काठमाडौं– परराष्ट्रमन्त्री प्रदीप ज्ञवालीले मानवअधिकारको पूर्ण प्रत्याभूति दिलाउन राज्यका सबै निकायको साझा प्रयासको जरुरी रहेको बताएका छन्।
परराष्ट्रमन्त्री ज्ञवालीले नेपालको संविधान मानवअधिकारका दृष्टिले विश्वमा अत्यन्तै प्रगतिशील संविधानको कोटीमा रहेपनि त्यसको सफल कार्यान्वयन सरकार एक्लैको प्रयासबाट सम्भव नहुने पनि स्पष्ट पारे।
अन्तर्राष्ट्रिय मानवअधिकार दिवसको अवसर पारेर पूर्व राजदुत शम्भुराम सिंखडाको पुस्तक ‘ह्युमन राइट्स ः ह्युमन रङ्स’ नामक पुस्तकको सोमबार काठमाडौंमा विमोचन गर्दै उनले नेपालले मानव अधिकारको विश्वव्यापी मूल्य मान्यतालाई आत्मासात गरिरहेको दाबी गरे। परराष्ट्रमन्त्री ज्ञवालीले मानवअधिकारसँग सम्बन्धित संविधानमा उल्लेख गरिएका अधिकार कार्यान्वयन चुनौतिपूर्ण रहेको उल्लेख गर्दै त्यसको सफल कार्यान्वयनका लागि सम्बन्धित सबै पक्षलाई सहकार्य गर्न पनि आह्वान गरे।
परराष्ट्रमन्त्री ज्ञवालीले विश्वमा विद्यमान गरिबी र आतंकवाद मानवअधिकारको प्रत्याभूति गराउन मुख्य चुनौतीको रुपमा रहेको उल्लेख गर्दै त्यसलाई हल गरेर अघि बढ्न अन्तर्राष्ट्रिय समुदायबीच बलियो सहकार्यको आवश्यकतामा पनि जोड दिए। त्यस अवसरमा उनले दिगो विकास लक्ष्य हासिल गर्न नेपालसँग स्रोतको अभाव रहेको पनि स्मरण गराए।
पुस्तकमा मानवअधिकारको प्रत्याभूति गराउन गरिएको अन्तर्राष्ट्रिय प्रयास र त्यसका व्यवधानका विषयमा चर्चा गरिएको छ। परराष्ट्रमन्त्री ज्ञवालीले नेपालको मानवअधिकारको संरक्षणका लागि पुस्तक उपयोगी हुने विश्वास पनि व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
