काठमाडौं– म्यान्मारको पश्चिमी रखाइन राज्यमा सेनाले लडाकु विमानबाट भीषण हवाई हमला गर्दा कम्तीमा ४९ जनाको मृत्यु भएको छ ।
विद्रोही समूह ‘अराकान आर्मी’ को नियन्त्रणमा रहेको क्षेत्रमा सोमबार भएको उक्त आक्रमणमा ५८ जना घाइते भएका छन् ।
अराकान आर्मी र उद्धार टोलीका अनुसार क्याउक्ताव टाउनसिपस्थित एक व्यस्त स्थानीय थोक बजारलाई निशाना बनाएर लडाकु विमानले दुईवटा बम खसालेको थियो । बम विस्फोटमा परी ज्यान गुमाउनेमा सर्वसाधारण व्यापारी, किनमेलका लागि आएका ग्राहक र पैदलयात्रीहरू रहेका छन् । घाइतेमध्ये २२ जनाको अवस्था अत्यन्तै गम्भीर रहेको जनाइएको छ ।
उद्धार कार्यमा खटिएका वरिष्ठ अधिकारी वाई हुन आङका अनुसार उक्त बजार रखाइन राज्यकै प्रमुख व्यापारिक केन्द्र मानिन्थ्यो। आक्रमणपछि सार्वजनिक भएका तस्बिर तथा भिडियोहरूमा बजार क्षेत्रका घरहरूमा भीषण आगो लागेको, सवारीसाधनहरू क्षतिग्रस्त भएका र नजिकैको पुल भत्किएको देखिएको छ।
अराकान आर्मीले आफ्नो नियन्त्रित क्षेत्रमा भएको आक्रमणलाई नागरिकमाथिको गम्भीर बर्बरता भन्दै जिम्मेवार सैन्य निकायविरुद्ध कडा जवाफी कारबाही गर्ने चेतावनी दिएको छ । यद्यपि, घटनाबारे म्यान्मारको सैन्य सरकार (जुन्ता) ले तत्काल कुनै औपचारिक प्रतिक्रिया दिएको छैन ।
सन् २०२१ फेब्रुअरी १ मा आङ सान सुकीको निर्वाचित सरकारलाई ढालेर सेनाले सत्ता कब्जा गरेयता म्यान्मारमा गृहयुद्ध जारी छ । रखाइन राज्यका १७ मध्ये १४ टाउनसिपमा नियन्त्रण कायम गरेको दाबी गर्ने अराकान आर्मी र सेनाबिच पछिल्लो समय भिडन्त थप चर्किएको छ । सेनाले हवाई हमला बढाउँदा र व्यापारिक मार्गहरू ठप्प पार्दा रखाइन क्षेत्रमा खाद्यान्न तथा औषधिको चर्को अभाव सिर्जना भएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
