सुर्खेत- ‘मन्त्रीज्युहरुले यति निम्न स्तरको सोचाइ र शैली प्रस्तुत गर्नुहोला भनेर मैले कल्पना पनि गरेको थिइन।’
_x000D_
_x000D_
बुधवार बसेको कर्णाली प्रदेशसभाको वैठकमा बोल्दै सांसद विन्दमान विष्टले भने, ‘पहिले पारित गरिएको बजेटमा एउटा कार्यक्रम छ र अहिले रकम छुट्याउँदा त्यो बजेटको कुनै शीर्षक नै छैन। मन्त्रीहरुलाई जेजे मन लाग्यो त्यसरी नै अघि बढ्ने हो भने समृद्धि प्रदेश कसरी बन्छ?’
_x000D_
_x000D_
संसदमा जति आक्रामक बनेर सरकारको आलोचना गरिरहेका थिए प्रतिपक्षी दल नेपाली कांग्रेसका सांसद जीवनबहादुर शाही, त्यति नै आक्रामक देखिए सरकारकै नेतृत्व गरिरहेको नेपाल कम्युनिस्ट पार्टी (नेकपा) का सांसद विष्ट। उनले बजेट पारित गर्दा मन्त्रीहरुलाई विश्वास गरेर आफूहरुले धोका पाएको टिप्पणी गरे। ‘बजेट पास गर्ने बेलामा कार्यक्रमिक रुपमा पास नगरौं कि भन्ने कुरा भएको थियो तर मन्त्रीहरुलाई हामीले विश्वास गर्यौं। बजेटमा जे जसरी कार्यक्रम ल्याइएको छ त्यसैको वरिपरि रहेर रकम छुट्याउनुहोला भन्ने लागेको थियो। तर यति निम्न स्तरको सोच र शैली प्रस्तुत गर्नुहोला भनेर मैले कल्पना पनि गरेको थिइनँ।’
_x000D_
_x000D_
नेकपाकै अर्का सांसद ठम्मरबहादुर विष्टले मन्त्री र मन्त्रीहरुकै आसेपासेको वरिपरि बजेट घुमेको टिप्पणी गरे। मन्त्रीकै मनपरीमा बजेट बाँडफाँट गरिएको प्रति असन्तुष्टि व्यक्त गर्दै उनले सरकारको पाँचवर्षे कार्यकालमा आफू पनि मन्त्री भएर आफ्नो क्षेत्रका लागि बजेट ल्याउन पाउने व्यवस्था गरिदिन आग्रह गरे। विष्टले मन्त्रीहरुले म आफै नै राज्य हुँ भन्ने अहंकारसहितको बजेट ल्याएको टिप्पणी गरे। रकम विनियोजनको अवस्था हेर्दा आफूलाई लाज लागेको भन्दै उनले सरकारको यति गति र मतिले समृद्धि प्रदेश बनाउन नसकिने जिकिर गरे।
_x000D_
_x000D_
सांसद पद्मा खड्काले सरकारले बजेट विनियोजन गर्दा प्रत्यक्ष निर्वाचित र समानुपातिक सांसदहरुबीच विभेद गरेको आरोप लगाइन्। साथै उनले वडाहरुले छनोट गर्नुपर्ने योजनामा प्रदेश सरकारले बजेट छरेको भन्दै यसलाई सच्याएर कार्यान्वयन गर्न सुझावसमेत दिइन्।
_x000D_
_x000D_
प्रदेशसभाको वैठकमा बोल्दै नेकपाका सांसदहरु अम्मरबहादु थापा, पदमबहादुर रोकाय, गोपाल शर्मा लगायतले पनि सरकारको चर्को आलोचना गर्दै बजेट कार्यान्वयनमा मन्त्रीहरुको मनपरी नभई सांसदहरुलाई पनि सँगसँगै लगेर जान सुझाव दिएका थिए।
_x000D_
_x000D_
वडाअध्यक्ष हुने व्यक्ति मन्त्री!
