एजेन्सी– विश्वभर युद्धहरू बढ्दै जाँदा र ती थप जटिल बन्दै जाँदा विश्वको अवस्था ‘झन् खराब हुँदै गएको’ संयुक्त राष्ट्रसंघका महासचिव एन्टोनियो गुटेरेसले बताएका छन् ।
बढ्दो भूराजनीतिक विभाजनका कारण संयुक्त राष्ट्रसंघको सुरक्षा परिषद् प्रभावकारी रूपमा निष्क्रिय बनेको र यसले सबैभन्दा कमजोर अवस्थामा रहेका मानिसहरूलाई अत्यन्तै गम्भीर परिस्थितिमा पुर्याएको उनको भनाइ छ ।
संयुक्त राष्ट्रसंघको महासभामा महासचिवका रूपमा आफ्नो अन्तिम सम्बोधन गर्नुअघि सोमबार अल जजिरासँगको अन्तर्वार्तामा गुटेरेसले विश्वमा जारी प्रमुख सैन्य द्वन्द्व तथा वर्तमान चुनौती सामना गर्न संयुक्त राष्ट्रसंघ अझै सान्दर्भिक छ कि छैन भन्ने विषयमा धारणा राखेका हुन् ।
गुटेरेसका अनुसार युद्धमा ‘महाशक्ति’ तथा सुरक्षा परिषद्का प्रमुख सदस्यहरूकै संलग्नताले अन्तर्राष्ट्रिय कानुनको निरन्तर उल्लंघनका कारण संकट सिर्जना भएको छ ।
‘यसले दण्डहीनताको वातावरण सिर्जना गरेको छ, जहाँ मध्यम आकारका शक्तिहरूले आफूले जे गरे पनि हुन्छ भन्ने विश्वास गर्न थालेका छन्, किनकि त्यसको कुनै परिणाम भोग्नु पर्दैन,’ उनले भने ।
गुटेरेसले रुस–युक्रेन युद्ध तथा अमेरिका–इजरायल र इरानबीचको युद्धका कारण सर्वसाधारणले भोगिरहेका असरबारे पनि चर्चा गरे । उनका अनुसार खाद्यान्नको उपलब्धता, इन्धनको मूल्यवृद्धि र विश्वव्यापी मुद्रास्फीतिमा यी द्वन्द्वको प्रत्यक्ष प्रभाव परेको छ ।
उनले भने, ‘युक्रेन युद्धका कारण खाद्यान्न, मल र ऊर्जाको ब्ल्याक सीहुँदै हुने निर्यातमा देखिएका समस्यालाई खाडी क्षेत्रको स्ट्रेट अफ होर्मुज र लाल सागरको बाब अल–मन्देब क्षेत्रमा उत्पन्न कठिनाइ तथा मध्यपूर्वका विभिन्न देशमा तेलका संरचनामाथि भएका आक्रमणसँग जोड्दा विश्वका धेरै अर्थतन्त्रमा विनाशकारी प्रभाव पार्ने अवस्था सिर्जना भइरहेको छ ।’
विकसित देशहरूमा बढेको ब्याजदर र इन्धनको मूल्यलाई समयक्रममा व्यवस्थापन गर्न सकिने भए पनि विकासशील देशका मानिसहरू भने बढ्दो ऊर्जा तथा खाद्यान्नको लागत र मलको अभावका कारण निराशाजनक अवस्थामा पुगेको गुटेरेसले बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
