुमाएपछि दबाबमा आएको पोखराका लागि पाउल काउलिनले २७ बलमा २० रन जोडेपछि रहात मिलेनको थियो।
राजेश पुलामी मगरले ३५ बलमा १७ रन जोडे भने सुसन भारी ८ रनमा आउट भए। विक्रम शोव ५ रन तथा शक्ति गौचन ३ रनमा नटआउट रहे।
बलिङमा विराटनगरका भान माकेरेनले ३ विकेट लिए। उनले ४ ओरभमा १७ रन खर्चिए। यस्तै भान मार्वीले २ विकेट हात पार्दा बसन्त रेग्मी र स्मित पटेलले १-१ विकेट हात पारे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