_x000D_
प्रमुख प्रतिपक्षी दल नेपाली कांग्रेसका सांसद जीवनबहादुर शाहीले सरकारको कडा आलोचना गरेका छन्।
_x000D_
_x000D_
बुधवारको संसद बैठकमा उनले वडा सदस्य र अध्यक्ष हुनुपर्ने व्यक्तिहरु अहिले कर्णाली प्रदेशको मन्त्री बनेको टिप्पणी गरे। प्रतिपक्षी दलको नेता शाहीले मन्त्रीहरुको क्षमतामाथि प्रश्न गरेका छन्। झट्ट हेर्दा पढेलेखेका, बौद्धिक व्यक्तिजस्तो देखिए पनि मन्त्रीहरु भित्रैदेखि खोक्रो भएको उनको भनाइ थियो। ‘बाहिरबाट हेर्दा हिमालजस्तै टल्कने हुनुहुन्छ तर भित्र धमिराले खाइसकेको रहेछ,’ शाहीले भने। मन्त्रीहरुप्रति आक्रामक देखिएका सांसद शाहीले थपे, ‘अहिलेका मन्त्रीहरुलाई बरु वडा अध्यक्ष वा सदस्य बनाएको भए पो राम्रो हुने थियो कि? किनकि उहाँहरुको दायित्व वडामा सीमिति भएको छ।’
_x000D_
_x000D_
शाहीले कहिले सिधा र कहिले व्यंग्यात्मक रुपमा सरकार र मन्त्रीहरुको आलोचनामै आफ्नो अधिकांश समय खर्चिए। सरकारले ल्याएको रातो किताबमाथि व्यंग्य गर्दै शाहीले भने, ‘सरकारले जुन कुरा रातो किताबमा ल्याएको छ, हामीलाई खुसी लागेको छ। म यति खुसी भएको छु कि संविधान लेख्दा मुलुकलाई समाजवाद उन्मुख भनेर लेखिएको थियो तर हाम्रो प्रदेश त समाजवाद होइन साम्यवादी भइसकेको रहेछ।’
_x000D_
_x000D_
उनको व्यंग्य यतिमै रोकिएन। थपे, ‘मन्त्रीज्युहरु सरकार गतिशिल छ भन्नुहुन्छ। यति गतिशील सरकारका छ कि ५० मिटर बाटो आठ महिनामा बन्दैन। यस्तो गतिशीलले कर्णाली प्रदेशको विकास कहिले हुन्छ?’ भाषणमा प्रदेशलाई समृद्ध बनाउने, सुरुङमार्गदेखि रेलमार्ग बनाउनेसम्मका गफ गरे पनि व्यवहारमा कुनै काम हुन नसकेको आरोप शाहीको थियो। उनले सपना देख्नु राम्रो भए पनि विपनामा परिणत हुन नसक्ने सपनाले उँभो गति नलागिने जिकिर गरे।
_x000D_
_x000D_
बजेटको बाँडफाँटमा पनि विभेद भएको शाहीको भनाइ थियो। उनले मन्त्री र सरकारको भूमिकाप्रति पनि प्रश्न उठाए। ‘मन्त्री र सरकार सदनप्रति उत्तरदायी देखिएन। मेरो बाजेको सम्पत्ति हो अहिले मेरो हातमा आएको छ मैले मनपरी बाँड्न पाउनुपर्छ भनेजसरी गरिरहेका छन्,’ उनले भने, ‘एउटा रातो किताब ल्याउनका लागि चार महिना लाग्ने देखियो। बौद्धिक सर्कलले ल्याउने योजना यस्तै हुन्?’
_x000D_
_x000D_
शाहीले बोलेर मात्रै समृद्धि नआउने भन्दै हिमाली जिल्लाहरुमा सयमै योजना कार्यान्वयन गर्नेतर्फ सरकार गम्भीर नहुनु दु:खद भएको बताए। योजना छनौटमा पनि कमजोरी औल्याउँदै उनले भने, ‘योजनाहरु हेर्यो भने चक्कर आएर ढल्ने अवस्था छ। मन्त्रीहरु यति मितव्ययी छन् कि गाउँको मेला हेर्न हेलिकोप्टर चढेर जानुहुन्छ।’
_x000D_
_x000D_
आफ्ना कति पुस्ताका नातेदार छन् भनेर हेरेर बजेट विनियोजन गरिएको र भ्रष्टाचारलाई पोस्ने बजेट आएको भन्दै आपत्ति जनाए। साथै उनले अब यो सरकारले केही गर्ला भन्ने आशा र भरोसा नै नरहेको टिप्पणी पनि गरे। ‘सरकारको यही किसिमको रवैया रहने हो भने हामीले विशेष ढंगले सोच्नुपर्ने हुन्छ,’ उनले सदनमार्फत सरकारलाई चेतावनी दिए। त्यति मात्र होइन उनले मुख्यमन्त्री महेन्द्रबहादुर शाही निरीह बनेको टिप्पणी गर्दै भने, ‘कठै मुख्यमन्त्रीज्यु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
