काठमाडौं– नागरिक समाजका अगुवाहरुले भ्रष्टाचार नियन्त्रणका लागि ‘उच्चस्तरीय सम्पत्ति छानबिन आयोग’ गठन गर्न सरकारसँग माग गरेका छन्।
भ्रष्टाचारविरुद्ध ऐक्ववद्ध नागरिक समाजले आइतबार प्रधानमन्त्री केपी शर्मा ओलीलाई ध्यानाकर्षण पत्र बुझाउँदै भ्रष्टाचार नियन्त्रणका लागि उच्चस्तरीय सम्पत्ति छानबिन आयोग गठन गर्न माग गरेको हो।
भ्रष्टाचार विरुद्धको अन्तर्राष्ट्रिय दिवसको अवसर पारेर प्रधानमन्त्री ओलीलाई भेट्न सिंहदरबार पुगेका समाजका पदाधिकारीहरुले भ्रष्टाचार नियन्त्रणका लागि अख्तियार दुरुपयोग अनुसन्धान आयोगलाई प्रभावकारी बनाउन पनि सरकारको ध्यानाकर्षण गराएका छन्। भ्रष्टाचारको डरलाग्दो अवस्थाबाट मुलुकलाई जोगाउन तत्काल उच्चस्तरीय सम्पत्ति छानबिन आयोग गठन गर्न सरकारसँग माग गरिएको भ्रष्टाचारविरुद्धका अभियन्ता केदार खड्काले जानकारी दिए।
सार्वजनिक पदधारण गरेका व्यक्तिहरुको सम्पत्तिछानबिन गरेपछि मात्रै भ्रष्टाचार नियन्त्रण गर्ने प्रयास सफल हुने समाजको निष्कर्ष छ। समाजले प्रदेश र स्थानीय तहमा भ्रष्टाचार हुन नदिन तत्काल कानुनी संरचना तयारी पारी कार्यान्वयनमा लैजान पनि प्रधानमन्त्री ओलीलाई सुझाव दिएको छ। सरकारले भ्रष्टाचार नियन्त्रणका लागि शून्य सहनशीलताको नीति लिएपनि त्यसलाई सशक्त ढंगले कार्यान्वयनमा ल्याउन नसकेकोमा समाजको असन्तुष्टि छ।
यता, प्रधानमन्त्री ओलीले भ्रष्टाचार नियन्त्रणका लागि आफू प्रतिबद्ध रहेको बताए। उनले भ्रष्टाचार नियन्त्रणका लागि आफूले असहिष्णु नीति लिएको र त्यसलाई प्रभावकारी कार्वान्वयन गर्न पूरै शक्तिका साथ काम गर्ने प्रतिवद्धता पनि व्यक्त गरे।
प्रधानमन्त्री ओलीले देश बनाउने अभियानमा सरकार जुटेको उल्लेख गर्दै त्यसमा साथ दिन पनि सबैलाई आह्वान गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
