जुम्ला– हिमालको काखमा रहेको जुम्लामा अब क्रिकेटको नयाँ अध्याय सुरु हुने भएको छ। समुद्री सतहदेखि करिब २ हजार ४ सय मिटर उचाइमा रहेको हाकुँ क्रिकेट मैदानमा पहिलोपटक हाई अल्टिच्युड ओपन टी–२० क्रिकेट प्रतियोगिता आयोजना हुने भएको हो।
‘कर्णाली प्रिमियर लिग (केपीएल)’ नाम दिइएको प्रतियोगिता युथ फर कर्णाली क्लबले आयोजना गर्न लागेको हो। उच्च उचाइमा रहेको मैदानमा देशभरका खेलाडीलाई प्रतिस्पर्धा गराउँदै जुम्लालाई क्रिकेटको नयाँ गन्तव्यका रूपमा चिनाउने आयोजकको तयारी छ।
युथ फर कर्णालीका अध्यक्ष मनोज भारतीका अनुसार जुम्ला र समग्र कर्णालीमा क्रिकेटको विकाससँगै स्थानीय प्रतिभाको पहिचान र प्रवर्द्धन गर्ने उद्देश्यले प्रतियोगिता आयोजना गर्न लागिएको हो। उनका अनुसार देशभरका खेलाडीलाई उच्च उचाइको मैदानमा खेल्ने अनुभव दिलाउनु पनि प्रतियोगिताको अर्को उद्देश्य हो।
हिमाली भूगोल, चिसो मौसम र करिब २ हजार ४ सय मिटरको उचाइमा हुने क्रिकेटले प्रतियोगितालाई अन्य प्रतियोगिताभन्दा फरक बनाउने आयोजकको अपेक्षा छ। खेलाडीका लागि यो केवल प्रतिस्पर्धा नभई उच्च उचाइमा क्रिकेट खेल्ने विशेष अनुभवसमेत बन्नेछ।
प्रतियोगितालाई खेलकुदमा मात्रै सीमित नराखी जुम्लाको पहिचान र पर्यटन प्रवर्द्धनसँग जोड्ने तयारी गरिएको छ। क्रिकेट हेर्न देशका विभिन्न ठाउँबाट खेलाडी, प्रशिक्षक तथा दर्शक जुम्ला पुग्ने र त्यसले स्थानीय पर्यटन गतिविधिलाई समेत चलायमान बनाउने आयोजकको विश्वास छ।
प्रतियोगिताको विजेताले १ लाख रुपैयाँ तथा उपविजेताले ५० हजार रुपैयाँ पुरस्कार पाउनेछन्। विजेता र उपविजेता टोलीका खेलाडीलाई पदक प्रदान गरिनेछ। प्रतियोगितामा उत्कृष्ट प्रदर्शन गर्ने खेलाडीका लागि थप पुरस्कारको समेत व्यवस्था गरिएको आयोजकले जनाएको छ।
क्रिकेट खेलाडी महेश हमालले जुम्लामा राष्ट्रियस्तरको क्रिकेट प्रतियोगिताको अवधारणा अघि बढ्नु स्थानीय खेलाडीका लागि महत्वपूर्ण अवसर भएको बताए। उनका अनुसार यस्ता प्रतियोगिताले स्थानीय खेलाडीलाई राष्ट्रियस्तरका खेलाडीसँग प्रतिस्पर्धा गर्ने अवसर दिनुका साथै उनीहरूको क्षमता पहिचान गर्न सहयोग पुर्याउन सक्छ।
जुम्लामा क्रिकेटको संरचना र सम्भावनालाई राष्ट्रिय बहसमा ल्याउने प्रयासका रूपमा समेत प्रतियोगितालाई हेरिएको छ। उच्च उचाइको मैदानमा हुने प्रतियोगिताले जुम्लाको क्रिकेटलाई नयाँ पहिचान दिन सक्ने आयोजकको अपेक्षा छ।
प्रतियोगिताका खेलहरू नेपाल लाइभमार्फत प्रत्यक्ष प्रसारण गर्ने तयारीसमेत गरिएको छ। यसले जुम्लाको मैदान र यहाँको क्रिकेटलाई देशभरका दर्शकमाझ पुर्याउनेछ।
हिमाली भूगोलमा क्रिकेटको नयाँ गन्तव्य बनाउने लक्ष्यसहित हुन लागेको केपीएलले जुम्लाको खेलकुदलाई मैदानभित्रको प्रतिस्पर्धाबाट पर्यटन र पहिचानसँग जोड्ने प्रयास गरेको छ। अब चुनौती मैदानमा उत्रिने खेलाडीको मात्रै होइन, २ हजार ४ सय मिटर उचाइमा क्रिकेटको नयाँ सम्भावना प्रमाणित गर्ने आयोजकको पनि हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790066546.png)
-1786602170.png)
-1789631269.jpg)
