काठमाडौं- एभरेस्ट प्रिमियर लिग (आइपिएल) टी-२० क्रिकेट प्रतियोगितामा चितवन टाइगर्स लगातार दोस्रो खेलमा पराजित भएको छ। चितवनलाई सोमबार भएको खेलमा काठमाडौं किंग्स ११ ले ६ विकेटले पराजित गरेको हो। काठमाडौंको यो विजयी सुरुवात हो। चितवन भने आइतबार ललितपुर प्याट्रिओट्ससँग पराजित भएको थियो।
१ सय ६१ रनको लक्ष्य काठमाडौंले १८.५ ओभरमा ४ विकेटको क्षतिमा पार गर्यो। काठमाडौंका लागि ओपनिङ ब्याट्सम्यानद्वय अमित श्रेष्ठले १८ रन र सागर पुनले ३९ रन जोडे। अमितले २४ बलमा २ चौका र सागरले ३४ बलमा ६ चौका प्रहार गरे। सागर र अमितबीच पहिलो विकेटका लागि ३६ रनको साझेदारी भयो।
केभिन ओ'ब्रायन ९ रनमै आउट भइका थिए। नरेश बुढाऐरले २९ बलमा २२ रन जोड्दै काठमाडौंलाई जिततर्फ अघि बढाए। काठमाडौंका सुब्रमन्युन आनन्द १६ बलमा नटआउट ४३ र अमरसिंह रटेउलाले १२ बलमा नटआउट २१ रन जोडेपछि काठमाडौंले सहज जित हात पारेको हो।
बलिङमा चितवनका साहब अलामले २ विकेट लिए। पाउल स्टर्लिङ र ललित भण्डारीले १-१ विकेट लिए।
त्यसअघि टस हारेर पहिले ब्याटिङ गरेको चितवन १ बल खेल्न बाँकी छदा १ सय ६० रनमा अलआउट भयो। चितवनका लागि ओपनिङमा आएका पाउल स्टर्लिङले १३ बलमा ३४ रन बटुले। उनले समान ३-३ चौका र छक्का प्रहार गरे। सन्दीप सुनारले २५ रन बटुले । उनले १९ बलमा ५ चौका प्रहार गरे।
तर जोन सिमसनले भने शून्य रनमै आउट भए। कप्तान दीपेन्द्रसिंह ऐरीले ४० बलमा चौकाको मद्दतमा ४५ रनको योगदान दिए। जर्ज स्टकले १५ रन र पृथु बास्कोटाले २० रन जोडेका थिए भने अन्य ब्याट्सम्यान दोहोरो अंकमा रन जोड्न नपाइ आउट भए।
बलिङमा काठमाडौंका सांसद शेखले ३ विकेट लिए। पर्दिप साहुले पनि ३ विकेट हात पारे। सागर पुन, केभिन ओ'ब्रायन र अमरसिंह रटेउलाको नाममा १- १ विकेट रह्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
