न्युयोर्क — प्रधानमन्त्री वालेन्द्र शाहले नेपालमा आएको विनाशकारी बाढीलाई विश्वका लागि गम्भीर जलवायु चेतावनीका रूपमा लिन अन्तर्राष्ट्रिय समुदायलाई आग्रह गरेका छन्।
संयुक्त राष्ट्रसंघको ८१औं महासभालाई बिहीबार सम्बोधन गर्दै प्रधानमन्त्री शाहले चार साताअघि हिमाली समुदायमा आएको बाढीका डरलाग्दा दृश्यले विश्वलाई जलवायु संकटको गम्भीरता देखाएको बताए। उनले उक्त विपत्तिलाई धेरैले ‘हिमालयन सुनामी’ भनेको उल्लेख गर्दै भोटेकोशी–त्रिशूली विपत्ति नेपालका लागि मात्र नभई विश्वकै लागि चेतावनी भएको बताए।
‘के हामीले त्यो चेतावनी वास्तवमै सुनेका छौं?’ उनले अन्तर्राष्ट्रिय समुदायसमक्ष प्रश्न गरे।
उनले तातिँदो जलवायुले हिमालयको नाजुक पारिस्थितिक प्रणालीलाई अस्थिर बनाइरहेको बताए। हिमनदीमुनिको पर्माफ्रस्ट पग्लिँदा पहाडी भिरालामा चिरा पर्ने, हिमपहिरो, बाढी र पहिरोको जोखिम बढ्ने उनको भनाइ छ।
प्रधानमन्त्री शाहले जलवायु परिवर्तनले सीमा नचिन्ने भन्दै नेपाल, भारत र चीनबीच थप सहकार्य आवश्यक रहेको बताए। उनले हिमालयलाई अन्तर्राष्ट्रिय सहकार्यको प्रयोगशाला बनाउनुपर्ने धारणा राखे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
